17-æм февралы нæ горæты Дзулфыцæн комбинаты территорийыл цытджын æгъдауæй байгом Хуссар Ирыстоны Æфснайæн банджы филиал. Церемонийы хайад райстой Хицауады Сæрдар Бекъойты Геннади, Национ банджы сæрдар Джиоты Жаннæ æмæ ацы районы цæрджытæ.
Æфснайæн банджы директор Дзуццаты Димитр куыд загъта, афтæмæй нæ горæты ахæм уæлæмхас филиал Æфснайæн бангæн цалдæр азы размæ байгом Джиоты Аланы уынджы кæрон, базарадон центр «Хурзæрин»-ы дæр. Ныр та ацы районы уымæн байгом æмæ у дуджы домæн. Бирæ социалон фарстытæ скъуыддзаг цæуынц банджы лæггæдты руаджы. Уымæ гæсгæ банджы структурæтæ цæрджытæн хъуамæ уой æнцонвадат. Цæрджытæн лæггад кæнынæн кæд Централон æфснайæн банджы цалдæр рудзынджы ис, уæддæр дзы алы хатт дæр вæййы стыр радтæ. Уæлдайдæр та – пенситæ дæттыны афон.
Дзулфыцæн комбинаты территорийыл бангæн цы филиал байгом, уым хорз уавæртæ ис клиенттæ райсынæн. Ифтонг æрцыд нырыккон домæнтæм гæсгæ видеоцæстдарды æмæ компьютерон системæйæ. Ныр ацы офисы кусджытæ бангон лæггæдтæ кæндзысты ацы районы цæрæг адæмæн. Тъбет, Къостайыхъæу æмæ ма сæ алфæмблай цы чысыл хъæутæ ис, стæй – Знауыры районы цæрджытæн дæр. Ацы филиалы пенситæ райсын æмæ коммуналон фиддонтæ бафидынæй дарддæр æххæст цæудзæн æндæр операцитæ дæр.
Куыд зонæм, афтæмæй нæ республикæ дæр цадæггай хизы картæйон системæмæ. Республикон Бирæпрофилон медицинон центры кусджытæ ныр цалдæр мæйы мызд райстой картæты руаджы. Ныр та уыцы системæмæ рахизынмæ йæхи цæттæ кæны Ахуырады министрад. Æфснайæн банджы сæйраг офисы уыцы нысанæн лæууы банкомат. Дзуццаты Димитры ныхæстæм гæсгæ тагъд ног офисы дæр æвæрд æрцæудзæн æмæ дзы пайда кæндзысты цæрджытæ.
Горæты ацы районы цæрджытæ цымыдис кодтой, кредиттæ исын цы æмбæстæгты фæнда, уыдонæн дæр гæххæттытæ райсыны бар уыдзæн ам, æви нæ. Уый тыххæй та сын Дзуццаты Димитр афтæ загъта, зæгъгæ, офисы æххæст цæудзысты бирæ бангон операцитæ. Раздæр, зæгъгæ, кредит райсын уыд вазыгджындæр. Фæлæ фæстаг рæстæг кредитон хайад сарæзта сæрмагонд схемæ, уымæ гæсгæ ныр рады лæууын нал хъæуы. Кæд æмæ адæймагæн йæ кредитон истори хæлд нæу, ома, уый размæ бангæй кредиты хуызы цы æхцайы фæрæзтæ ахаста, уыдон афоныл раздæхта, уæд ын банг сæрибарæй дæтты дыккаг-æртыккаг хатт дæр кредит. Æфснайæн банджы сæргълæууæг ма загъта, зæгъгæ, ивгъуыд азæй РХИ-йы Президенты амындмæ гæсгæ фæкъаддæр кредиты афæдзон процент дæр. Банг кредиттæ дæтты куыд хицæн адæймæгтæн, афтæ амалиуæггæнджытæй сæ бизнес-плантæ Экономикон райрæзты ми-нистрад хорзыл кæмæн банымайы, уыдонæн дæр.
УАЗÆГТЫ Марфа
Comments are closed, but trackbacks and pingbacks are open.