Нæ республикæйы æфсирон культурæты æфснайыны куыст кæнынц Цхинвал, Знауыр æмæ Ленингоры районты æхсæнадон æмæ фермерон хæдзарадтæ. Ацы хъуыддаджы иууыл хуыздæр фæстиуджытæ равдисынц Ленингоры районы хæдзарадтæ. Уыдон кусынæн бæзгæ бонтæй спайда кæнынц æмбæлон æгъдауæй, мæрмæ базилыны фæстæ бацархайынц тауыны куыстытæ агротехникæйы æппæт домæнтæм гæсгæ сæххæст кæныныл. Афтæ бацархайдтой ацы аз дæр. Цалдæр къуырийы размæ хуымтæ сбæззыдысты æфснайынæн æмæ сæм æвæстиатæй рацыдысты комбайнертæ Дриаты Тамаз, Хуриты Сослан, Мæргъиты Илья æмæ тракторон бригадæйы бригадир Габиты Хвича.
Æфсирон культурæтæ район бындуронæй байтауы Цъинагар, Орчъосан æмæ Абреуы быдырты. Банысан кæнын хъæуы, хуымтæ æфснайынæн кæй сбæззынц уыцы иурæстæджы, уый та сæ зæрдыл дарынц хоркуыстгæнджытæ æмæ сæ уымæ гæсгæ фæхъæуы цырд фæлæууын, цæмæй тыллæг æфснайд æрцæуа рæстæгыл æмæ æнæсæфтытæй. Фæлтæрд комбайнер æмæ бригадир Габийы фырт куыд загъта, уымæ гæсгæ уал абоны бонмæ æркарстой 600 гектарæй фылдæр. Ис ма сын бабæстон кæнинаг 60 гектары æмæ уыцы куыст ахицæн кæныныл дæр архайынц зæрдиагæй. Зæгъын хъæуы, иннæ хуымты фæзуæттæ æфснайыныл та кæй кусынц хицæн амлиуæггæнджытæ æмæ уыдон дæр сæ фадæттæм гæсгæ тагъд кæнынц тыллæг бабæстон кæныныл. Габийы фырты ныхæстæм гæсгæ гектарон тыллæгæрзады бæрæггæнæн алы ран нæу æмхуызон, иууыл фылдæр хизы 25 центнермæ.
ХУЫБИАТЫ Никъала
