Ацы форумы хайад исы Хуссар Ирыстоны Хъахъхъæнынады министрады делегаци министр Марат Павловы сæргълæудæй, – хъусын кæны ведомствойы пресс-службæ.
УФ-йы Хъахъхъæнынады министрады уæрæх мадзал уагъд цæуы Мæскуыйы областы 14-æм августæй 20-æм августмæ. Хайад дзы исынц æхсай паддзахадæй фылдæр æфсæддон ведомствоты делегацитæ.
Хуссарирыстойнаг делегацийы сконды ма сты Гарзджын тыхты Генштабы хистæр Болататы Алан, фæсчъылдымы фæдыл министры хæдивæг Танделаты Вепхвия, сæрмагонд скондимæ куысты фæдыл министры хæдивæг Сабанты Инал, Хъахъхъæнынады министры æххуысгæнæг Руслан Сулейманов.
«Форумы куыст райдыдта знон. Йæ архайды фæзуаттæ сты парк «Патриот», полигон Алабино, Аэродром Кубинкайы объекттæ, æвдыст дзы сты уæрæсейаг хъахъхъæнынадон-сæудæджерадон комплексы иу мин æмæ æрдæг куыстуаты æмæ фæсарæйнаг бæстæты фирмæтæ», – загътой пресс-службæйы.
Афтæ ма пълæнтты ис хъуыддагон æмæ зонадон программæтæ, фæсарæйнаг партнертимæ бадзырдтæ æмæ контракттыл къухтæ æрфыссын. Уыдонæн æхцайæ нымадæй сæ бæрц у цыппарсæдæ миллиард сомæй фылдæр.
Форумы фæлгæтты ма арæзт æрцæудзæн Дунеон æдасдзинады фæдыл Мæскуыйаг конференци. Уымæй уæлдай ма уагъд æрцæудзæн дыкккаг дунеон антифашистон конгресс, – бафтыдтой сæ ныхæстæм ведомствойы пресс-службæйы.
