Хъæууон фæллойгæнæгæн бирæ аудинæгтæ ис, афтæ вæййы афæдзы алы афон дæр, уæлдайдæр уалдзыгон бонты. Æнæвдæлон сты Цхинвалы районы Къостайыхъæуы цæрджытæ дæр. Уыдонæй бирæтæ æрмæст сæхи зæххы фадгуыты нæ нæ бакусынц, фæлæ активон хайад райсыны æхсæнадон хæдзарадты архайды дæр.
Уыдонæй сæ иу у Хуыбиаты Алихан. Уый æрвылаз дæр байтауы æфсирон культурæтæ, базилы сæм агротехникæйы фæткойтæм гæсгæ æмæ сæ тыллæгæрзадæй барухс вæййы йæ зæрдæ. Ацы уалдзæджы дæр фæстæ нæ фæлæууыд æмæ уалдзыгæнд мæнæу байтыдта 10 гектары æмæ хъæбæрхор та – 16 гектары фæзуатыл. Æвзартæ сæвзæрдысты хорз æмæ ныфсæвæрæн ис, ацы культурæтæй кæй æркæндзæн хъæздыг тыллæг.
Куыд фосдарды, афтæ зæххы куыст дæр рагæй кæны Мæлдзыгаты Ирбег дæр. Уымæн та бантыст байтауын фæйнæ 10 гектары хъæбæрхор æмæ цъой.
Хуыбиаты Уасил йæ рæстæджы раззагон механизатор уыд æмæ йæ уæзгæ хайбавæрд хаста æппæт хъæууонхæдзарадон куыстытæ æххæст кæнынмæ. Ныр дæр иу ран нæ бады æмæ та йын тыд æрцыд уалдзыгæнд мæнæу 3 гектары, хъæбæрхор – 5 гектары æмæ люцернæ та 10 гектары фæзуатыл. Æвзонг фермер Хуыбиаты Батрадз æфсирон культурæтæ байтыдта 20 гектары фæзуатыл, уыцы нымæцы 4 гектары хъæбæрхор æмæ уалдзыгæнд мæнæу та 16 гектары. Хъабанты Хъазбеджы бæрны зæхх ис 12 гектары æмæ йын уыцы фæзуатыл фæззыгæнд мæнæу тыд æрцыд 8 гектары, æмæ иннæ хай та у хъæбæрхоры культурæ.
Хæдзарадтæн фæззыгон æмæ уалдзыгон куыстыты сæ къух фæрог кодтой механизатортæ Тыджыты Валик, Хуыбиаты Алан, Гаглойты Алан, Мæлдзыгаты Алан.
Хуыбиаты Никъала
