Дӕ цӕст ахӕсс дунейыл

ПАДДЗАХАДОН ВИЗИТ

УФ-йы Президент Владимир Путин паддзахадон визитимæ уыд Хъыргъыстаны. «Райзæрдæйæ нысан кæнын нæ дыууæварсон æмгуыстады бæрзонд æвæзад æмæ активон динамикæ. Мах уæрæхдæр æмæ арфдæр кæнæм не ‘мгуыстад базарады, сæудæджерады, транспорты фадгуыты. Рæзы æфсæддон æмæ æфсæддон-техникон æмгуыстад. Фæнды мæ бузныг зæгъын Уæрæсейæн Хъыргъыстаны гарзджын тыхтæн радон æххуысы тыххæй», – загъта Сооронбай Жээнбеков.

ÆФСÆДДОН ÆХХУЫС СЫН У ÆНÆМÆНГХЪÆУÆГ

Бишкекæн æфсæдон æххуыс æнæмæнгхъæуæг у. Централон Ази у вазыгджын регион, уыимæ Афганистаны хуызæн сыхагимæ. Зымæджы Уæрæсе Хъыргъыстаны сарæзта арæнгæрон заставæ æмæ йæ сифтонг кодта æфсæддон техникæйæ. Къухтæ фыст æрцыдысты бирæмиллиардон проекттæ среализаци кæныны фæдыл сразыдзинæдтыл. «Уæрæсе 2011 азæй фæстæмæ Хъыргъыстанмæ нефть æрвиты æнæ хъалонтæй, кæцыты гуырахст азы дæргъы схизы 1,1 милуан тоннæйы фылдæры онг. Афтæмæй Хъыргъыстаны экономикон эффект схизы дыууæ миллиард доллары онг», – фехъусын кодта Владимир Путин.

ÆРБАЦЫДЫСТЫ САУ ДЕНДЖЫЗМÆ

НАТО-йы æфсæддон-денджызон тыхты дыккаг æдзухон къорды хæстон наутæ æрбацыдысты Сау денджызмæ. Къорд конд у цалдæр фрегатæй. Наутæ хайад райсдзысты Sea Shield 2019 ахуырты, афтæ ма тренировкæтæ ауадздзысты Гуырдзыстон æмæ украинæйаг партнертимæ.

ИНО-ЙЫ ÆДАСДЗИНАДЫ СОВЕТЫ ЭКСТРЕНОН РАБАДТ

Голаны бæрзæндты тыххæй Дамаскы домæнмæ гæсгæ уагъд æрцыд ИНО-йы Æдасдзинады советы экстренон рабадт. Æдас-дзинады советы хайадисджытæй ничи рахæцыд Голаны бæр-зæндтыл Израилы суверенитет банымайыны тыххæй Трампы уынаффæйы æвварс. ИНО-йы Сирийы æдзухон минæвар йæ фæндон загъта Иугонд Штаттæн, цæмæй уыдон Израилæн балæвар кæной америкæйаг территорийы хай.  «АИШ-æн ис фаг зæххытæ, радтут Израилæн Цæгат кæнæ Хуссар Каролинæйы. Балæвар кæнут Израилæн цалдæр штаты», – загъта ИНО-йы Сирийы æдзухон минæвар Башар Джааари.

РАУАГЪТА РАКЕТÆТÆ

Израиль ракетон цæф ныккодта Сирийы Алеппойы. Цалдæр ракетæйы сæмбæлдысты сæудæджерадон зонæ Шейх-Наджары объекттыл. Ракетæтæ æрхаудтой Алеппойы æмбæстагон аэропорт æмæ уымæ æввахс цæрæн пункт Джибриныл. Ракетон цæфы фæстæ æппæт Алеппойы ахуыссыд электроэнерги.

ЦÆТТÆ КÆНЫНЦ НОГ ПРОВОКАЦИ

Сирийаг провинци Идлибы боевиктæ æмæ «Урс каскæты» уæнгтæ план кæнынц ног провокацитæ химион буарадтæй спайда кæнгæйæ, – фехъусын кодта ИНО-йы Уæрæсейы æдзухон минæвар Василий Небензя Æдасдзинады советы рабадты. Террористон къорд «Хайят Тахрир аш-Шам»-ы контролы бын ис практиконæй Идлибы провиницйы 90 проценты. Небензя банысан кодта, зæгъгæ, террористтæ дарддæр дæр провокацион архайдтытæ кæнынц хицауады æфсæдты ныхмæ.

КРЕМЛЫ ДЗУАПП ТРАМПÆН

АИШ-ы президент Дональд Трамп фехъусын кодта, зæгъгæ, «Уæрæсе хъуамæ йæхи айса» Венесуэлæйæ æмæ банысан кодта, зæгъгæ, ацы нысан къухты бафтын кæныны тыххæй гæнæн ис æппæт амæлттæй дæр спайда кæнын. УФ-йы фæсарæйнаг хъуыддæгты министрады официалон минæвар Мария Захарова Трампы сидтæн сдзуапп кодта, зæгъгæ, Уæрæсейæн уынаффæтæ дæттыны бæсты Иугонд Штаттæ сæххæст кæнæт сæ ныфсæвæрд Сирийæ се ‘фсæдты ракæныны тыххæй.

 

РАДОН ГУМАНИТАРОН ÆХХУЫС

Венесуэлæйы столицæ Каракасмæ æрластой уæрæсейаг радон гуманитарон æххуыс медицинон модултимæ. Гуманитарон æххуыс æрвыст æрцыд ИНО-йы Генералон Ассамблеяйы резолюцитæ æмæ Боливариаг Республикæйы хицауады куырдиатмæ гæсгæ.

 

УРÆД ÆРЦЫД

УФ-йы Фæдагурæн комитет бафидар кодта Хабарвоскы крайы экс-губернатор Виктор Ишаевы кæй баурæдтой, уый тыххæй. Экс-губернаторы ныхмæ баконд æрцыд уголовон хъуыддаг «Роснефть»-ы æхцайы фæрæзтæ хи бакæныны тыххæй. 2013-2018 азы Ишаев уыд «Роснефть»-ы вице-президент. Уый аххосджын кæнынц 4 миллиард сомы хи бакæныны.

 

КЪУХТÆ ÆРФЫСДЗЫСТЫ СРАЗЫДЗИНÆДТЫЛ

Уæрæсейы æмæ Хъыргъыстаны уæлдæр ахуырадон уагдæтты къухдариуæггæнджытæ сæ къухтæ æрфысдзысты æмгуыстады тыххæй 70 сразыдзинадæй фылдæрыл. «30 азы размæ махæн уыд иууыл ахуырадон тыгъдад. Ахуырады уыцы системæ дунейы уыд конкурентхъом. Ныр афтæ нал у. Фæлæ рæстæг фенын кодта, махæн æнæмæнгхъæуæг кæй у иугонд ахуырадон тыгъдад, уый», – фехъусын кодта Хъыргъыстаны президент Сооронбай Жээнбеков. Ныртæккæ Уæрæсейы уæлдæр ахуыргæнæндæтты ахуыр кæнынц Хъыргъыстаны 15 мин æмбæстаджы æмæ Хъыргъыстаны та – Уæрæсейы 1,5 мин æмбæстаджы.

 

САНКЦИТÆЙ ЕВРОЦÆДИС ФЕСÆФТА ФЫЛДÆР

Продуктон эмбаргойæ Евроцæдис фесæфта Уæрæсейæ фылдæр, – фехъусын кодта ИНО-йы сæрмагонд докладгæнæг Идрисс Джазаири. Уый банысан кодта, зæгъгæ, уымæ гæсгæ хуыздæр у быцæутæ аскъуыддзаг кæнынæн æндæр фæндæгтæ ссарын. Афтæ ма Джазаири загъта, зæгъгæ, Уæрæсе йæхи сæрмагонд кондад кæй рæзын кæны, уымæ гæсгæ йыл санкцитæ тынг нæ бандæвтой.

ÆРТХЪИРÆН СÆМ КÆНЫНЦ

Каракасы оппозици фæлвары йæхирдæм бæстæйы гарзджын тыхты раздахыныл. Иугонд Штаттæ æндавынц венесуэлæйаг инæлартыл. Фæдзурынц сæм телефоны æмæ сæм бартхъирæн кæнынц, Николас Мадуройы æвварс кæй хæцынц, уымæн æвзæр фæстиуджытæ кæй уыдзæн, уый тыххæй. Венесуэлæйы ис 2 мин инæлары, уыдонæй Мадуройы рæстæджы æфсæддон нæмттæ райстой 800 адæймаджы.

УРÆД ÆРЦЫДЫСТЫ

УФ-йы Æдасдзинады федералон службæйы кусджытæ Хъырымы баурæдтой террористон организаци «Хизб ут-Тахрир аль-Ислами»-йы 20 хайадисæджы æмæ афтæмæй фæсыкк кодтой къорды структурæйы архайд. Æдасдзинады федералон службæйы куыд фехъусын кодтой, уымæ гæсгæ структурæйы уæнгтæ æр-дæгсакъадахы цæрджыты ‘хсæн парахат кодтой террористон идеологи, афтæ ма сæ рæнхъытæм кодтой хъырымаг пысылмæтты.

 Информацион агентадты хъусынгæнинæгтæм гæсгæ