Дæ цæст ахæсс дунейыл

БАХАСТА РЕЗОЛЮЦИЙЫ ПРОЕКТ

Уæрæсейы Федераци ИНО-йы Генералон ассамблеямæ æркæсынмæ бахаста астæуккаг æмæ къаддæр дæрддзæджы ракетæтæ сликвидаци кæныны тыххæй Бадзырд бахъахъхъæныны фæдыл резолюцийы проект. «Документ сиды Уæрæсе æмæ АИШ-мæ бадзырды фæдыл хæстæ бахъахъхъæныны тыххæй фарстыл консультацитæ адарддæр кæнын, афтæ ма æргомдзинады, кæрæдзийыл æууæнкдзинады æмæ æмгуыстады тыххæй реалон гæнæнты бындурыл стратегион фарстыты фæдыл конструктивон диалог сног кæнын», – хъусын кæны ИНО-йы УФ-йы æдзухон минæварад. Уымæй дарддæр ма, уæрæсейаг фарс бахатыд ИНО-йы паддзахадтæ-хайадисджытæй алкæмæ дæр, цæмæй фæактивондæр кæной сæ архайд астæуккаг æмæ къаддæр дæрддзæджы ракетæтæ сликвидаци кæныны тыххæй бадзырд зæрдиагæй бахъахъхъæныны тыххæй.

КОСОВОЙЫ ÆФСАД САРАЗЫНЫ ТЫХХÆЙ

14-æм декабры Приштинайы «парламент» уынаффæ райста Косовойы æдасдзинады тыхты косовойаг национ æфсадмæ рацаразыны тыххæй. Ацы къахдзæф у ИНО-йы Æдасдзинады советы резолюцийы гуымир æгъдауæй фехæлд, кæцы здæхт у Балканты уавæр серьезонæй скарз кæнынмæ, регионы хæстон конфликты рецидивы фæстиу-джытимæ. УФ-йы Фæсарæйнаг хъуыддæгты министрад косовойаг æфсад саразыны фæдыл равдыста йе ‘нæ-разыдзинад ИНО-йы Æдасдзинады советы резолюции кæй халынц, уый фæдыл. Косовойы гарзджын тыхты уыдзæн 8 мин хæстоны, уыдонæй 5 мины уыдзысты æдзухон службæйы æмæ 3 мин хæстоны та – фæсауæрцы.

ÆРСИДТ ИНО-ЙЫ ÆДАСДЗИНАДЫ СОВЕТЫ РАБАДТ АУАДЗЫНМÆ

Сербийы президент Александр Вучич бахатыд ИНО-йы Æдасдзинады советы рабадт ауадзыны тыххæй Косовойы сæвзæргæ уавæры фæдыл. Сербаг телеуынынады эфиры раныхас кæнгæйæ, Вучич фехъусын кодта, зæгъгæ, Косовойы æфсад саразыны тыххæй уынаффæ æвдисæн у уымæн, æмæ Приштинайы кæй нæ фæнды Белградимæ ныхас кæнын. Вучич банысан кодта, зæгъгæ, йæ ныфс уыд уавæр аскъуыддзаг кæнынæй, фæлæ ныр æрцыд ахæм хатдзæгмæ, зæгъгæ, Косовойы æфсад саразын баст у уыимæ, æмæ йæ фæстæ кæй лæууынц АИШ, Стырбритани æмæ Герман. Уый бацамыдта, зæгъгæ, раздæр дæр фæдзæхста ацы бæстæты, сæ фарсхæцынад косовойаг албайнæгты кæй æркæндзæн ахæм фæстиуæгмæ.

ФИДДОНТЫ ТЫХХÆЙ

Иугонд Штаттæ уæддæр фæфылдæр кæндзысты фиддонтæ китайаг товартыл 10% – 25 % онг. Æрмæст фиддонтæ фæфылдæр кæныны бон ахастой 2019 азы 1-æм январæй 2-æм мартмæ. Æмбæлон ивындзинæдтæ хаст æрцыдысты АИШ-ы хицауадон документты федералон реестрмæ. Китайаг товартыл фиддонты фæфылдæргонд тарифтæ баззадысты 200 миллиард долларæй. Уыимæ Аргентинæйы «большая двадцатка»-йы саммиты рæстæджы АИШ-ы президент Дональд Трамп куыд фехъусын кодта, афтæмæй уымæн уыд «тынг æнтыстджын» фембæлд Китайы сæрдар Си Цзинпиньимæ. Китайаг делегациимæ фембæлды фæстæ Трамп фехъусын кодта, зæгъгæ, уый нæ фæфылдæр кæндзæн китайаг продукцийыл фиддонтæ ног азы фæстæ дæр. Æцæг, кæд æмæ 90 бонмæ Вашингтонæн йæ къухты нæ бафта Пекинимæ бадзурын иуæй-иу базарадон фарстыты тыххæй, уæд 10 процентон фиддонтæ сырæздзысты 25 проценты онг.

УЫНАФФÆ КОДТОЙ «СЕВЕРНЫЙ ПОТОК-2»-ЙЫЛ

УФ-йы энергетикæйы министр Александр Новак Германы экономикæ æмæ энергетикæйы министр Петер Альт-майеримæ телефоны æруынаффæ кодтой Украинæйыл Европæмæ газ уадзыны фарстатыл, афтæ ма газуадзæн «Северный поток-2»-йы проекты тыххæй. Уый размæ Германы министрты кабинеты пресс-службæйы фехъусын кодта, зæгъгæ, «Северный поток-2»-йы фæдыл Европарламенты резолюци,  цыран сидтæуы газуадзæны проекты реализаци аивынмæ,  нæ фивта Германы хицауады позици ацы проекты фæдыл.

НОГÆЙ ТА ПРОТЕСТТÆ

Францы протестон акциты фæндзæм сабат уый размæйы акциты хуызæн знæт нæ уыд, кæнæ адæм бафæлладысты, кæнæ та райгондæй баззадысты бæстæйы президент Эммануэль Макроны  архайдтытæй. «Бур жилеттæ» протестон акцитæм цæуын райдыдтой 17 ноябрæй фæстæмæ. Райдианы сæ домæн уыд бензины аргъ фæкъаддæр кæнын, уый фæстæ сæм бафтыд къорд æндæр домæны, суанг НАТО-йæ Францы рахизыны тыххæй домæн дæр.

ФЕСТЫ ÆФСÆДДОН АХУЫРТÆ

Бенгайлаг донбакæлæны фесты уæрæсейаг-индиаг æфсæддон-денджызон ахуыртæ «Индра Нэви-2018». Ахуырты рæстæджы Сабырденджызон флоты æмæ Скæсæйнаг флоты денджызонтæ Индийы æфсæддон-денджызон тыхтимæ практикæйы баххæст кодтой иумиаг тактикон маневрты фæлтæрддзинæдтæ. Денджызонтæ ауагътой артиллерион æхстыты комплекс денджызон æмæ уæлдæфон нысæнттыл, æххæст кодтой субмаринæйы агуырд æмæ спайда кодтой «ныхмæлæууæджы» донбындзугæнæг науты ныхмæ реактивон бомбæтæй.

СÆМБÆЛДЫСТЫ РАЗВÆДСГАРДЖЫТЫ ДЫУУÆ КЪОРДЫЛ

Донецкы Адæмон Республикæйы фехъусын кодтой, зæгъгæ, 16 декабры уыцы иурæстæджы Украинæйы гарзджын тыхты развæдсгарджыты дыууæ къорды бафæлвæрдтой Верхне-торецкоейы цæрæн пункты Донецкы позицитæм æрбаввахс кæнынмæ, кæцыйы фæстиуæгæн фæцæф сты Украинæйы гарзджын тыхты фондз хæстоны. Уый размæ та фехъусын кодтой æфсады æххæст хæстон цæттæдзинадмæ æркæныны тыххæй, Украинæ уæрæхмасштабон æрбабырст кæй цæттæ кæны, уымæ гæсгæ.

БАЙГОМ СКЪОЛА «ИРОН ÆГЪДАУ»

Ацы бонты «Ирæтты Уæлдæр советы» хъæппæрисæй Дзæуджыхъæуы байгом скъола «Ирон æгъдау». Æвзонг адæймæгтæй 14 азæй 35 азы онг кæуыл цæуы, уыдонæн сæ бон у ирæтты культурæ æмæ традицитимæ базонгæ уæвын. Амондзысты сæ историктæ, философтæ, бæстæзонджытæ, социологтæ, культурæ æмæ аивады кусджытæ. «Скъола саразыны идея сæвзæрд республикæйы уавæры анализы бындурыл. Мæ хъуыдымæ гæсгæ, æхсæнады адæймаг йæхи дарыны системæ æххæстæй ничи зоны, уымæн æмæ фыст никуы уыд, фæлæ лæвæрд цыд адæмон сфæлдыстады, таурæгъты хуызы. Нæ хæс у фæсивæдæн зонындзинæдтæ радтын, цæмæй æмбарой, цы традицитæ хъахъхъæнынц, уыдоны», – загъта «Ирæтты Уæлдæр советы» сæрдары хæдивæг Зæгъойты Вячеслав. Йæ ныхæстæм гæсгæ, скъола кусдзæн æдзух. Ныридæгæн арæзт æрцыд лекторты къорд, арæзт æрцыдысты лекциты темæтæ дæр. Сæ зæрды ис теоретикон æмæ практикон ахуыртæ уадзын.

ИНАУГУРАЦИ

16-æм декабры  горæт Телауы уагъд æрцыд Гуырдзыстоны фæндзæм президент Саломе Зурабишвилийы инаугураци. Уыцы иурæстæджы оппозици æрдомдта Гуырдзыстоны хицауады отставкæ. Оппозицийы фарсхæцджытæ цатыртæ сæвæрдтой парламенты раз æмæ дзы бирæтæ æхсæвы дæр баззадысты уым. Оппозиционертæ нæ нымайынц президентон æвзæрстыты фæстиуджытæ. Президенты бынатмæ экс-кандидат Вашадзейы ныхæстæм гæсгæ уыдзæн Саломе Зурабишвилийы делегитимаци æмæ президентон æвзæрстыты хатдзæгтæ ивд æрцæудзысты, уый тыххæй, зæгъ, ис барадон бындуртæ æмæ документаци.

 

Информацион агентадты хъусынгæнинæгтæм гæсгæ