Дæ цæст ахæсс дунейыл

ÆРУЫНАФФÆ КОДТОЙ БАЛКАНТЫ УАВÆРЫЛ

УФ-йы Президент Владимир Путин Уæрæсейы Æдасдзинады советы æдзухон уæнгтимæ æруынаффæ кодта Балканты уавæры тыххæй.  Балканты уавæр фæкарздæр, Косовойы «парламент» косовойаг æфсад саразыны тыххæй закъоны проекты пакет куы сфидар кодта, уый фæстæ. Уымæй дарддæр ма, рабадты дзырдтой, тыхджын уазæлттæ кæм ис, уыцы регионты уавæры тыххæй.

ХАЙАД РАЙСДЗЫСТЫ ФОРУМЫ

2019 азы дунеон экономикон форум  æрвылазон фембæлдмæ фæхуыдта 50 паддзахады сæргълæуджыты æмæ хицауадты, уыцы нымæцы «большая двадцатка»-йы æппæт бæстæты минæвæртты дæр. Форумы сæйраг темæ уыдзæн глобализаци æмæ цыппæрæм индустриалон революцийы рæстæджыты глобалон архитектурæ саразыны перспективæтæ. Уый размæ дзыллон информацийы фæрæзты фæзынд информаци, зæгъгæ, 2019 азы дунеон экономикон форумы организатортæ форуммæ нæ фæхуыдтой Олег Дерипаска, Виктор Вексельбергы æмæ Андрей Костины, кæцытæ хаст æрцыдысты АИШ-ы санкцион номхыгъдмæ. Ноябры æмбисы УФ-йы премьер-министр Дмитри Медведев фехъусын кодта, зæгъгæ, Уæрæсе гæнæн ис æмæ хайад ма райса форумы, кæд æмæ йæ организатортæ ма фæхоной иуæй-иу уæрæсейаг бизнесменты, уæд. Ныр бæрæг у, Давосы форумы организатортæ официалонæй кæй фæхуыдтой уæрæсейаг бизнесменты.

РАЙСТОЙ РЕЗОЛЮЦИ

ИНО-йы Генералон ассамблея чысыл фылдæр хъæлæстæй рахæцыдысты «Хъырымы æмæ Севастополы милитаризацийы», афтæ ма Сау æмæ Азовы денджызты хайы тыххæй Украинæйы резолюцийы æвварс. Уæрæсейы ныхмæ документы тыххæй схъæлæс кодтой 66 бæстæйы, йæ ныхмæ рацыдысты 19 бæстæйы æмæ 72 бæстæйы та сæхиуыл фæхæцыдысты. Документ кæй райстой, уый фæдыл Мæскуы равдыста йе ‘нæразыдзинад. «ИНО-йы паддзахадтæ-уæнгты къорд, фыццаг рады НАТО æмæ Евроцæдис разæнгард кæнынц Украинæйы ног фыдракæндтæ æмæ провокацитæ саразынмæ ныгуылæйнаг политикон амбициты тыххæй», – банысан кодта ИНО-йы æдзухон минæвары хæдивæг Дмитрий Полянский. Документы ма дзырдæуы, зæгъгæ,  ИНО-йы Паддзахадон ассамблея хорзыл нæ нымайы Керчы донкъубалы хиды арæзтад.

ÆМГУЫСТАД КÆНЫНЫ ТЫХХÆЙ

Уæрæсе æмæ Кубæ бадзырдтой генералон прокуратурæты хаххыл æмгуыстад кæныны тыххæй. Уый фæдыл документыл къухтæ æрфыстой 2019 азæй 2020 азы онг. Дыууæ бæстæйы ведомствоты минæвæрттæ фембæлдысты Гаванæйы.

УРÆД ÆРЦЫД СÆ АРХАЙД

УФ-йы Æдасдзинады федералон службæ мидхъуыд-дæгты министрад æмæ Росгвардиимæ иумæ рабæрæг кодтой дыууæ æрмадзы архайд, кæцытæ æнæлегалонæй куыстой хæцæнгæрзты модернизацийыл æмæ нæмгуытæ аразыныл. Фыдракæндон къорды организатор æмæ хайадисджытæ урæд æрцыдысты горæт Мæскуыйы, Мæскуы, Брянск, Калугæ æмæ Дæллаг Новгороды областты. Баджигул кæныны рæстæджы уыдонмæ ссардтой хæцæнгæрзтæ, хæстон æрмæджытæ, рæмудзæн æрмæг æмæ детонатортæ.

ЦÆТТÆ КÆНЫНЦ ПРОВОКАЦИ

УФ-йы фæсарæйнаг хъуыддæгты министр Сергей Лавров куыд фехъусын кодта, уымæ гæсгæ Украинæйы хицауад азы кæрон Хъырымы арæныл фæнд кæны хæстон провокаци сæххæст кæнын. Уый банысан кодта, зæгъгæ, Мæскуы нæ бауадздзæн Хъырымы цæрджыты бартæ фехалын æмæ фехъусын кодта, зæгъгæ, провокацийы тыххæй Порошенко райсдзæн аккаг дзуапп.

ÆРСИДТ УЫНАФФÆ АИВЫНМÆ

ИНО-йы Уæрæсейы æдзухон минæвар Василий Небензя Косовойы национ æфсад саразыны уынаффæйы фæдыл уагъдцæуæг ИНО-йы Æдасдзинады советы экстренон рабадты æрсидт æвæстиатæй хæдбар æфсад саразыны тыххæй уынаффæ аивынмæ. Йæ ныхæстæм гæсгæ, Косовойы национ æфсад саразын у ИНО-йы Æдасдзинады советы 1244 резолюци гуымир æгъдауæй фехалын. Косовойы æфсады хæрдзтæ уыдзысты азы дæргъы 98 милуан евройы. Сербийы президент Александр Вучичы ныхæстæм гæсгæ, Косовойы архайдтыты аххосджын сты Иугонд Штаттæ, Стырбритани æмæ Герман.

ПОЗИТИВОН БАНЫХÆСТÆ

Уæрæсе, Турк æмæ Ираны фæсарæйнаг хъуыддæгты министртæ Сирийы конституцион комитеты фæдыл Женевæйы баныхæсты схуыдтой позитивон, – дзырдæуы бæстæты-гарантты минæвæртты хъусынгæнинаджы. Фæрстæ банысан кодтой, зæгъгæ, Женевæйы Сирийы конституцион комитеты фыццаг фембæлд гæнæн ис уагъд æрцæуа 2019 азы райдианы. Иран, Уæрæсе æмæ Туркы минæвæрттæ баныхæсты фæстæ Сирийы фæдыл ИНО-йы сæрмагонд æрвыст лæг Стаффан де Мистурамæ радтой документ, цыран хатдзæгтæ сарæзтой сæ фембæлдæн.

ФÆФЫЛДÆР УЫДЗÆН КОНТРАКТОНТЫ НЫМÆЦ

УФ-йы Хъахъхъæнынады министр Сергей Шойгу ра-дзырдта, зæгъгæ, 2025 азмæ æфсады контрактон службæ-гæнджыты нымæц схиздзæн 475, 6 мин адæймагмæ.

ГÆНÆН ИС ФÆСЫКК КÆНА ДЕНУКЛЕАРИЗАЦИЙЫ ПРОЦЕСС

Цæгат Корея бафæдзæхста, зæгъгæ, ацы бæстæйы ныхмæ АИШ-ы президент Дональд Трамп цы санкциты политикæ уадзы, уый гæнæн ис кæрон скæна Кореяйы æрдæгсакъадахы денуклеаризацийы (ядерон хæцæнгæрзтæй сæрибар кæнын) процессæн. Цæгат Кореяйы централон агентад цы информаци апарахат кодта, уым дзырдæуы, зæгъгæ, «Трампы фæнды Пхеньянимæ йæ ахастытæ фæхуыздæр кæнын», фæлæ уыцы иурæстæджы америкæйаг паддзахадон департамент «тырны уыцы ахастыты ивгъуыды азты уавæрмæ раздахынмæ». Хъусынгæнинаг ист æрцыд, Иугонд Штаттæ Пхеньяны ныхмæ санкцитæ куы рауæрæхдæр кодтой, уый фæстæ.

Информацион агентадты

хъусынгæнинæгтæм гæсгæ