Æрæджы Дзæуджыхъæуы Сывæллæтты нымæцон ахуырады центр «IT-Куб»-ы уагъд æрцыдысты ерыстæ робототехинкæйæ «Робоэкстрим», зæгъгæ. Ацы центр арæзт æрцыд национ проект «Ахуырад»-ы фæлгæтты.
Ерысты уыд серьезон конкуренци, Республикæ Цæгат Ирыстон-Аланийы æппæт районтæй 44 командæйы æмæ дыууæ та – Хуссар Ирыстонæй. Ерыс кодтой дыууæ кары къорды – 7 азæй 12 азы онг æмæ 13 азæй 17 азы онг ахуырдзауты ‘хсæн.
Хуссарирыстойнаг дыууæ командæйы ерысты хайад райстой Дзæуджыхъæуы сывæллæтты нымæцон ахуырады центр «IT-Куб»-ы сæргълæууæг Калиниченко Аллæйы фæхуындмæ гæсгæ. Æндæр ерыстимæ абаргæйæ, «Робоэкстрим»-ы хицæндзинад ис уый мидæг, æмæ йæ хайадисджыты раз лæууыд конкретон хæс – ирвæзын кæнын. Куыд ис гæнæн роботты æххуысæй экстремалон уавæрты адæмæн баххуыс кæнын? Комкоммæ лæгъз фæндагыл ацæуын æнцон у, фæлæ хæхтыл хъыгдардбаййафæгмæ бацæуын æмæ йæ æдас бынатмæ раласын бирæ вазыгджындæр у. Хайадисджыты бахъуыд роботты конкретон миссимæ смодификаци кæнын.
Сывæллæтты ахуырады нымæцон центр «IТ-куб»-ы разамонæг Алла Калиниченко загъта: «Мах алыхатт дæр фенхъæлмæ кæсæм ацы конкурсмæ æмæ дзы æхцондзинад райсæм, уымæн æмæ сывæллæттæ сæ роботтæ аразгæйæ фæпайда кæнынц инженерон хъуыдытæй, оригиналон уынаффæтæй æмæ афтæмæй фылдæр кæнынц сæ зонындзинæдтæ.
Робототехникæйы фæдыл ерысты нысан у фæсивæды сфæлдыстадон æмæ интеллектуалон рæзт, техникæмæ сын сæ цымыдисдзинад бæрзонддæр кæнын. Ерыстæ уагъд цыдысты дыууæ номинацийæ: «Пилот» æмæ «Автопилот». Роботтæ сæ хæстæ кæм æххæст кодтой, уыцы полигон уыд уникалон. Сæрмагондæй бакуыст æрцыд ацы ерысты тыххæй математикон ахуырады дзæуджыхъæуккаг центры тыхтæй. Жюрийы сконды уыдысты «IТ-Куб»-ы кусджытæ æмæ Цæгат Кавказы Хæххон-металлургон институты минæвæрттæ.
Хистæр кары конкурсантты ‘хсæн «Автопилот»-ы номинацийы 2-аг бынат бацахста Цхинвалы Æвзонг техникты республикон станцы командæ «Электрон» Бранский Егоры скондæй. Йæ разамонæг у станцы ахуыргæнæг Плиты Инал. 3-аг бынат дæр бацахста цхинвайлаг командæ «Интеграл» Дерябин Ефимы скондæй. Уымæн дæр йæ разамонæг у Плиты Инал.
Уæлахиздзауты схорзæхджын кодта Республикæ Цæгат Ирыстон-Аланийы Ахуырады министр Алыбегты Эллæ. Ацы бонты Бранский Егор æмæ Дерябин Ефимæн дæр æрæрвыстой сæ хорзæхтæ – 2 æмæ 3-аг къæпхæны дипломтæ æмæ сын сæ цытджын æгъдауæй радта Къалаты Нариман. Уый стыр æнтыст у Æвзонг техникты станцы æнгом æмæ куыстуарзаг коллективæн. Сывæллæттæ сæхи равдыстой тынг хорз.
ХЪÆДЫЛ АРÆЗТ НЫВÆФТЫДТЫ КОНКУРС
Цхинвалы Æвзонг техникты республикон станцмæ райзæрдæйæ цæуынц республикæйы скъолаты ахуыргæнинæгтæ æмæ сын уагдоны ахуыргæнджытæ, сæ директор Къалаты Нариманы сæргълæудæй, рæдауæй амонынц сæ зонындзинæдтæ. Ахуыры азы дæргъы станцы уагъд æрцæуынц алыгъуызон конкурстæ. 23-æм апрелы Цхинвалы Æвзонг техникты станцы хатдзæгтæ сарæзтой хъæдыл аразгæ нывæфтыдтытæй республикон конкурс «Навыки умелых»-æн.
Станцы директор Къалаты Нариман куыд банысан кодта, афтæмæй Æвзонг техникты станцы хъæдыл аразгæ нывæфтыдтытæй конкурс уагъд æрцыд фыццаг хатт, фæлæ йæ ныфс ис, уый æрвылаз дæр уагъд кæй цæудзæн, уымæй. «Бирæ хорз куыстытæ уыд конкурсы, уымæ гæсгæ æнцон нæ уыд хуыздæр куыстытæ сбæрæг кæнын. Фæлæ хуыздæрты ‘хсæн вæййы ноджы хуыздæртæ. Сымах алцыдæр сарæзтат тынг хорз, фæлæ дарддæр дæр кусут уæхиуыл», – загъта Къалаты Нариман.
Станцы директор ма йæ ныхасмæ бафтыдта, зæгъгæ, ахæм конкурсты хайадист сывæллæттæн пайда у, уымæн æмæ нырыккон дунейы бирæ професситæ баст сты дизайнимæ.
Уæлахиздзаутæ хорзæхджын æрцыдысты 1, 2 æмæ 3-аг къæпхæны дипломтæй, æмæ хицæн хайадисджытæ та – «Специалон номинаци»-йы грамотæтæй. Сæ арæхстдзинад æмæ сфæлдыстад равдисын сæ бон ссис куыд Æвзонг техникты станцы «Техника пирографи»-йы баиугæнды ахуырдзаутæн, афтæ ма республикæйы скъолаты минæвæрттæн дæр.
12-15 азы кары хайадисджыты ‘хсæн уæлахиздзау ссис Гуыбеты Елизаветæ, 2-аг бынатыл ацыд Коцты Анастасия, 3-аг бынæттæ та фесты Æлборты Амандæ æмæ Хъотайты Аннæйы.
8-11 азы кардзыдты ‘хсæн та фыццаг бынат бацахста Æлборты Аделинæ, 2-аг бынат фæцис Быценты Аннæйы æмæ 3-аг бынат та – Плиты Рудольфы.
Специалон номинацийы грамотæтæй схорзæхджын кодтой Коцты Аннæ, Хуыбиаты Аннæ æмæ Чертхъоты Элинæйы. Куыстытæн аргъ кодта компетентон жюри.
Джиоты Екатерина
