Дӕ цӕст ахӕсс дунейыл

ЛАВРОВ ÆМÆ ПОМПЕОЙЫ ФЕМБÆЛД

Финляндийы Арктикон советы фæлгæтты уыд УФ-йы фæсарæйнаг хъуыддæгты министр Сергей Лавров æмæ АИШ-ы паддзахадон секретарь Майкл Помпеойы фембæлд. Уынаффæ кодтой президентон æзæрстыты фæстæ Украинæйы уавæрыл, Сирийы, стратегион стабилондзинады æмæ, кæй зæгъын æй хъæуы, Венесуэлæйы фарстытыл. Уый размæ Вашингтон гуымир æгъдауæй бауынаффæ кодта Уæрæсейæн, цæмæй йæхи «айса» Венесуэлæйæ. Фæлæ сæ Мæскуы бафæдзæхста, тыхон сценарийæн æвзæр фæстиу-джытæ кæй уыдзæн, уымæй. Баныхæсты фæстæ Лавров  прессæйæн куыд загъта, уымæ гæсгæ гæнæн ис æмæ фембæлой Уæрæсе æмæ АИШ-ы президенттæ.

РАНЫХАС КОДТА АРКТИКОН СОВЕТЫ СЕССИЙЫ

УФ-йы фæсарæйнаг хъуыддæгты министр Сергей Лавров арктикон советы сессийы йæ раныхасы рæстæджы банысан кодта, зæгъгæ, Уæрæсе æргом у Арктикæйы уæрæх æмгуыстады тыххæй. «Ницахæм æфсон ис конфликттæн ам сæвзæргæ фарстыты тыххæй. Уæрæсемæ хауы Арктикæйы æртыккæгæм хай, мах æй нымайæм сабырдзинад, стабилондзинад æмæ продуктивон æмгуыстады тыгъдадыл. Æхсызгонæй мæ банысан кæнын фæнды уый дæр, æмæ Арктикон Советы фæдыл нæ партнертæ се ‘ппæт дæр кæй сты ахæм позицийыл хæст», – загъта уый.

«СЕВЕРНЫЙ ПОТОК-2»

«Газпром»-ы куыд радзырдтой, уымæ гæсгæ абоны онг Балтийы денджызы бынты æвæрд æрцыд газуадзæны 1170 километрæй фылдæр, кæцы у 48 проценты иумиаг арæзтадæн. 30 апрелы газуадзæны хæтæлтæ æвæрыны фæдыл куыстытæ райдыдтой уæрæсейаг дæтты. Компанийы куыд банысан кодтой, уымæ гæсгæ газуадзæн «Северный поток»-ы денджызон хайы куыстытæ цæуынц графикмæ гæсгæ. Газуадзæны иумиаг гуырахст уыдзæн азы дæргъы 55 миллиард кубометры газ. Арæзтады аргъ у 9,5 миллиард евройы, кæцы скусдзæн 2019 азы кæрон.

СРÆМЫГЪД ЗАВОДЫ

Пермы крайы завод «Азот»-ы цалцæггæнæн куыстыты рæстæджы æрцыд срæмыгъд, кæцыйы фæстиуæгæн фæмард сты æртæ адæй-маджы. Цалдæр адæймаджы та бахаудтой рынчындонмæ.

РАЙДЫДТОЙ ДОКУМЕНТТÆ ИСЫН

Луганскы Адæмон Республикæйы райдыдтой куырдиæттæ æмæ документтæ исын уæрæсейаг паспорттæ райсыны тыххæй. Уæрæсейаг æмбæстагдзинад райсын кæй фæнды, уыдонæн баконд æрцыд фыццаг пункт мидхъуыддæгты министрады миграцион службæйы управленийы централон аппараты.

ФÆФЫЛДÆР СТЫ ХЪАЛОНТЫ ÆРБАЦЫДТЫТÆ

2019 азы фыццаг кварталы Уæрæсейы консолидацигонд бюджетмæ хъалонты æмæ фиддонты æрбацыдтытæ фæфылдæр сты 12,2 проценты, – фехъусын кодта УФ-йы Федералон хъалонты службæйы сæргълæууæг Михаил Мишустин УФ-йы Президент Владимир Путинимæ фембæлды рæстæджы. «2018 азы бюджетмæ æрбацыд 21,3 трилуан сомы, кæцы 2017 азимæ абаргæйæ у 23 проценты фылдæр. Абон консолидацигонд бюджет рæзы 12,2 проценты», – загъта Мишустин.

ÆРСИДТ ДУНЕОН ÆМÆХСÆНАДМÆ

Украинæйы фæсарæйнаг хъуыддæгты министр Павел Климкин æрсидт G7  бæстæтæ-хайадисджытæ æмæ Евроцæдисмæ, цæмæй Уæрæсе Донбассы цæрджытæн УФ-йы паспорттæ кæй дæтты фæхуымæтæгдæр схемæмæ гæсгæ, уый тыххæй йæ ныхмæ бакæной  ног санкцитæ. Климкин Мæскуыйы архайдтытæ схуыдта «бандитизм», кæцыты тыххæй, зæгъ, Кремль райсдзæн системон дзуапп. Ведомствойы сæргълæууæг нæ раргом кодта Украинæйы плæнтты тыххæй, æмæ фехъусын кодта, зæгъгæ, уый «ныхмæлæууæгæн суыдзæн сюрпризы хуызæн».

БАНЫХÆСТÆ

АИШ-ы паддзахадон секретарь Майкл Помпеойæн Багдады баныхæстæ уыд Иракы премьер-министр Аделем Абдель Махдиимæ. Помпео æрцыд Багдадмæ, Германмæ йæ визит аивгæйæ, Ираныл америкæйаг администрацийы æндæвдад фæтыхджындæр кæныны рæстæджы. Вашингтоны администраци бамбарын кодта, Берлинмæ визит аивын баст кæй уыд дунеон æдасдзинады проблемæтимæ. Америкæйаг прес-сæйы бæрæггæнæнтæм гæсгæ, ахæм уынаффæ баст у уыимæ, æмæ АИШ кæй райста развæдсгарæн зонæнтæ, цыма Иран йæхи цæттæ кæны регионы америкæйаг æфсæдтæм бабырсынмæ.

«ХРУЩЕВ ТЫХÆЙ РАДТА УКРАИНÆЙÆН ХЪЫРЫМЫ»

Украинæйы экс-президент Леонид Кравчук «Апостроф»-æн йæ интервьюйы фехъусын кодта, зæгъгæ, 1954 азы Никита Хрущев Украинæйы скондмæ тыхæй айсын кодта Хъырымы. Йæ хъуыдымæ гæсгæ Советон Цæдисы Централон Комитеты фыццаг секретарь æрдæгсакъадахы радта экономикон интерестæм гæсгæ, цыма, зæгъ, Мæскуыйæн йæ дарын йæ бон нæ уыд. «Дзурынц, зæгъгæ, махæн балæвар кодтой Хъырымы. Фæлæ уый афтæ нæу, махæн тыхæй айсын кодтой Хъырымы», – загъта Кравчук.

ТЕРЕЗА МЭЙЫ ХЪУСЫНГÆНИНАГ

Стырбританийы премьер-министр Тереза Мэй фехъусын кодта, зæгъгæ, Британи Евроцæдисы таможнæйон цæдисы уæнгæй баззайдзæн 2022 азы онг. Уый фæнд кæны Евроцæдисимæ ахастыты рæстæгмæйон таможнæйон механизм æрбавдисын, кæцы архайдзæн 2022 азы июны мæйы Стырбританийы радон иумиаг æвзæрстыты боны онг. Официалон Лондон цæттæ у ног закъоны банысан кæнын, зæгъгæ, брекзиты фæстæ Стырбритани ифтонг кæндзæн фæл-лойгæнджыты бартæ, Евроцæдисы бæстæты куыд у, афтæ.

УРÆД ÆРЦЫДЫСТЫ ТЕРАКТТЫ ОРГАНИЗАТОРТÆ

Шри-Ланкайы хицауад фехъусын кодтой, зæгъгæ, урæд кæнæ куынæг æрцыдысты, теракттæ сорганизаци кæныны тыххæй зæрдæ кæмæ фехсайдта, уыдон се ‘ппæт дæр. Уый тыххæй фехъусын кодта бæстæйы полицийы сæргълæууæджы хæстæ æххæстгæнæг.

ÆРХАУД ХÆДТÆХÆГ

Мексикæйы  цæгат хайы Коауилы штаты районы æрхауд хæдтæхæг, кæцыйы фæстиуæгæн фæмард сты 11 адæймаджы. Æдæппæтæй хæдтæхæджы бортыл уыд 13 адæймаджы. Развæлгъау зонæнтæм гæсгæ, хæдтæхæг бахауд тæрккъæвдайы бын, кæцыйы фæстæ пилот бафæлвæрдта экстренон æгъдауæй æрбадынмæ. Хæдтæхæджы бæлццæттæ здæхтысты Нуэво-Леоны штаты горæт Монтерреймæ  мексикæйаг боксер Саул Альваресаимæ тохы фæстæ.

Информацион агентадты хъусынгæнинæгтæм гæсгæ