Президент Гаглойты Алан йæхимæ райста сæрмагонд æфсæддон операцийы архайджытæ – Пæрæстаты Ацæмæз æмæ Тедеты Юрийы.
Паддзахады сæргълæууæг раарфæ кодта хæстонтæн. Уыдон цыбыр рæстæгмæ æрцыдысты сæ хæдзæрттæм.
«Мах цалдæр хатты уыдыстæм сæрмагонд æфсæддон операцийы зонæйы, фембæлдыстæм нæ лæппутимæ, фæлæ алыхатт нæ рауайы алкæимæ фембæлын. Уымæ гæсгæ æз архайын, чи æрцæуы, уыдонимæ фембæлын, цæмæй сын бузныг зæгъон æмæ сын радтон аккаг хорзæхтæ», – загъта Гаглойты Алан.
Уый банысан кодта, зæгъгæ, Хуссар Ирыстоны æмбарынц, ирон лæппутæ цавæр хæстæ æххæст кæнынц, цахæм тохы хæцынц, фæлæ уыимæ иумæ бæрзонд æмæ аккагæй хæссынц ироны ном.
«Мах уæ курæг стæм æрмæстдæр, уæхи хъахъхъæнут, æгасæй æмæ æнæнизæй æрыздæхут уæ хиуæттæм. Æнхъæлмæ уæм кæсæм уæлахизимæ. Адæм та сты уæ фарсмæ, æмæ алчидæр архайы, йæ бон цы у, уымæй баххуыс кæнын», – загъта Президент.
Æфсæддон хæс æххæст кæныны рæстæджы равдисгæ æхсардзинад æмæ хъайтардзинады тыххæй паддзахады сæргълæууæг Пæрæстаты Ацæмæз æмæ Тедеты Юрийы схорзæхджын кодта «Фыдыбæстæ хъахъхъæнæг»-ы майдантæй.
