Цхинвалы, Уырыссаг хæдзары базæйыл ауагъдæуыд тымбыл фынг «Родной Кавказ отстояли!»-йы онлайн-проекты фæлгæтты. Уый тыххæй фехъусын кодта организацийы пресс-службæ. Проекты организатор у горæт Новороссийскы муниципалон баиугæнды æхсæнадон палатæ.
Патриотон мадзалы идейæйы нысан уый у, æмæ ахуыргæндты, музейты кусджыты, студентты чи иу кæны, уыцы командæтæ радыгай адæмы рæгъмæ хæсдзысты, Стыр Фыдыбæстæйон хæсты рæстæджы Кавказы сæрыл тохты сæ регионтæ цы ролы ахъазыдысты, уый.
Ацы нысаниуæгджын марафоны эстафетæ райста Хуссар Ирыстон.
Цхинвалы Уырыссаг хæдзары къухдариуæггæнæг Сергей Комиссаров банысан кодта Кавказ гитлеронтæй ссæрибар кæныны хъуыддаджы Хуссар Ирыстоны æмбæстæгты роль. Комиссаров уыд Новороссийскы æхсæнадон организацийы инициативæйы фарс йæ райдианæй фæстæмæ, уымæн æмæ ацы мадзал нæ фыдæлты сгуыхтдзинад популяризацийы нысанæн уагъд цæуы.
Организацион хъуыддагæн баххуыс кодта æхсæнадон организаци «Росси»-йы сæрдар Хъотайты Светланæ. Уый хъæппæрисæй тымбыл фынджы куысты хайад райстой ХИПУ-йы историон-юридикон факультеты лектортæ æмæ студенттæ.
Деканы хæстæ æххæстгæнæг Гатыгкоты Гиви, æппæтиумæйаг историйы кафедрæйы хистæр ахуыргæнæг Гаглойты Бэлæ æмæ Ирыстоны истори æмæ кавказзонæны хистæр ахуыргæнæг Табуты Нелли радзырдтой знаг дæрæн кæнынмæ Хуссар Ирыстоны фырттæ æмæ чызджыты хайбавæрды тыххæй.
Докладгæнджытæ банысан кодтой, зæгъгæ, Фыдыбæстæ хъахъхъæн-джытæ архайдтой куыд æфсады рæнхъыты, афтæ бархионтæ æмæ партизанон къордты дæр.
Тымбыл фынджы хайадисджытæ цы фарстатæ лæвæрдтой, уымæй дискусситæ уыдысты цымыдисагдæр. Фарстатæ баст уыдысты фæдагурджыты архайдимæ æмæ хæстон кады бынæттæм экскурситы маршруттæ организаци кæнынимæ.
Цыбыр рæстæгмæ акцимæ æрбаиу уыдзысты Цæгат Ирыстон æмæ Уæрæсейы иннæ республикæтæ дæр.
