Транскамы хуссарирыстойнаг фадыджы Уанелы хъæуæй Рукъы тъунелмæ 7 километры дæрддзæг æмхæстæй æмбæрзт æрцыд асфальтбетон цъарæй. Уый тыххæй хъусын кæны республикæйы автомобилон фæндæгты арæзтад æмæ эксплуатацийы комитеты пресс-службæ.
«Фæндаггæрæтты кæрдынц кæрдæг, лыг кæнынц бæлæсты къалиутæ. Æввахс рæстæджы фæндагон арæзтады кусджытæ æрæвналдзысты Рукъы хъæумæ хæстæг зæйтæй хибахизæн галереяйы капиталон цалцæг æмæ реконструкци кæнынмæ æмæ йæ æркæндзысты нормативон уавæрмæ. Æппæт уыцы куыстытæ бакæныны фæстæ та кусджытæ æрæвналдзысты хъæуæг фæндагон нысæнттæ сæвæрынмæ», – дзырдæуы комитеты пресс-службæйы хъусынгæнинаджы.
Комитет сиды фæндагон змæлды хайадисджытæм, цæмæй æмбаргæ ахаст равдисой, цалцæггæнæн куыстытæ кæй цæуынц, уымæ, хъахъхъæной тагъдады режим, лæмбынæг кæсой фæндагон нысæнттæм.
