Паддзахдон унитарон куыстуат «Юг Осет Строй Инвест» план кæны республикон нысаниуæджы «Цхинвал-Дзау-Рукъ»-ы автомобилон фæндаджы 7-æм километры (Цæгаттаг микрорайонмæ хæстæг) ног хид аразыны æмæ реконструкци кæныны фæдыл куыстытæ августы кæронмæ фæуын. Уый тыххæй хъусын кæны автомобилон фæндæгты арæзтад æмæ эксплуатацийы фæдыл комитеты пресс-службæ.
«Хиды арæзтад хаст нæу Инвестицион программæмæ, финансгонд цæуы паддзаахдон бюджетæй. Раздæр дзырд цыдис ног уæлæмхас хид кæй уыдзæн машинæты иуæрдæм змæлдимæ, фæлæ къамис зæронд хиды уавæримæ куы базонгæ, уæд уынаффæ райста, цæмæй æхгæд æрцæуа, арæзтадон нормæтæн дзуапп кæй нæ дæтты æмæ аварион ситуацитæ кæй æвзæрын кæны, уымæ гæсгæ», – дзырдæуы пресс-службæйы хъусынгæнинаджы.
Ног хидыл машинæты змæлд уыдзæн дыууæ рдæм дæр, йæ уæрх та уыдзæн 11 метры. Фистæгæй цæуджытæн дæр дзы арæзт уыдзæн тротуартæ.
