Бирæ нал баззад афæдзы кæронмæ. 2022 азы Хуссар Ирыстоны социалон-экономикон рæзтæн ахъазгæнæг Инвестицион программæмæ цы мадзæлттæ хаст æрцыд, уыдоны æххæстдзинад бабæрæг кодта Президент Гаглойты Алан.
Фыццаг йæ инспекцион балц райдыдта Вокзалгæрон фæзуатæй. Ацы объект схæрзарæзт кæнын вазыгджын уыд, уымæн æмæ вокзалæн ис архитектурон нысаниуæг, стæй республикæмæ цы уазджытæ æрцæуы, уыдон дæр ардыгæй райдайынц сæ балц. Ам баивтой зæххыбын коммуникацитæ. Фæзуаты зæронд рухсы цæджындзтæ. Фæхсбандæттæ дæр ивд æрцыдысты. Цъæхгæнæн къутæрты иу хай бахъахъхъæдтой, фæлæ уарди дидинджытæ кæм уыд, уыдоны бынаты ногтæ ныссадздзысты. Сквер æмæ дидинты газонæн се ’хсæнты ауагътой сæрмагонд доны системæ, кæцыйы фæрцы æртахгай донхæр цæудзысты газонтæ. Фæзуаты сарæзтой донлæсæн къанаутæ æмæ та сæ баиу кодтой Хъайтарты уынджы магистралон сæйраг хæтæлмæ. Ныр ацы фæзуаты къæвдабонты уыдзæн æдæрсгæйæ цæуæн.
Президент æмæ йæ бæлццæттæ сæ фæндаг акодтой Шанхайы районмæ. Ам Инвестпрограммæйы фæлгæтты рæзы дыууæ уынджы — Хъуылайы æмæ Къозоны фырты уынгтæ. Хъуылайы фырты уынджы фæзуат у 2521 квадратон метры. Æдæппæт йæ хæрзарæзтадæн рахицæн кодтой 33 166 мин сомы. Раивтой канализаци æмæ доны хæтæлтæ. Хæдзæрттæм сæ баиу кодтой. Къозоны уынджы дæргъæн та у 368 метры бæрц. Ныртæккæ ацы уынджы тротуарыл плиткæ æвæрынц. Хæрзарæзтадон куыстытæ фæуыдзысты ацы бонты æмæ уый дæр Ног азмæ эксплуатацимæ лæвæрд æрцæудзæнис.
Уый фæстæ та бабæрæг кодтой Ирæтты уынджы фæзилæны уавæр. Амы цæрджытæ тынг тыхстысты, уæлдайдæр та къæвдабонты иу дзы азмæлæнтæ нæ уыд, афтæ ныдзыхъхъытæ-ныкъуыппытæ ис. Цæрджытæ хъаст кодтой, фæлæ сæ хъастæй ницы цыд. Ныр ам æххæст æрцыдысты доны æмæ газы хæтæлтæ баивыны куыстытæ. Фæндагыл ныккалдтой лыстæг хуыр, уый фæстæ та йыл ауагътой асфальт. Президент цымыдис кодта, бирæуæладзыгон хæдзæртты раз хæрзарæзтгонд цæуылнæ у, зæгъгæ. Уый тыххæй Арæзтад æмæ архитектурæйы министр Зæгъойты Эдуард ныфс бавæрдта, фидæн азы сæм кæй æрдардзысты сæ хъус, кæй дзы æрцæудзæн арæзт сывæллæттæн хъазæн фæзуат.
Дарддæр Президент бабæрæг кодта, Бигæдзаумæтты фабрикæйы территорийыл цы бирæуæладзыгон хæдзæрттæ сырæзт, уыдоны.
Хæдзæрттæ цæттæ сты эксплуатацимæ. Дыууæ 75-фатерон хæдзармæ тагъд балидздзысты нæ горæты тыхст бинонтæ.
Инспекцион азылды кæрон Гаглойты Алан хатдзæгтæ сарæзта æмæ йæ хъуыдытæ радзырдта журналисттæн:
«Æз райгондæй баззадтæн, нæ горæты ахæм объекттæ реализаци кæй цæуы. Уынгтæ хæрзарæзт цæуынц, рæзынц бирæуæладзыгон хæдзæрттæ — уый дзурæг у, цард размæ кæй цæуы, нысангонд пълантæ реализаци кæй цæуынц. Уынгтæ гъæдджын æрмæджытæй арæзт кæй цæуынц, уый сын сæ эксплуатацийы æмгъуыд адарддæр кæндзæнис. Мах фæнды, цы ног Инвестпрограммæ райстам, уый дæр æнæзæрдæхудт æмæ гъæдджынæй саразын. Инвестпрограммæйы фæлгæтты цы мадзæлттæ сырæзт, уыдонæй абоны онг цæттæ у 95 проценты бæрц», — загъта Гаглойты Алан.
Уазæгты Марфа
