Цæгат Ирыстоны

САБИТÆН –  НОГБОНЫ  ЛÆВÆРТТÆ

 

Æрхæстæг та нæм Ног азы диссаджы бæрæгбон. Æрцыд та, стыр ныфсытæ кæмæй февæрæм æмæ бирæ хæрзтæ кæмæй фæкурæм, уыцы Ногбон.

Ацы бæрæгбонмæ зæрдиагæй йæхи бацæттæ кæны республикæйы разамынд дæр. Æппæтдæр саразынц, цæмæй адæмы, уæлдайдæр сабиты зæрдæты баззайа рæсугъд тæлмæнтæ.

Фыццаг хатт Дзæуджыхъæуы администраци Ногбонмæ расидт конкурс æртæ номинацийæ: Ногбоны хуыздæр фæлгонц кæнын коммерцион куыстуæтты, бирæфатерон хæдзæртты æмæ хисæрмагонд хæдзæртты бæстыхæйтты. Декабры фæстаг къуыри сæрмагонд къамис бахынцдзæн бæрæг-гæнæнтæ æмæ уæлахиздзаутæ хорзæхджын æрцæудзысты зынаргъ призтæй. Конкурсы нысан у Дзæуджыхъæуæн аивадон-эстетикон хуыз, адæмæн бæрæгбоны равг скæнын.

Администраци ма æрцæттæ кодта æвæрæз æмæ бирæсывæллонджын бинонты сабитæн лæвæрттæ æмæ бæрæгбоны мадзæлттæ “Елка мэра”, зæгъгæ, ахæм номимæ. Бæрæгбоны мадзæлттæ цæудзысты ирон æмæ уырыссаг театрты сценæтыл. Сывæллæттæй алчидæр лæвар райсдзæн администрацийы Сæргълæууæг Æлбегаты Барисы къухтæй.

Уымæй уæлдай, ногазон улæфтыты рæстæг мин скъоладзауæй фылдæр ба-бæрæг кæндзысты национ, историон, бæстæзонæн музейтæ. Фæсивæдæн сæрмагонд программæйы фæрцы уыдзæн скифаг-сæрмæтаг дугтæй баззайгæ æвæджиауы экспонаттимæ базонгæ уæвыны фатат.

Æмæ сæйрагдæр. Республикæйы разамынды тынг бафæндыд хæстæфхæрд Донецк æмæ Луганскы цæрæг сабиты барæвдауын. Уый тыххæй фæсидтысты цæрджытæм æмæ бирæтæ раздæхтой се ‘ргом баххуыс кæнынмæ. Ацы бонты 3500 комплекты, ногбоны лæвæрттимæ, æрвыст æрцыдысты Донбассы сывæллæттæн.

Цæгат Ирыстоны ахуырады министрады куыд фехъусын кодтой, афтæмæй 24 декабры республикæйæ Мæскуыйы Кремлы назбæласмæ ацыдысты 36 сывæллоны. Уыдон сты ахуырады хуыздæртæ, алыгъуызон олимпиадæты, фестивалты æмæ конкурсты уæлахиздзаутæ.

 

 

ИРОН ЧИНЫГÆН –  СÆРМАГОНД  ДУКАНИ

 

Бирæ азты дæргъы ирон мыхуыр уарзджытæ цæмæ бæллыдысты, уый сæ къухы бафтдыд: ацы бонты Дзæуджыхъæуы Дмитровы уынджы профцæдисты хæдзары фыццаг уæладзыджы байгом ирон чингуыты дукани.

Куыд зонæм, афтæмæй Сабырдзинады проспекты раздæр уыдис ирон чингуыты дукани, фæлæ цалдæр азы размæ æхгæд æрцыд. Уæдæй абонмæ ирон чингуытæ ракал-бакайлаг фесты. Паддзахадон мыхуырæн уæй кæныны фадат нал уыдис. Кæцыдæр дуканиты ма дзы уæй кæнынц, фæлæ сын бæлвырд бынат нæй. Ныр цалдæр азы рауагъдад “Ир” сæрдæй-зымæгæй йæ продукци уæй кæны уынджы.

Рауагъдад “Ир”-ы ног директор Таутиаты Хъазыбеджы къухы цалдæр мæймæ бафтыд бирæ хорз хъуыддæгтæ саразын. Ныр дæр Таутийы – фырт зæрдиагæй бацархайдта ацы хъуыддагыл æмæ Мыхуыры æмæ дзыллон коммуникациты комитет æмæ медиакъорд “Терские ведомости”-йы æххуысæй фæзынд ахæм культурæйы артдзæст. Дукани байгом кæнынæн стыр æххуыс бакодта республикæйы Сæргълæууæг Битарты Вячеслав дæр.

Ацы дуканийы сæ продукци уæй кæндзысты зындгонд рауагъдадтæ “Ир”, “Перо и кисть”, “Респект” æмæ медиакъорд “Терские ведомости”.  Дуканиты тæрхæджытæ ныридæгæн тасынц ирон дзырдаивады дæсныты уацмыстæй, историон, публицистикон, классикон литературæйæ ирон æмæ уырыссаг æвзæгтыл. Фæлæ дзы уæддæр сæрмагонд бынат ахсы ирон мыхуыр. Дуканийы ма ис мыхуыримæ баст бирæ алыхуызон товартæ æмæ ирон национ сувениртæ. Æппæт товарты æргътæ дæр сты иннæ дуканитæй асламдæр.

Дукани гом кæныны рæстæджы Мыхуыры æмæ дзыллон коммуникациты комитеты сæрдар Фидараты Юри куыд загъта, афтæмæй ма рæхджы ахæм дуканитæ фæзындзæн Сабырдзинады проспекты. Районты центрты та æвæрд æрцæудзæн, ирон чингуытæ кæм уæй кæндзысты, ахæм киосктæ.

Фидары – фырт бузныг загъта Таутиаты Хъазыбегæн йæ куыстмæ ахæм бæрнон ахасты тыххæй.

Нæ уацх.