Республикæйы æнтыстджынæй ацыд Æппæтуæрæсейон акци «Борьба с бедностью». Йæ нысан уыд хъæуты чи цæры, фæлæ фос дарын йæ къух кæй нæ амоны, уыдонæн баххуыс кæнын. Сæрмагондæй республикæйы бюджетæй кæй рахицæн кодтой, уыцы фæрæзтæй, тыхстдæр чи у, бирæ сывæллæттæ кæмæн ис, уыдонæн балхæдтой фæйнæ хъуджы. Уый у стыр ахадгæ æххуыс.
Ныр та 28 ноябрмæ, Мады дунеон бонмæ цæттæ кæнгæйæ, акци «Твори добро»-йы фæлгæтты, Æппæтуæрæсейаг адæмон фронт æмæ организаци «Бирæсывæллонджын бинонты иугонд»-ы активисттæ сæхимæ райстой æвæрæз, бирæсывæллонджын бинонтæн баххуыс кæныны хæс республикæйы æппæт районты дæр. Сæ фарсмæ балæууыд амалхъом æмæ меценат Юлия Серых æмæ райдыдтой сæ хæрзаудæн архайд. Ныридæгæн уал ссæдз бинонтæн балхæдтой хæдзары æнæмæнг чи хъæуы, ахæм техникæ, кæмæн холодильник, кæмæн æхсæн машинæтæ, газы плитæ, хъармгæнæн котел, иту, хæлцадон продукттæ… Уыцы куыст дарддæр цæуы.
Уымæй дарддæр, Æппæтуæрæсейон акци «Мы вместе»-йы фæлгæтты сæ тыхтæ æрбаиу кодтой æмæ æвæрæз бинонтæн се ‘ххуысы хай кæнынц республикæйы амалиуæгады æххуысы фонд æмæ зындгонд республикон фонд «Быть добру» дæр. Сæрмагондæй цы дукани байгом кодтой, уым æххуысхъуаг бинонтæн дзаумæттæ дæтдзысты лæвар.
Акцийы активисттæ куыд зæгъынц, афтæмæй алкæмæн дæр йæ бон у амынд дуканимæ дзаумæттæ радта. Куыд ног, афтæ хорз уавæры чи ис, ахæм дзаумæттæ æмæ хъазæнтæ дæр. Цыбыркъух бинонтæн лæвар дзаумæттæ кæм дæттдзысты, ахæм дуканийæн фыццагдæр бындур сæвæрдта зындгонд зарæггæнæг Чельдыты Вадим. Абон уыцы хъæппæрис адарддæр кодтой ацы активисттæ. Дукани ис Шмулевичы уынджы, 8-æм номыры.
ЗАВОДЫ ФÆЗУАТ – ФИДÆНЫ КУЫСТУÆТТÆН
Завод «Электроцинк»-ы хъысмæтыл бирæ загъд æмæ фыст æрцыд. Куыд зонæм, афтæмæй экологи кæй чъизи кодта æмæ адæм йæ ныхмæ кæй рацыдысты, уый тыххæй æхгæд æрцыд.
Бирæ тæрхоны фæстæ аскъуыддзаг ис заводы бæстыхæйттæ республикæйы исбонадмæ раттын закъоны бындурыл. Фæлæ завод уыд хицæн адæймæгты къухы æмæ йæ хъæуы балхæнын. Хæстæгдæр рæстæг аргъгонд æрцæудзæн йæ исбонадæн. Æлхæд æрцæудзæн, сфыстгонд исбонадæн цавæр аргъ скæнынц, уымæ гæсгæ.
Ныртæккæ заводы раздæры хицау – Уралы хæххон металлургон компани ласы куыстуаты хауæццæгтæ æндæр куыстуæттæм, цæмæй сæ ногæй бакусой, стæй йæ рекультиваци скæной. Æрмæстдæр ын афтæмæй уыдзæн уæйгæнæн. Хæстæгдæр рæстæг аргъгонд æрцæудзæн æппæт исбонадæн.
«Заводы фæзуат раздæр хъæуы балансыл сæвæрын. Спайда гæнæн дзы ис куыд промышленнон фæзуат. Цæрæн хæдзæрттæ æмæ дзы уылæфæн бынæттæ нæ уыдзæн. «Электроцинк»-ы хуызæн егъау промышленнон куыстуат нæм уа, уый æнæмæнг хъæугæ нæу ныртæккæ, фæлæ дзы гæнæн ис ног æндæр куыстуæттæ саразын, зæгъæм, индустрион парк, технопарк, завод… Гæнæн ис, фæзына нæм инвестортæ. Уыцы куыстуæттæ ратдзысты бирæ ваканситæ æмæ уымæй та республикæйы фæрныгадыл бафтдзæн», – загъта Цæгат Ирыстоны Сæргълæууæг Сергей Меняйло.
Нæ уацх.
Comments are closed, but trackbacks and pingbacks are open.