Редакцимæ фыстæг æрбарвыста Дзауы районы администрацийы культурæйы хайады хистæр Цхуырбаты Галинæ. Фыстæджы дзырдæуы, зæгъгæ, мæ уæ редакцийы фæрцы бузныг зæгъын фæнды РХИ-йы Культурæйы министрад, зынгæ ирон фыссæг Хъазиты Мелитон æмæ «Россотрудничество»-йы минæварадæн сæ лæмбынæг хъусдарды æмæ лæвæртты тыххæй.
«Абон библиотекæтæ цы сæйраг проблемæтыл æмбæлынц, уыдонæй иу у чингуыты фондтæ раздæрау кæй нæ уал ног кæнынц, уый. Уымæн та йæ аххосаг уый у æмæ ацы проблемæ аскъуыддзаг кæнынæн æмбæлон финанскæнынад кæй нæй. Æцæг кæд фæстаг рæстæджыты уавæр бæрæг фæхуыздæр, уæддæр регулярон æгъдауæй библиотекæты чингуыты фондтæ æххæст нал цæуынц. Раздæр, ома, Советон Цæдисы рæстæджы библиотекæтæ истой бирæнымæц чингуытæ, уымæн æмæ уæд уыд библиотекон коллектор æмæ Цæдисы цыдæриддæр чингуытæ мыхуыр цыдысты, уыдон истой куыд иннæ республикæтæ æмæ областтæ, афтæ хуссарирыстойнаг библиотекæтæ дæр. Фæлæ Цæдисы ныппырхимæ алцыдæр фæивта, библиотекон коллектор дæр нал уæвынад кæны æмæ афтæмæй библиотекæтæ чингуыты хъуагдзинад æййафынц Хуссар Ирыстоны дæр.
Фæлæ нæм уæддæр, уымæ æнæкæсгæйæ стыр хъусдард здæхт цæуы Культурæйы министрады ‘рдыгæй. Ацы министрад нæ районы библиотекæтæн сæйраджыдæр балхæны уырыссаг аивадон литературæ. Ирон литерату-рæйæ та нæ культурæйы министрад сифтонг кæны РХИ-йы мыхуыры хæдзар бадзырдмæ гæсгæ цы ирон чингуытæ ныммыхуыр кæны, уыдонæй. Афтæ ма нæ библиотекæтæн бирæнымæц чингуытæ балæвар кæны нæ республикæйы уæвæг «Россотрудничество»-йы минæварад æмæ сæ стыр бузныг стæм.
Стыр бузныг зæгъын ма мæ фæнды зынгæ курдиатджын фыссæг Хъазиты Мелитонæн. Ацы зæрдæхæлар адæймаг куыд нæ республикæйы горæты æмæ иннæ районты библиотекæтæн, афтæ Дзауы районы библиотекæтæн дæр ныр цалдæр хатты балæвар кодта йæ чингуытæ. Хæрзæрæджы дæр та уыд афтæ. Ома, нын балæвар кодта уырыссаг æвзагыл ын мыхуыры цы фондзтомон чиныг рацыд, уый, афтæ ма бирæ æндæр чингуытæ дæр. Фæстаг рæстæджы нæ районы чиныгкæсджыты нымæц бæрæг фæфылдæр, æмæ ацы чингуытæ кæй райстам, уый нын бирæбæрцæй фæрогдæр кæндзæн нæ къух. Æнæнизæй бирæ фæцæрæд æмæ нын йæ диссаджы хъæздыг сфæлдыстадæй рухс кæнæд нæ зæрдæтæ», – фыссы йæ фыстæджы Цхуырбаты Галинæ.
Йæ ныхæстæм гæсгæ ма Хъазиты Мелитонæй райгондæй баззад æмæ йын стыр бузныг зæгъы Дзауы районы администрацийы сæргълæууæг Джиоты Андрей дæр йæ фондзтомон чиныг кæй балвар кодта, уый тыххæй.
Джиоты Екатерина
Comments are closed, but trackbacks and pingbacks are open.