Нæ горæты кæд нæй, нæ экологийы нын чи чъизи кæнынц, ахæм куыстуæттæ, уæддæр нæ уынгты змæлынц бирæ машинæтæ æмæ сæ фæздæгæй уæлдæф чъизи кæнынц. Стæй ма бирæуæладзыгон æмæ сæрмагонд хæдзæртты цæрджытæй дæр алчидæр сæхицæн сарæзтой сæрмагонд хъармгæнæнтæ, уыдон хъылмайы тæф дæр уæлдæфы ныббады. Фæлæ уæддæр уæлдæфмæ цы хъылма цæуы, уый фылдæр у машинæтæй. Уыдон афтæ сбирæ сты æмæ уынгты дыууæрдыгæй лæууынц æмæ цæуынц хæлттæ-хæлттæй. Æмæ уый æрмæст централон уынгты нæ, фæлæ ма фæрсаг уынгтыл дæр. Бирæуæладзыгон хæдзæртты кæртытæ æхсæвæй-бонæй машинæтæ седзаг сты. Суанг ма сæ тротуартыл дæр сæвæрынц. Сæ машинæтæ æвæрынц подъездты тæккæ бацæуæныл. Хуыцау бахизæд, фæлæ зынгсирвæзт куы æрцæуа, уæд зынгхуыссынгæнæн машинæ кæм балæууа, уыцы бынат дзы нæ разындзæн. Иуæй-иу хатт нæ бирæуæладзыгон хæдзары цæрджытæй исчи тагъд æххуысы машинæмæ куы фæдзуры, уæд машинæ кæм бауромой, уый дæр дзы нæ вæййы. Машинæты хицæутты ныхас вæййы, ома, дам, сæ уæдæ кæм бауромæм. Æцæг иу хæдзары бинонтæн 4-5 машинæ куы уа, кæрт та – уынгæг, уæд æндæр цы гæнæн ис. Ис бирæтæн гаражтæ дæр, фæлæ сæ уырдæм бакæнынмæ зивæг фæкæнынц. Ацæргæ адæм æмæ сывæллæттæ подъездтæй æдæрсгæ нæ ахизынц, сæхи сыл скъуырынц. Диссаг у, мидхъуыддæгты органты кусджытæ кæдæм кæсынц? Зын фенæн у фадыгон инспекторæн уынджы кæнæ кæрты уыцы уавæр? Фадыгон инспектор, æппынкъаддæр, бон иу хатт уæддæр хъуамæ азила, фидаргонд кæдæм у, уыцы уынгмæ. Адæмимæ æмбæла æмæ сæ фæрса, цæуыл тыхсынц, цы фарстатæ сæм ис, уыдæттæй. Махæн нæ фадыгон инспектор чи у, уый зонгæ дæр нæ кæнæм. Ивгъуыд аз милицийы кусджытæн сæ мыздтыл схæцыдысты, уый махæй алкæмæн дæр æхсызгон уыд, æгайтма, сæ куыст зын у, тæссаг, фæлæ сæ куысты комкоммæ хæстæ цæмæннæ æххæст кæнынц?
Нæ горæты цæрæг, пенсионер
ЦХУЫРБАТЫ Лаврент
Comments are closed, but trackbacks and pingbacks are open.