Академион хыгъдон концерт

21-æм марты нæ горæты Тедеты Георгийы номыл 1-æм музыкалон скъолайы уагъд æрцыд академион хыгъдон концерт. Уырдæм æрбамбырд сты ацы скъолайы æмæ музыкалон ахуыргæнæндоны ахуыргæнджытæ, ахуыргæнинæгтæ, сæ ныййарджытæ. Мадзалмæ фæуазæг сты горæт Цхинвалы администрацийы культурæ, фæсивæд æмæ спорты управленийы минæвæрттæ Тасойты Игоры сæргълæудæй, Культурæйы министрады профессионалон ахуырад æмæ концертон архайды фæдыл специалист Наталья Жуйкова æмæ æндæр уазджытæ.

Концерты хайад райстой музыкалон скъолайы фортепиано, скрипкæ, аккордеон, вокалон æххæсткæнынады,  ирон фæндыр, духовон инструментты æмæ æндæр хайадты ахуыргæнинæгтæ. Амыдта йæ ацы скъолайы ахуыргæнæг, РХИ-йы сгуыхт ахуыргæнæг Котолиты Тамарæ.

Концерт байгом кодтой иумиагскъолайон хоры кæстæр кары хайадисджытæ. Уыдон хорз азарыдысты «Хонæм уæ нæ Ирмæ», «Хорошо рядом с мамой», «Лунная дорожка» æмæ «Мæ уарзон Ирыстон» сæ ахуыргæнæг Остъаты Олесяйы сæргълæудæй. Уый фæстæ сæ номыр хорз сæххæст кодтой Хуыгаты хотæ Евæ æмæ Мария (фортепианойы хайад). В.Шаинскийы музыкæмæ гæсгæ «Голубой вагон» пианинойыл тынг хорз ацагъта музыкалон скъолайы 2-æм къласы ахуыргæнинаг Цоциты Тамарæ. Ирон мелодитæ балалайкæйыл  цагъта Сиукъаты Виктория. Хорз азарыд 1-æм къласы ахуыргæнинаг Æлборты Ланæ. Хицæн номыртæ сæххæст кодтой Дзабиты Моникæ (фортепиано), 4-æм къласы ахуыргæнинаг Гæззаты Арсам (скрипкæ), Тедеты Анастасия, Дзукъаты Даянæ, Хаситы Линæ æмæ Дзæгъиаты Альбинæ, Тасойты Аланæ, Зассеты Иринæ, Бабаты Мария æмæ бирæ æндæртæ.

Иумиагæй ахуыргæнинæгтæ иууылдæр уыдысты хорз цæттæ. Ирдæй зыны уагдоны ахуыргæнджытæ сæ хъомылгæнинæгтимæ æвæллайгæ куыст кæй кæнынц æмæ сын сæ зонындзинæдтæ æнæвгъау кæй амонынц. Ахæм хыгъдон концерттæ сын свæййынц сæ куыстæн фæстиуджытæ саразыны хуызæн. Концертæй райгондæй баззадысты æмæ йын хорз аргъ скодтой Наталья Жуйкова æмæ Тасойты Игорь.

Сывæллæттæ æрæмбырдуæвджыты размæ  æдæппæт рахастой 40 номыры бæрц. Мадзалы кæрон музыкалон скъолайы директор, РХИ-йы адæмон ахуыргæнæг Тедеты Маринæ концерты хайадисæг сывæллæтты схорзæхджын кодта Кады грамотæтæй.

Нæ уацх.