Тедеты Георгийы номыл фыццæгæм музыкалон скъолайы традицион ссис æрвылаз дæр ахæм академион ногазон концерттæ дæттын. Скъолайы директор у аивæдты сгуыхт архайæг, адæмон ахуыргæнæг Тедеты Маринæ.

Хыгъдон концертмæ æрбамбырд сты ахуыргæнджытæ, ахуыргæнинæгтæ, сывæллæтты ныййарджытæ. Фæуазæг сæм сты Цхинвалы администрацийы культурæ, фæсивæд æмæ спорты управленийы минæвæрттæ Тасойты Игоры сæргълæудæй, Культурæйы министрады профессионалон ахуырад æмæ концертон архайды фæдыл специалист Наталья Жуйкова, Æлборты Феликсы номыл Цхинвалы музыкалон ахуыргæнæндоны директор Гæджиты Жанеттæ, афтæ ма æндæр уазджытæ дæр. Актон зал уыд бæрæгбонвæлыст.

Ногазон концерты хайад райстой музыкалон скъолайы фортепиано, скрипкæ, ак-кордеон, вокалон æххæсткæнынады, ирон фæндыр, духовон инструментты хайадты хъомылгæнинæгтæ. Мадзал амыдта скъолайы педагог, РХИ-йы сгуыхт ахуыргæнæг Котолиты Тамарæ. Фыццаг уал сценæмæ рахызтысты Цоциты хотæ — Аннæ æмæ Тамарæ æмæ сæххæст кодтой Виктор Калинниковы уацмыс «Киська».

Сывæллæттæ иууылдæр хорз цæттæ уыдысты, фæлæ уæддæр хуыздæрты ’хсæн алыхатт дæр вæййы ноджы хуыздæртæ. Уæлдай тынгдæр сценæмæкæсæджыты зæрдæмæ фæцыдысты Бибылты Мария (аккордеон), Сиукъаты Виктория (балалайкæйыл ацагъта ирон мелодитыл йæ фыд Анзоры фыст попурри) хотæ Наниты Вероникæ æмæ Мария (фортепиано), Дзукъаты Кристинæ (фортепиано), Хъотайты Марк (фортепиано), Яралов Александр (кларнет), Козаты Валерия (фортепиано), Сиукъаты Денис (труба) Плиты Аннæ, Джиоты Ланæ (фортепиано), Дзукъаты Даянæ (ирон фæндыр). Зарæг «Эй, ухнем» тынг хорз азарыд Хъотайты Фидар. Æвзонг лæппуйæн ис тынг рæсугъд æмæ тыхджын хъæлæс, æнхъæлмæ йæм кæсы хорз фидæн, йæ ахуыргæнæг у Сланты Ацæмæз. Номырты рæстæджы фæндырыл цагъта Плиты Мурат. Уый Санкт-Петербурджы музыкалон консерватори каст фæуыны фæстæ æрæздæхт йæ райгуырæн Цхинвалмæ æмæ кусын райдыдта, йæхæдæг кæм ахуыр кодта, уыцы музыкалон скъолайы. Сывæллæттæн амоны ирон фæндырыл цæгъдын.

Иумæйагæй ахæм курдиатджын кæстæртæ цы адæмæн, цы бæстæйæн ис, уымæн ис хорз фидæн. Алывæрсыг у сæ курдиат. Рæхсынц зарынмæ, алыгъуызон инструменттыл цæгъдынмæ æмæ афтæ дарддæр. Ирдæй зыны сæ ахуыргæнджыты æвæллайгæ куыст. Æмæ сын æрвылаз дæр, ахæм концерттæ свæййынц сæ куыстæн фæстиуджытæ саразыны хуызæн. Куыд æрвылаз, афтæ та ныр дæр скъолайы директор Тедеты Маринæ уагдоны хъомылгæнинæгтæн бакодта ногазон лæвæрттæ.

Уый куыд загъта, афтæмæй концерт уæрæхдæр хъуамæ уыдаид, фæлæ ахуыргæнджытæ æмæ сывæллæттæй бирæтæ фæрынчын сты гриппæй. Сывæллæттæ сæххæст кодтой 25 номыры.

Горæт Цхинвалы администрацийы культурæйы управленийы хистæр Тасойты Игорь загъта, зæгъгæ, Ирыстоны тынг бирæ курдиатджын сывæллæттæ ис.

Банысан кæнын хъæуы уый дæр, æмæ ацы скъолайы къæсæрæй кæй рахызтысты бирæ курдиатджын ахуыргæнинæгтæ, куыд зæгъæм, зындгонд композитортæ Хаханты Дудар, Гæбæраты Илья, Æлборты Феликс, Плиты Жаннæ, Хæбæлаты Зинаидæ, Харебаты Тимур, Плиты Мурат æмæ бирæ æндæртæ. Абон скъолайы кадджын традицитæ дарддæр кæнынц Те-деты Маринæ, Харебаты Додо, Харебаты Татьянæ, Дзадтиаты Иринæ æмæ Маринæ, Маркарян Лили, Тасойты Валентинæ, Æлборты Мананæ, Гæджиты Жаннеттæ, Цхуырбаты Зинаидæ, Гаглойты Маринæ, Зенашвили Ингæ, Куымæридтаты Тинæ, Козаты Гаянэ, Котолиты Тамарæ, Хъæцмæзты Лианæ, Коцты Лаурæ æмæ æндæртæ. Ахуыргæнджыты хорз куыстæн саргъ кодта республикæйы разамынад æмæ дзы бирæтæн лæвæрд æрцыд «РХИ-йы культурæйы сгуыхт архайæджы» кадджын нæмттæ.

1968 азы композитор Æлборты Феликс байгом кодта музыкалон ахуыргæнæндон, кæцыйы контингент уыдысты 1-æм музыкалон скъолайы ахуыргæнинæгтæ. 2014 азы сентябры скъолайæн лæвæрд æрцыд Советон Гуырдзыстоны адæмон артист Тедеты Георгийы ном. Зынгæ хормейстер æмæ хореограф бирæ азты дæргъы уыд музыкалон скъолайы директор.

Джиоты Екатеринæ