26-æм апрелы Тедеты Георгийы номыл фыццæгæм музыкалон скъолайы уагъд æрцыд гом академион концерт. Традицион ссис ацы скъолайы æрвылаз дæр ахæм концерттæ уадзын. Ацы скъола бирæ курдиатты схъомыл кодта, уагдоны къæсæрæй бирæ зынгæ адæй-мæгтæ рахызтысты. Æмæ дзы абон дæр ахуыр кæнынц курдиатджын ахуыргæнинæгтæ, фидæны стъалытæ, кæцытæн сæ зонындзинæдтæ рæдауæй амонынц уагдоны ахуыргæнджытæ сæ директор Тедеты Маринæйы сæргълæудæй.
Концертмæ æрбамбырд сты ацы скъолайы ахуыргæнджытæ, ахуыргæнинæгтæ, сывæллæтты ныййарджытæ æмæ æндæр уазджытæ. Мадзалмæ фæуазæг сты горæт Цхинвалы администрацийы минæвæрттæ Культурæ, фæсивæд æмæ спорты управленийы хистæр Тасойты Игоры сæргълæудæй.
Концерты хайад райстой музыкалон скъолайы фортепиано, хор, скрипкæ, аккордеон, вокалон æххæсткæнынады, домра, ирон фæндыр, духовон инструментты хайады хъомылгæнинæгтæ. Мадзал амыдта ацы скъолайы ахуыргæнæг, РХИ-йы сгуыхт ахуырæнæг Котолиты Тамарæ. Гом академион концерт байгом кодтой иумиагскъолайон кæстæр кълæсты хоры хайадисджытæ Остъаты Олесяйы къухдариуæгадæй, фортепианойыл цагъта Гобозты Оксанæ. Уыдон хорз сæххæст кодтой æртæ зарæджы – «Дети гор», «Старый добрый клавесин» æмæ «Мæ уарзон Ирыстон». Уый фæстæ æрæмбырдуæвджыты раз сæ арæхстдзинад равдыстой ацы скъолайы иннæ хайадты хъомылгæнинæгтæ. Залы хъуыстысты П.Чайковский, Л. Бетховен, Ф.Шуберт, Макъоты А. Гæздæнты Б. æмæ æндæр композиторты уацмыстæ.
Уæлдай тынгдæр сценæмæкæсджыты зæрдæмæ фæцыдысты Коцты Елизаветæ, Вакулич Мария, Джиоты Ланæ, Сиукъаты Денис, Джиголаты София, Тасойты Аланæ, Дзабиты Моникæ, Джиоты Анитæ, Тæтæрбиты Виктория æмæ æндæрты сæххæстгонд номыртæ. Сæ рæсугъд зардæй сценæмæкæсджыты сæхимæ æркæсын кодтой Гасситы Нинæ, Зассеты Максим, Къæбулты Янæ. Тынг хорз скрип-кæйыл ацагътой Джиголаты Мария, Мæргъиты Валерия æмæ Дыгъуызты Вероникæ. Хорз сæххæст кодта йæ номыр Плиты Аннæ дæр, фæндырыл цагъта Плиты Мурат. Банысан кæнын хъæуы уый дæр, æмæ Плиты Мурат кæй у ацы скъолайы раздæры хъомылгæнинаг. Уый Санкт-Петербурджы музыкалон консерватори каст фæуыны фæстæ æрыздæхт йæ райгуырæн Цхинвалмæ æмæ кусын райдыдта, йæхæдæг кæм ахуыр кодта, уыцы музыкалон скъолайы. Сывæллæттæн амоны ирон фæндырыл цæгъдын.
Уæлдай тынгдæр рахицæн кæнын хъæуы дунеон конкурс «Истоки»-йы 1 премийы лауреат æмæ бирæ æндæр конкурсты уæлахиздзау Зассеты Максимы, афтæ ма Къæбулты Янæ æмæ Гасситы Нинæйы. Ацы æвзонг курдиатджын адæймæгтæм æнхъæлмæ кæсы хорз фидæн. Къæбулты Янæ йæхиуыл куы куса, уæд фидæны суыдзæн иттæг хорз оперон зарæггæнæг. Уый тыххæй йын ис æппæт бæрæггæнæнтæ дæр. Чызг йæхæдæг куыд загъта, афтæмæй фæнд кæны йæ сомбон музыкалон аивадимæ сбæттын. Зассеты Максимæн та азæй-азмæ йæ хъæлæс кæны тыхджынæй тыхджындæр.
Ахæм кæстæртæ цы адæмæн, бæстæйæн ис, уымæн ис хорз фидæн. Курдиатджын сты ахуыргæинæгтæ. Ирдæй зыны сæ ахуыргæнджытæ, уагдоны директор, РХИ-йы сгуыхт ахуыргæнæг Тедеты Маринæйы сæргълæудæй семæ æвæллайгæ куыст кæй кæнынц, уый. Æмæ сын æрвылаз дæр, ахæм концерттæ свæййынц сæ куыстæн фæстиуджытæ саразыны хуызæн. Æгæрыстæмæй, сæ КОВИД дæр нæ бахъыгдардта.
Концерты фæдыл йæ хъуыдытæ загъта зынгæ зарæггæнæг, горæт Цхинвалы администрацийы Культурæ, фæсивæд æмæ спорты управленийы хистæр Тасойты Игорь. «Хорз концерт уыд. Ирдæй зыны ацы музыкалон скъола йæ хæстæ цæсгомджынæй кæй æххæст кæны, уый. Æхсызгон мын у, Ирыстоны ахæм курдиатджын сывæллæттæ кæй хъомыл кæны, уый дæр. Райгондæй баззадтæн концертæй», – банысан кодта уый.
ДЖИОТЫ Екатеринæ
Comments are closed, but trackbacks and pingbacks are open.