РХИ-йы Парламенты социалон политикæ æмæ æнæнниздзинад хъахъхъæныны фæдыл комитет ауагъта æмбырд. Сæрдариуæг ын кодта профилон комитеты сæргълæууæг Плиты Александр.
Уый боны фæткмæ рахаста Республикæ Хуссар Ирыстоны æмбæстæгтæн æнæаргъ медицинон æххуысы паддзахадон гарантиты прграммæ 2024 азæн. Ахæм программæ республикæйы æнæниздзинад хъахъхъæныны министрад райсы æрвылаз дæр.
«Программæйы нысан цæуы 2024 азы республикæйы æмбæстæгтæн æнæаргъ медицинон æххуыс бакæнын. Ахæм æххуыс кæнын фыст ис Хуссар Ирыстоны Конституцийы æмæ сæйраг базæйон закъоны дæр. Уым нысан сты ахæм медицинон лæггæдтæ кæнын, кæцыты хъуамæ исой æмбæстæгтæ, ис дзы низты номхыгъд, медицинæйон æххуысы хуызтæ æмæ формæтæ, лæггæдты астæуккаг нормативтæ, программæмæ домæнтæ æмæ афтæ дарддæр. Ис хъæуæг программæ æмæ алчидæр хæсджын у, цæмæй зона, цахæм медицинон æххуыс æмæ цахæм гуырахсты бакæндзæн паддзахад æххуыс йе ‘мбæстæгтæн», – загъта Плийы фырт.
Æруынаффæ кæныны фæстæ фарст рахастой парламенты президиуммæ.
Комитеты куысты хайад райстой депутаттæ Остъаты Роберт, Медойты Дзамбулат, Чысиаты Константин, Сланты Иван æмæ Дриаты Зазæ, афтæ ма æнæниздзинад хъахъхъæныны министры фыццаг хæдивæг Цоциты Аллæ, РХИ-йы Президенты æххæстбарджын минæвар парламенты Коцты Георги æмæ РХИ-йы хицауады æххæстбарджын минæвар парламенты Кокойты Зураб.
Æркастысты уырнонты куырдиатмæ
РХИ-йы Парламенты уыдис национ политикæ, культурæ, дин æмæ дзыллон информацийы фæрæзты фæдыл комитеты рабадт. Сæрдариуæг ын кодта комитеты сæргълæууæг Тадтаты Алан.
Йæ ныхæстæм гæсгæ комитетмæ куырдиат балæвæрдтой Цхинвалы Æртæиууон аргъуанмæ цæуæг уырнонтæ, цыран дзырдæуы, зæгъгæ, æрæджыйы онг уым рæстæгæй-рæстæгмæ уагъд цыдысты бакуывдтытæ, фæлæ сæ ныр цалдæр къуырийы нал уадзынц.
«Æртæиууон аргъуаны уырнонтæ сты куыд Хуссар Ирыстоны æмбæстæгтæ, уыдоны нымæцы парламенты депутатты иу хай, афтæ Уæрæсейы 4-æм æфсæддон базæйы æфсæддон службæгæнджытæ дæр. Куырдиаты нысан цæуы, зæгъгæ, бакуывдтытæ уагъд кæй нæ цæуынц, уый зындзинæдтæ æвзæрын кæны, уымæн æмæ уыдон иппæрд цæуынц сæ удварны хæрзиуджытæй, Уæрæсейы территоримæ та улæфтбонтæ æмæ бæрæгбонты цæуын баст у хæрдзтимæ. Уымæ гæсгæ курæг сты, цæмæй сын баххуыс кæнæм æмæ аргъуаны бакуывдтытæ ногæй райдайой», – банысан кодта Тадтайы фырт.
Дарддæр фарстыл уынаффæ кодтой æнæ дзыллон информацийы фæрæзты минæвæртты хайадистæй.
Комитеты куысты хайад райстой депутаттæ Хуыбылты Илья, Бибылты Ацæмæз, Диакъонты Амиран, Остъаты Роберт, Медойты Дзамбулат æмæ аргъуаны сæйраг службæгæнæг фыд Серги.
