Горæт Дзæуджыхъæуы кусæгон фембæлд уыд Хуссар Ирыстон æмæ Цæгат Ирыстон-Аланийы республикæты мидхъуыддæгты министрадты делегацитæн. Дыууæфарсон комитеты рабадты хайад райстой РХИ-йы мидхъуыддæгты министр милицийы инæлар-майор Гуыцмæзты Алан, РЦИ-Аланийы мидхъуыддæгты министр полицийы инæлар-лейтенант Андрей Сергеев, сæ хæдивджытæ, сæйраг службæты æмæ управлениты хистæртæ æмæ ма Иумæйаг информацион-координацион центры директор Василий Шепелев.
Æмбырд йæ раныхасæй æрбайгом кодта Андрей Сергеев, кæцы банысан кодта, зæгъгæ ахæм мадзалæн ис егъау нысаниуæг æмæ арæзт та цæуы адæмы хæрзиуæгæн.
«Кæд æмæ æфсымæрон адæмы абоны бон дих кæны паддзахадон арæн, уæддæр барадхъахъхъæнæг органты тыхтæ нысанмæздæхт сты дыууæ республикæйы цæрджыты бангом кæнынмæ. Нæ профессионалон архайдимæ баст у адæмы æдасдзинад, æхсæнады фæткæвæрд», – загъта Андрей Сергеев.
Гуыцмæзты Алан дæр раарфæ кодта фембæлды æппæт хайадисджытæн æмæ банысан кодта, дыууæ республикæйы къухдариуæгад дæр æппынæдзух кæй архайы цæрджыты æдасдзинад бахъахъхъæныныл.
«Махæн сæйраг у фæткхалæн цаутæ ма æруадзын, профилактикон куыст кæнын. Ӕмæ дыууæ министрады æнгом куыст куы кæной, уæд не нтыстытæ дзæвгар фылдæр уыдзысты. Нæ профессионалон архайд æнæмæнг ахъаз уыдзæнис регионы стабилондзинадæн», – зæгъы Гуыцмæзты Алан.
Рабадты æрдзырдтой барадхъахъхъæнæг органты приоритетондæр къабæзтыл, бæрндзинадæй йæхи чи æмбæхсы, уыцы гоймæгты æрцахсыны мадзæлттыл, æнæзакъонæй æхсæнгарз чи парахат кæны, уыцы фыдгæнджыты бæрндзинадмæ æркæныныл. Уымæй уæлдай ма рæгъмæ рахастой наркотикты буарадтæ парахат кæныны проблемæ æмæ æркастысты ахæм мадзæлттæм, кæцытæ фæахъаз уыдзысты наркотиктæ парахатгæнджыты æрцахсынæн.
Дыууæ ‘фсымæрон республикæты актуалон у фæндагон æдасдзинад æмæ ведомствоты минæвæрттæ бадзырдтой, цæмæй сæ æмархайдæн ноджы хуыздæр координаци уа, автотранспортæн саразой иумæйаг информацион ресурс, автомашинæты хицæутты фæдыл информаци та оперативонæй дæттой кæрæдзимæ. Ахæм мадзæлттæ райсыны фæстиуæгæн хъуамæ бæрæг фæкъаддæр уой фæндагон фæткойтæ фехалыны цаутæ, рæстæгыл уромой фæткхалджыты æмæ сæ бæрндзинадмæ кæной.
Ӕмбырды хайадисджытæ æрцыдысты ахæм хъуыдымæ, зæгъгæ барадхъахъхъæнæг органтæ нырæй фæстæмæ æргомæй æмæ æнгомæй куы хæссой службæ, уæд дыууæ республикæйы æдасдзинад æмæ фæткæвæрд уыдзæнис бæрзонддæр æмвæзадыл.
Кæронбæттæны хуссарирыстойнаг делегацийы минæвæрттæ хорзæхджын æрцыдысты ве-домствойон хорзæхтæй æмæ зæрдылдарæн лæвæрттæй. Уый фæстæ Мемориалон комплексы Кады Аллеяйы фæмардуæвæг мидхъуыддæгты органты кусджыты номыл зæрдылдарæн стеллæйы раз сæвæрдтой дидинтæ. Экскурсийы ма сæ акодтой Мидхъуыддæгты министрады историон музеймæ æмæ базонгæ сты уникалон экспонаттимæ.
Кусæгон фембæлды фæстæ делегациты уæнгтæ ацыдысты Ӕппæтадæмон спортивон хъæз-тытæ «Боевое содружество»-мæ бакæсынмæ, кæцыйы хайад райстой дыууæ республикæйы мидхъуыддæгты министрадты командæтæ. Спортивон ерыстæм ма фæуазæг сты РЦИ-Аланийы сæргълæууæджы администрацийы къухдариуæггæнæг Гобеты Ибрагим, сæ хицауады бæрнон кусджытæ, РЦИ-Аланийы тыхон структурæты минæвæрттæ, æхсæнады æмæ ветеранты минвæрæттæ. Ерыстæ уагъд цыдысты спортивон æхсæнад «Динамо»-йы сæрмагонд æмæ физикон цæттæдзинады центры базæйы.
Андрей Сергеев йæ раныхасы спортсментæн загъта: «Спортивон хъæзтытæ «Боевое содружество» у дыууæ ведомствойы, дыууæ республикæйы хæлардзинады символ. Фидарæй мæ уырны, ацы ерыстæ кæй фæахъаз уыдзысты не ‘нгомдзинадæн».
Гуыцмæзты Аланы дæр ерысты хайадисджытæн бафæндыд, цæмæй аккагдæртæ суой уæлахиздзаутæ æмæ иннæтæ та тырной сæ арæхстдзинад фæбæрзонддæр кæнынмæ. «Цахæмфæнды спортивон æнтыст дæр рæзы егъау бахардзгонд тых, дзæвгар тренировкæтæ. Мидхъуыддæгты органты кусæг иннæтæй фыццаджыдæр хицæн кæны йæ физикон цæттæдзинадæй – йæ арæхстдзинадимæ баст у адæмы æдасдзинад. Мæнмæ гæсгæ, ацы ерысты сæйраг у æфсымæрдзинад æмæ мæ фæнды, цæмæй уыцы сыгъдæг дзырд спортсментæ кæронмæ æмбарой, хæссой йæ алыхатт дæр сæ зæрдæмæ ввахс».
Ерыстæ олимпион хъæзтытау райдыдтой арт ссудзынæй. Уыцы кадджын бар лæвæрд æрцыд уæгъдибар хъæбысхæсты Олимпион чемпион Рамонты Сосланæн æмæ пауэрлифтингæй Дунейы кубокы уæлахиздзау, европæйы дыууæхатты чемпион Икъаты Сæрмæтæн.
Стадионы уыцы иу рæстæджы райдыдтой ерыстæ алы спорты хуызтæй – мини-футболæй, рог атлетикæйæ, уæззау атлетикæйæ æмæ афтæ дарддæр. Мадзалмæ æрбацæуджытæ стыр цымыдисимæ кастысты спортсменты арæхстдзинадмæ – турникыл хи исынæй, алыгъуызон эстафетатæм, гиритæ исынæй æмæ æндæртæм.
Мини-футболæй уæлахиздзау нæ рабæрæг – хъазт фæцис 3:3 хыгъдæй. Фæлæ рог атлетикæйæ хуссарирыстойнаг минæвæрттæн æмбал нæ уыд – рамбылдтой алкæцыйы дæр – «эстафета 4 по 400м», «эстафета 4 по 200м с боекомплектом», «спринтерский бег 6 по 100м», «кросс 1 км в бронежилетах, касках и с автоматом». Уымæй уæлдай ма, сæрмагонд дæл-хæйтты хсæн ерысты дæр бацахстой фыццаг бынæттæ.
Цæгатирыстойнаг спортсментæ дæр фæстæ нæ фæлæууыдысты – рамбылдтой гиритæ исынæй, турникыл хи исынæй æмæ бæндæн ивазынæй.
Стадион «Динамо»-йы ма сæ арæхстдзинад равдыстой Цæгат Ирыстоны мидхъуыддæгты министрады наркотикты æрзылды контроль кæныны сæрмагонд дæлхай «Гром». Уыдон адæмы рæгъмæ рахастой ахæм номыртæ, куыд згъæрварс техникæйæ рагæпп кæнын, æмбуар хæстæй арæхстдзинад, бæстыхай штурмæй исын, амынæт ссæрибар кæнын æмæ афтæ дарддæр. Кинологтæ дæр сæ куыйтимæ равдыстой, фыдгæнджыты куыд фæахсынц, æхсæнгарз æмæ рæмудзæн æрмæджытæ куыд фæагурынц, уыдæттæ.
Ерыстæ ма барæсугъд кодтой РЦИ-Аланийы артисттæ æмæ сфæлдыстадон коллективтæ. Зарджытæ дзы сæххæст кодта РХИ-йы сгуыхт артист Бекъойты Вано дæр. Фарон Уæрæсейы мидхъуыддæгты системæйы фадыгон инспектортыл 100 азы кæй сæххæст, уый фæдыл Цæгат Ирыстоны мидхъуыддæгты министры бардзырдмæ гæсгæ арæзт æрцыд фадыгон инспекторты хор. Ацы ног хор дæр сæххæст кодта цалдæр зарæджы.
Уæлахиздзаутæ æмæ призертæ хорзæхджын æрцыдысты майдантæй, дипломтæй æмæ призтæй. Кæронбæттæны систой коллективон къам.
ДЖИОТЫ Алыксандр
