Æрæджы нæ республикæйы эксплуатацимæ лæвæд кæй æрцыд аппаратон-программон комплекс «Æдас горæт», уый фæдыл Мидхъуыддæгты министрады къухдариуæгадæн уыд æмбырд, цæмæй йын сбæлвырд кæной йæ эффективондзинад æмæ хъæндзинæдтæ. Æмбырдмæ ма хуынд æрцыдысты Юстицийы министр Гаглойты Олег, тæрхондоны сæйраг пъырыстыф Дзæгъиаты Вадим æмæ тæрхондоны районты ‘хсæн дæлхæйтты хистæр пъырыстыф Кокойты Павел.
Сæйраджыдæр, æмбырды æрдзырдтой комплекс «Æдас горæт»-ы эксплуатацийы проблемон фарстатыл. Банысан кодтой, иварты суммæтæ хæрзцъус кæй сты, уый фæстиуæгæн шофыртæ кæй нæ тæрсынц æфхæрдæй, ныры онг фæндагон фæткойтæ чи хæлдта, уыдон сæ дарддæр дæр халынц æмæ, иумийагæй сисгæйæ, фæткхалæн цауты нымæц кæй нæ къаддæр кæны. Уымæй уæлдай ма, административон суагъæ фæтхалæгмæ фæхæццæ кæныны процессыл хардз цы фæрæзтæ æрцæуы, уый бæрæг фылдæр вæййы иварæй. Уымæ гæсгæ æрцыдысты ахæм хъуыдымæ, цæмæй фæндон бахæссой æмæ иварты суммæтæ фæфылдæр кæной.
Проблемон фарстыл ма нымад у фæсарæйнаг автотранспорт дæр, кæцытæ ныридæгæн дзæвгар сты нæ республикæйы территорийыл. Фæндагон змæлды æдасдзинады управленийы хистæры хæдивæг Ходты Сергей куыд æмбарын кæны, афтæмæй æндæрбæстаг автотранспорты шофыр фæндагон фæткойтæ куы фехалы æмæ йыл инспектор административон суагъæ куы саразы, уæд ын йæ ивар бафидын кæнын нæ бон нæу – уымæн æмæ фæткхалæг нæ цæры нæ республикæйы территорийыл.
Дыууæ ведомствойы минæвæрттæ дæр сразы сты, ома, æмбæлон службæтæн кæрæдзийы ‘хсæн æмархайд æмæ хъæугæ информаци дæттын у иууыл сæйрагдæр ныры уавæры. Цæмæй куысты оперативондзинад æмæ эффективондзинад фæбæрзонддæр уа, уый тыххæй хъæуы саразын æвдисæнты иугонд базæ Фæндагон змæлды æдасдзинады æмæ паспортон-визæйон службæйы управленитæн, тæрхондоны службæйы пъырыстыфтæн æмæ националон банкæн. Бадзырдтой ма, цæмæй ма æввахс рæстæджы ноджы фембæлой ахæм форматы æмæ бæстондæр æрдзурой фæнысангонд пробемæтыл.
ДЖИОТЫ Алыксандр
Comments are closed, but trackbacks and pingbacks are open.