АЗЫЛДЫСТЫ ИНВЕСТПРОГРАММÆЙЫ ФÆЛГÆТТЫ АРÆЗТЦÆУÆГ ОБЪЕКТТЫЛ
12 сентябры Хуссар Ирыстонмæ кусæгон визитимæ æрцыдис Уæрæсейы Федерацийы экономикон рæзты министрады делегаци министры хæдивæг Дмитри Вольвачы сæргълæудæй.
Уæрæсейаг делегаци, семæ РХИ-йы хицауады сæрдар Джуссойты Константин æмæ æндæр официалон адæймæгтæ, афтæмæй азылдысты Республикæ Хуссар Ирыстоны социалон-экономикон рæзтæн ахъазгæнæг Инвестицион программæйы фæрæзтæй арæзт чи цæуынц, уыцы объекттыл.
Райдианы уал уыдон бацыдысты 150 сывæллонæн Дзауы районы Мзиугомы цы лагерь арæзт цæуы, уырдæм æмæ базонгæ сты, куыстытæ куыд цæуынц, уыимæ.
Подрядон организаци гом акционерон æхсæнад «Бадо»-йы генералон директор Уалыты Владислав куыд радзырдта, афтæмæй объект арæзт цæуы графикмæ гæсгæ. Цыппар сæйраг корпусы фесты агъуысты бын, мидæгæй та æххæст кæнынц инженерон æмæ бæстонгæнæн куыстытæ, бындур æвæрд цæуы амфитеатрæн, кæронмæ арæзт фæуд кæнынц административон бæстыхай æмæ донсыгъдæггæнæн ифтонгадтæ. Азылды рæстæджы ам куыстой 40 кусæджы æмæ техникæйы 8 иуæджы.
Дарддæр уазджытæ бацыдысты Медико-социалон центрмæ, кæцыйы мидæг ис паллиативон хайад. Ацы объект сырæзт 2015-2017 азтæн Инвестпрограммæйы фæлгæтты. Уазджытæ хицауады сæрдаримæ дзырдтой центр цас йедзаг у æххуысхъуаг адæймæгтæй, уыцы фарстыл æмæ бæстыхайы иу хай республикæйы æнæниздзинад хъахъхъæныны æндæр нысæнттæн радтыны фадатыл.
Уæрæсейаг хицауадон делегацийы уæнгтæ бабæрæг кодтой Дзауы районон рынчындоны дæр. Уым ма базонгæ сты поликлиникæ æмæ стоционары куысты фæткимæ, медицинон лæггæдты хуызтимæ. Афтæ ма уыдысты 2-аг гвардион скъолайы æмæ дзы азылдысты. Бæстыхайæн йæ зæронд хай у реконструкцикæнинаг.
РХИ-йы ПРЕЗИДЕНТ ГАГЛОЙТЫ АЛАНЫ ФЕМБÆЛД ДМИТРИ ВОЛЬВАЧИМÆ
Уыцы бон уæрæсейаг делегацийы Дмитри Вольвачы сæргълæудæй йæхимæ райста РХИ-йы Президент Гаглойты Алан. Уазджытæн арфæ ракæнгæйæ, сæргълæууæг банысан кодта, зæгъгæ, Хуссар Ирыстоны кæдæриддæр райгонд сты стратегион партнер – Уæрæсейы Федерациимæ æмгуысткæнынадæй. Дарддæр уынаффæ цыдис Хуссар Ирыстон æмæ Уæрæсейы ‘хсæн социалон-экономикон æмгуысткæнынады фарстатыл.
Хорз сæ кæй райста, уый тыххæй президентæн бузныг зæгъгæйæ, Дмитри Вольвач банысан кодта, зæгъгæ, Уæрæсейы Федерацийы æххуысæй Хуссар Ирыстон рахызт экономикæйы æнтысгæ рæзтмæ. «Афæдзы фыццаг æмбисы экономикæйы рæзт фæфылдæр 20 проценты – уый æвзæр фæстиуæг нæу, куы ма бахынцай, дыууæ бæстæйы ‘хсæн товарæрзылд уыйбæрц кæй фæфылдæр», – загъта уый.
Вольвач ахсджиагыл банымадта, республикæйы уавæртæ арæзт кæй цæуы инвестицитæн.
«Цæмæй экспорт æмæ импорт дыууæрдæм ласын æнцондæр æмæ эффективондæрæй цæуа, уый тыххæй таможнæйы къабазы хъæуы гармонизаци кæнын», – загъта Дмитри Вольвач æмæ зæрдыл æрлæууын кодта, æрæджы къухтæ кæй æрфыстæуыд 2022-2025 азтæн Республикæ Хуссар Ирыстоны социалон-экономикон рæзтæн ахъазгæнæг паддзахадон программæйы реализацийæн ахъаз кæныны тыххæй æхсæнпаддзахадон сразыдзинадыл.
«Куыддæр сцæттæ уа нормативон-барадон базæ, афтæ мах æрæвналдзыстæм инвестицион проектты ног пакет цæттæ кæнынмæ, цыран спайдагæнæн уыдзæн уæрæсейаг æххуысæй», – банысан кодта уый.
Куыд загъта, афтæмæй программæмæ гæсгæ куыстмыздтæ фæфылдæр кæнынæй дарддæр план цæуы инфраструктурæйы рæзт, кæцы фадат ратдзæн инвестортæн республикæйы химæлвасдæр, цымыдисондæр скæнын æмæ уымæй Хуссар Ирыстоны экономикæйы рæзт ифтонг кæнын.
Уымæй дарддæр ма делегацийы сæргълæууæг фехъусын кодта уæрæсейаг егъау бангтимæ бадзырдтыты тыххæй, кæцытæ цæттæ сты инвестортимæ æмгуыст кæнынадмæ.
«Мах æрмæст экономикон партнертæ не стæм, фæлæ ма стæм стратегион партнертæ дæр, уымæ гæсгæ нын ахсджиаг у, цæмæй Хуссар Ирыстоны экономикæ рæза, хи æфтиæгтæ фылдæр кæнгæйæ. Мах цæттæ стæм æрмæст инвестицитæй æххуыс кæнынмæ нæ, фæлæ уæм хуыздæр практикты æрвитынмæ дæр, кæцытæ сты Уæрæсейы», – загъта Дмитри Вольвач.
Йæхи ‘рдыгæй Гаглойты Алан банысан кодта, зæгъгæ, Уæрæсеимæ æмгуысткæнынад хорзæрдæм æндавы республикæйы адæмы цардыл.
«Уæрæсейы экономикон рæзты министр Максим Решетниковимæ мæ фембæлды рæстæджы уынаффæ цыдис 2022-2025 азтæн Хуссар Ирыстоны социалон-экономикон рæзты программæйыл. Хорз уаид абон дæр куы æруынаффæ кæниккам, программæйы кæронмæ бакусын кæуыл хъæуы, уыцы пункттыл. Ныфс мæ ис уæ æмархайдæй», – загъта Гаглойты Алан.
Уый ма банысан кодта, зæгъгæ, республикæйы лæмбынæг сæ хъус дарынц, Донбассы сæрмагонд хæстон операци куыд цæуы, уымæ æмæ ситуаци кæд вазыгджын у, уæддæр уымæ нæ кæсгæйæ, Хуссар Ирыстон кæддæриддæр уыдзæн Уæрæсеимæ æмæ Донбассы республикæтимæ «Уый иумæйаг бæрндзинад у æмæ нæ иумæйаг фидæн. Украинæйы ‘рдыгæй фашизмы фæзынды ныхмæ хæсджын стæм иумæ æрлæууæм», – загъта паддзхахады сæргълæууæг.
ÆМБЫРД УÆРÆСЕ ÆМÆ ХУССАР ИРЫСТОНЫ ‘ХСÆН ÆМГУЫСТАДЫ ФАРСТАТЫ ФÆДЫЛ
РХИ-йы хицауады сæрдар Джуссойты Константин æмæ уæрæсейаг хицауадон делегаци, йæ сæргъ Дмитри Вольвач афтæмæй хайад кæм истой, уыцы æмбырды боны фæткмæ хаст æрцыдысты 2022 азы 23 июны æхсæнхицауадон къамисæн рабадты уынаффæтæм хауæг фарстытæ.
Джуссойты Константин ноджыдæр раарфæ кодта уызджытæн æмæ ныфс бавæрдта конструктивон æмгуысткæнынадæй.
«Фыццаг рады мæ бузныг зæгъын фæнды Уæрæсейы Федерацийы разамынадæн, æппæт нæ уæрæсейаг коллегæтæн Республикæ Хуссар Ирыстоны социалон-экономикон рæзты фарстаты æппæтфарсон æмархайды æмæ æдзухон барадон æмæ методикон æххуысы тыххæй. Ныфс мæ ис, иумæйаг архайдтыты руаджы нæ къухты кæй бафтдзысты нæ нысæнттæ», – банысан кодта хицауады сæрдар.
«Сæйраг у, мах сымахæрдыгæй кæй æнкъарæм стыр фæндондзинад æппæт сæвæргæ хæстыл кусыны. Кæд компромистæ уайтагъд нæ къухты нæ бафтой, уæддæр мах аргъ кæнæм æмгуыстадмæ цæттæдзинадæн», – загъта Дмитри Вольвач.
Æмбырды хайадисджытæ æруынаффæ кодтой 2022 азæн Республикæ Хуссар Ирыстоны социалон-экономикон рæзтæн ахъазгæнæг Инвестицион программæ реализаци кæныны æмæ 2023-2025 азтæн ног программæ аразыны фарстатыл.
Уымæй дарддæр ма дзырд цыдис Республикæ Хуссар Ирыстоны паддзахадон разамынды органты кусджыты куыстмыздтæ фæфылдæр кæнын, Республикæ Хуссар Ирыстоны таможнæйон æмæ хъалонты закъондæттынады Уæрæсейы Федерацийы закъондæттынадимæ гармонизацийы фарстатыл, афтæ ма æндæр фарстатыл дæр.
Æрмæг бацæттæ кодта
БИАЗЫРТЫ Роланд
Comments are closed, but trackbacks and pingbacks are open.