Хуссар Ирыстоны Уæлвæткон уавæртæ æмæ стихион æнамонддзинæдтæ аиуварс кæныны фæдыл министрады минæвæрттæ, министр Цоциты Азæмæты сæргълæудæй, хайад райстой дунеон салон «Комплексная безопасность-2021»-ы куысты. Уый у уæрæсейаг егъау равдыстон проект, цыран æвдыст цæуынц æдасдзинад ифтонг кæныны фадыджы нырыккон техникон æмæ æндæр æнтыстытæ.
Уæрæсейы Федерацийы Уæлвæткон уавæрты министр Евгений Зиничев ныфс бавæрдта, ацы проект кæй фæахъаз уыдзæн ног фадæттæ байгом кæнынæн адæймаджы цардархайды æдасдзинад ифтонг кæнын æмæ территоритæ уæлвæткон уавæрты бахъахъхъæныны рæстæджы. Уымæй дарддæр дунеон салон йæ хайадисджытæн фадат ратдзæн банысангонд плæнттæ реализаци кæнынæн. Егъау хъуыддагон программæйы фæлгæтты ма уынаффæ цыд бæстæйы территори æмæ цæрджыты æдасдзинады ифтонгады иууыл актуалон æмæ проблемондæр фарстатыл.
Ацы аз салоны сæйраг фæзуат уыд Мæскуыйы областы горæт Кубинкæйы экспоцентр «Патриот»-ы, цыран æвдыст цыдысты нырыккон техникæ æмæ ифтонггæрзты хуызтæ.
Хуссарирыстойнаг делегацийы сконды Цоциты Азæмæтæй дарддæр уыдысты йæ хæдивæг Санахъоты Руслан, Зынгсирвæзты ныхмæ тох æмæ ирвæзынгæнæн отряды къухдариуæггæнæг Чехойты Алан.
Нæ делегаци фембæлд Уæрæсейы Уæлвæткон уавæрты министры хæдивæг Илья Денисовимæ, цыран дзырд цыд министрады кусджыты куыстмыздтæ фæфылдæр кæнын, пенсион ифтонгад организаци кæнын æмæ министрадæн æндæр гарантиты фæдыл. Сæйраг хъусдард здæхт æрцыд материалон-техникон ифтонгады фарстмæ.
Уымæй дарддæр ма уæрæсейаг коллегæтимæ дзырд цыд министрады зынгсирвæзты ныхмæ тохгæнджытæ æмæ ирвæзынгæнджыты профессионалон квалификаци фæбæрзонддæр кæныныл Уæрæсейы Уæлвæткон уавæрты ми-нистрады ахуырадон центрты базæты бындурыл.
Хуссар Ирыстоны делегаци хайад райста хъуыддагон программæйы мадзæлтты, уагъд æрцыд æмбырдтæ æмбæстагон хъахъхъæнынад фæхуыздæр кæнын, цæрджытæн уæлвæткон уавæрты рæстæгыл информаци дæттыны фарстытыл. Дискуссион сесситы фæлгæтты уынаффæ цыд зынгсирвæзты ныхмæ тох кæныны техникон фæрæзтæ сног кæныны фадæттыл. Хъуыддагон программæйæ дарддæр ма салоны фæзуатыл уагъд æрцыд сæрмагонд ифтонггæрзты эксперттæ æмæ аразджытæ, зынгсирвæзты ныхмæ тохгæнджытæ, ирвæзынгæнджытæ, пиротехниктæ, хæххон уавæрты ирвæзынгæнджытæ, дæлдондзогтимæ фембæлдтытæ.
Ацы дунеон форумы хайад райсыны фæдыл нын Уæлвæткон уавæрты министр Цоциты Азæмæт куыд радзырдта, афтæмæй дзы хайад райстой 60 бæстæйы бæрц, уыцы нымæцы постсоветон æмæ африкæйаг бæстæтæ дæр.
Равдысты фæдыл министр дзырдта, зæгъгæ, уым уыд ахæм техникæ, кæцытæ мах нæ хъæуынц, ахадæн не сты нæ бæстæйы географион уавæрты.
Министрады техникон ифтонгады фæдыл Цоциты Азæмæт райгондæй банысан кодта, зæгъгæ, нæ тыхсæм, ис нæм хъæуæг техникæ æмæ сты куыстифтонг. Районы хайадты дæр нæй рахъастгæнæн уыцы хъуыддаджы.
«Министрад хъæуæг специалисттæй ифтонг у. Нырттæккæ дæр нын Мæскуыйы академиты ахуыр кæны 15 студенты. Ацы аз нæм æртæ цæттæ специалисты æрыздæхдзысты ахуырæй. Дыууæ – Æмбæстагон зынгсирвæзты ныхмæ тохы академи æмæ иннæ та – Æмбæстагон хъахъхъæнынады академийæ. Уыдон ифтонг æрцæудзысты куыстæй.
Специалисттæй ифтонгадыл дзырд куы цæуа, уæд нæм ис æртæ дæлдондзоджы. Уыдонæн ис 8 категорийы къласы дунеон бæлвырдгæнæнтæ. Уый у иууыл бæрзонддæр кълас. Ис нæм цæттæ специалисттæ – сапертæ, альпинисттæ. Уыдон ахуыр кодтой Уæрæсейы территорийыл».
Центр «Лидер»
«Ацы центры куыст ахадæн уыд нæ бæстæйы территорийыл. Ныр дæр хорз уаид, куы та нæм фæдариккой се ‘ххуысы къух. Уый тыххæй ноджыдæр зæрдыл лæууын кæндзыстæм, цæмæй хæсты фæстæ баззайгæ хæлæн æмæ тæссаг æрмæджытæй æдас æрцæуой бæрæг бынæттæ.
Уæлдай тæссаг ирвæзынгæнæн операцитæ уадзыны фæдыл центры сапертæ цыппар азы дæргъы сæдас кодтой нæ республикæйы территори хæлæн æмæ рæмудзæн æрмæджытæй. Фæлæ ацы æнæхайыры пандеми фæкъуылымпы кодта ацы фадыджы куыст».
Министры ныхæстæм гæсгæ, нæ республикæйы нырма ис сыгъдæггæнинаг бынæттæ, кæцытæ æнтыстджынæй, сæрмагонд техникæйы руаджы бæстон цæуиккой. Уый тыххæй æмбæлон фыстæг æрвыст æрцыд ивгъуыд аз фæззæджы Уæрæсейы хицауадмæ æмæ æнхъæл-мæ кæсынц бæрæг дзуаппмæ.
Цоциты Азæмæт ма нын куыд радзырдта, уымæ гæсгæ Мæскуымæ балцы рæстæджы уый фембæлд центры къухдариуæггæнæг Анатоли Саввинимæ. Уый фæнды, цæмæй ацы куыст адарддæр уа.
КЪÆБУЛТЫ Маринæ
Comments are closed, but trackbacks and pingbacks are open.