Юстицийы министрады кусджытæ 1-æм майы, сæ улæфтбоны ацыдысты Цхинвалы районы Тъбеты хъæуы Алардыйы кувæндонмæ, цæмæй йæ бафснайой. Кувæндоны алфамбылай бафснайыны хъуыды æрцыд министр Джиоты Аланмæ.
Министр куыд зæгъы, афтæмæй уыдон сфæнд кодтой Ирыстоны кувæндæттæй искæцыйы æфснайыны хæс сæхимæ райсын. Ахæм фæлтæрддзинад ис æндæр министрадтæм дæр. Хъахъхъæнынады, Мидхъуыддæгты æмæ Уæлвæткон уавæрты министрадтæ ивгъуыд азы сæхимæ райстой ахæм хæстæ. Уыдон дæр цалдæр хатты бафснайдтой хицæн æмæ хицæн кувæндæттæ. Хъыгагæн, иуæй-иутæ дзуæрттæм кувынмæ ссæуынц, æмæ сæ фæстæ ныууадзынц бырæттæ. Уымæй уæлдай ма алыгъуызон бырон ныууадзынц цæугæдæтты æмæ суадæтты алфамбылай дæр.
Юстицийы министрады пресс-службæйы куыд загъта, афтæмæй райдианы сæ зæрды уыд суадæтты алфамбылайты бафснайын. Фæлæ æмкусджытæй кæцыдæр загъта, зæгъгæ, Алардыйы кувæндонмæ ссæуæн ис æвзæр уавæры æмæ уæд сфæнд кодтой сæ акци уырдыгæй райдайын. Ардæм адæм канд кувынмæ нæ цæуынц – рæсугъд бынæттæ сæ сæхимæ ‘лвасынц. Дзуар Культурæйы министрады зонæнтæм гæсгæ арæзт æрцыд XIV æнусы.
Юстицийы министрады кусджытæ бынат хæрзæфснайд бакодтой. 20 голладжы бæрц бырон æрæмбырд кодтой, æмæ сæ аластой бырондонмæ.
«Кæй зæгъын æй хъæуы, ацы хабар хорз хъæппæрис у. Уадз æмæ нæ архайд дæнцæг уæд нæ горæты цæрджытæ æмæ организацитæн дæр. Æрдз чъизи кæнын нæ хъæуы. Йе ‘фснайыны хæс махæй алкæуылдæр ис. Стæй ахæм зиутæ иттæг ахъаз сты коллективы ‘хсæн хъæрмуд ахастытæ сфидар кæнынæн дæр», – зæгъы Джиоты Алан.
УАЗÆГТЫ Марфа
