Дзæуджыхъæуы зæрæдтæ æмæ сахъат адæмæн цы хæдзар-интернат ис, уый Цæгат Кавказы ахсы фыццаг бынат йæ фадæттæ æмæ йæ аивдзинадæй. Уым ис, чи дзы цæры, уыдоны удæнцойæн æппæт уавæртæ дæр.
Фæлæ, адæмæн сæ хъысмæт алыхуызон у. Чи бынтон иунæгæй баззад, чи барвæндæй бацыд уырдæм, кæмæ фæкæсæг нæй… Иуныхасæй, уым цæрын кæй фæнды, уыдон бирæ сты. Уымæ гæсгæ сын бынæттæ нал фаг кæны.
Уый фæдыл Цæгат Ирыстоны разамынад рахаста фæндон ног социалон бæстыхай саразыны тыххæй. Объектæн рахицæн кодтой зæххы хай Дзæуджыхъæуы сæрмæ Реданты æрдзон фидыцтæй хъæздыг бынаты. Йæ аразынмæ бавналдзысты ног азы райдайæнæй. Уый дзуапп дæтдзæн нырыккон техникон, медицинон æмæ социалон æххуысы домæнтæн. Уыдзæн дзы сæдæ фæндзай ацæргæ æмæ сахъат адæймагæн цæрыны æмæ сæхи дзæбæх кæныны фадат.
Йæ аразыны хъæппæрис кæмæ фæзынд, уыдоны хъуыдымæ гæсгæ, интернаты цæрыны фадæттæ ницæмæй хицæн кæндзысты хи хæдзары, хи бинонтимæ цæрыны фадæттæй æмæ уагæй. «Зæгъæм, дыууæ ацæргæ къайы дзы иумæ æрцæрыны фæнд куы скæной, уæд сын дзы уыдзæн æппæт фадæттæ сæ царды бонтæ æвæлмастæй æрвитынæн. Интернаты сæм уыдзæн алывæрсыг медицинон æмæ социалон цæстдард. Кусдзæн дзы фæлтæрдджын дохтыртæ. Сыгъдæг, æппæтфадатджын хатæнты цæрдзысты дыгæйттæй, уыдзæн сын алыхуызон хиирхæфсæн мадзæлттæ: театртæ, концерттæ, цæудзысты музейтæм, тезгъо кæнынмæ фæсгорæтмæ», – загъта республикæйы фæллой æмæ социалон рæзты министр Айдарты Алинæ.
***
Дзæуджыхъæуы, Ботъоты Амырханы уынджы, райдыдта кæддæры зындгонд Кинойы хæдзары бындурон цалцæг. Ацы бæстыхайы сырæзтыл цæуы 120 азы, революцийы размæ дзы уыдис нæлгоймæгты ахуыргæнæндон, уый фæстæ – музей. Кинойы хæдзар куы сси, уæд дзы цард цæджджинагау æхсыст. Советон заман республикæйы бирæ кинонывтæ ист æрцыд. Бирæ азты йын разамынад лæвæрдта Гулуты Вячеслав. Кæд рагæй цалцæгкæнинаг у, уæддæр у цæрджыты уарзон бынат. Вæййы дзы равдыстытæ, презентацитæ, юбилейтæ, мысæн изæртæ…
Ныртæккæ объект нымад æрцыд культурон хæзнайыл. Хаст цæуы Уæрæсейы Кинемато-графистты цæдисы ирыстойнаг хайады исбонадмæ. Йæ сæрдар Цориты Султан куыд радзырдта, афтæмæй æхцайы фæрæзты иу хай радих кодта Уæрæсейы Кинематографистты цæдис, йæ сæргъ Никита Михалков, афтæмæй.
Бæрæг куыд у, афтæмæй кинойæн сæрма-гонд хæдзæрттæ ис, æрмæстдæр, Мæскуыйы, Петербурджы, Ростовы, Екатеринбурджы æмæ Дзæуджыхъæуы. Уымæ гæсгæ, ахæм культурон объект, æнæмæнг, бахъахъхъæнинаг у.
Цалцæджы бындурон куыстытæ кæны компани «СКИФОС». Сæ хæс у, сæйраджыдæр, культурæйы хæзнайæн йæ æддаг хуыз ба-хъахъхъæнын. Ныфс нæ ис, цы кинонывтæ нæм ис, уыдоныл ногтæ кæй бафтдзæн…
Нæ уацх.
