12-æм ноябры РХИ-йы Культурæйы министрады цур Адæмон сфæлдыстады центры хъæппæрисæй киноконцертон зал «Чермен»-ы уагъд æрцыд адæмон кафты æрвылазон 4-æм республикон фестиваль-конкурс «Ирон кафт», зæгъгæ. Ныр та йæ хайадисджытæ сæ арæхстдзинад равдыстой «Зилгæ кафт»-æй. Залы иу сæрибар бынат дæр нал баззад æмæ адæм лæууыдысты къулты цур. Зæгъын ма хъæуы уый дæр, æмæ конкурсы хайадисджыты номыртæм бакæсынмæ кæй æрбацыдысты бирæнымæц æвзонг адæймæгтæ.
Фестивалы архайдтой республикæйы районты хореографион коллективтæ æмæ горæты скъола-студитæ. Фестиваль-конкурсы сæйраг идейæтæ сты адæмон кафты традицитæ бахъахъхъæнын, Хуссар Ирыстоны адæмы фыдыбæстæйон культурæйы æргъадтыл фæцайдагъ кæнын, рæзгæ фæлтæры патриотон хъомылад фæтыхджындæр кæнын.
Мадзаламонæг, центры методист Санахъоты Жаннæ райдианы банысан кодта, зæгъгæ, кафт у ирон адæмы истори æмæ культурæ æвдисæг. Цалынмæ æвзаг æмæ культурæ цæрой, уæдмæ цæрдзысты адæм дæр. Сценæмæ фæхуыдта центры директор Гуыцмæзты Эльзæйы. Уый раарфæ кодта 4-æм республикон фестиваль-конкурсы хайадисджытæ æмæ æрæмбырдуæвджытæн æмæ загъта: «Адæм æнæмбæлонæй рох кæнын райдыдтой бирæ национ кæфтытæ, уыцы нымæцы «Зилгæ кафт» дæр. Нæ фестивалы нысан у чи рох кæны, уыцы ирон кæфтыты сæндидзын кæнын. Ацы аз нæ Центры сырæзтыл сæххæст 10 азы æмæ уыцы азты мах æппæт тыхтæй дæр архайæм адæмон сфæлдыстад сæндидзын кæныныл».
Конкурс-фестивалы номинанттæ сæххæст кодтой фæйнæ дыууæ кафты: «Зилгæ кафт», аргъ ын кодтой жюрийы уæнгтæ æмæ дыккаг кафт та уыд сæхи равзæрстмæ гæсгæ – уымæн жюри нæ аргъ кодта.
Фестивалы хайадисджытæ дих уыдысты дыууæ къордыл. Жюри алы номырæн дæр аргъ кодта 9-баллон системæмæ гæсгæ. Жюрийы уæнгтæ уыдысты: Тедеты Валентинæ – РХИ-йы сгуыхт артист, жюрийы сæрдар; Гуыцмæзты Елизаветæ – Адæмон сфæлдыстады республикон центры директор, РХИ-йы Культурæйы сгуыхт архайæг; Къудухты Залинæ – Республикæ Цæгат Ирыстон-Аланийы хореограф, Галаты Барисы номыл зард æмæ кафты паддзахадон ансамбль «Симд»-ы раздæры солисткæ; Дзеранты Джульеттæ – РХИ-йы Культурæйы министры хæдивæг, РХИ-йы Культурæйы сгуыхт кусæг.
Конкурс байгом кодта Ленингоры районы Цъинагары хъæуы Культурæйы хæдзары хореографион ансамбль «Арвырон». Уыдоны фæстæ та сæ арæхстдзинад равдыстой Знауыры районы Культурæйы хæдзары хореографион ансамбль «Ныфс», Цхинвалы районы Тъбеты хъæуы хæдархайгæ хореографион ансамбль «Барс», Цхинвалы районы администрацийы Дменисы хъæуы Культурæйы хæдзары хореографион ансамбль «Фидæн», ацы районы Къостайыхъæуы ансамбль «Фарн»-ы хайадисджытæ. Уыдон иууылдæр сæххæст кодтой фæйнæ дыууæ кафты. Хореографион коллективтæ иууылдæр тырныдтой сæ номыртæ хорз сæххæст кæнынмæ. Алы номырæн дæр аргъ кодтой профессионалон жюрийы уæнгтæ, афтæ ма «Зилгæ кафт»-ы тыххæй дзырдтой сæ фиппаинæгтæ дæр.
Гуыцмæзты Эльзæ банысан кодта, зæгъгæ, кæд иумæйагæй хорз сты коллективтæ, уæддæр дзы бирæты хъæуы методикон æххуыс. «Нæ центры ис методисттæ, уыдон алыхатт дæр цæттæ сты баххуыс бакæнынмæ. Табуафси, чи сæм бахата, уыдонæн нæ бавгъау кæндзысты сæ зонындзинæдтæ».
Цалынмæ жюрийы уæнгтæ фыццаг къорды хореографион ансамблтæн аргъ кодтой, уæдмæ залмæ æрбамбырдуæвджыты зæрдæтæ йæ рæсугъд зардæй хъæлдзæг кодта РХИ-йы адæмон артист, зынгæ зарæггæнæг Гуыцмæзты Георги.
Уый фæстæ сæ арæхстдзинад равдыстой скъола-студиты коллективтæ: Цхинвалы районы Культурæйы хæдзары цур сывæллæтты сфæлдыстадон ансамбль «Малусæг»; Горæт Цхинвалы администрацийы культурæйы управленийы ансамбль «Ирон»; РХИ-йы Культурæйы министрады цур хореографион скъола-студийы ансамбль «Кафт».
Сценæмæкæсджытæ тыхджын къухæмдзæгъд кодтой ансамблтæ «Ирон» æмæ «Кафт»-ы хайадисджытæн. Æгæрыстæмæй жюрийы сæрдар Тедеты Валентинæ фæндон бахаста Культурæйы министрадмæ, цæмæй ансамбль «Кафт»-æн лæвæрд æрцæуа адæмон ансамблы ном.
Жюрийы уæнгтæн зын уыд уæлахиздзауты равзарын, фæлæ ма йæ ноджыдæр зæгъон, тыхджындæрты цур вæййы ноджы тыхджындæртæ. Районты хсæн: 1-аг бынат бацахста Знауыры районы администрацийы культурæйы хайады ансамбль «Ныфс» (аивадон къухдариуæггæнæг – Тасойты Руслан). 2-аг бынат адих кодтой Цхинвалы районы администрацийы Тъбеты хъæуы Культурæйы хæдзары ансамбль «Барс» (аивадон къухдариуæггæнæг Санахъоты Инал) æмæ Цхинвалы районы администрацийы Дменисы хъæуы Культурæйы хæдзары ансамбль «Фидæн» (аивадон къухдариуæггæнæг Козаты Радион). 3-аг бынат та адих кодтой Цхинвалы районы администрацийы Къостайыхъæуы Культурæйы хæдзары ансамбль «Фарн» (аивадон къухдариуæггæнæг Куыдзеты Янæ) æмæ Ленингоры районы администрацийы культурæйы Цъинагары хайады ансамбль «Арвырон» (аивадон къухдариуæггæнæг Гуссойты Ласко).
Горæт Цхинвалы скъола-студиты ‘хсæн фыццаг бынат адих кодтой горæт Цхинвалы администрацийы культурæйы управленийы ансамбль «Ирон» (аивадон къухдариуæггæнæг, РХИ-йы сгуыхт артист Хуыгаты Дианæ) æмæ РХИ-йы Культурæйы министрады цур паддзахадон хореографион скъола-студийы ансамбль «Кафт» (аивадон къухдариуæггæнæг РХИ æмæ Абхазы сгуыхт артист, РХИ-йы адæмон ахуыргæнæг Четион Майя). 2-аг бынат бацахста ансамбль «Малусæг» (аивадон къухдариуæггæнæг Гаглойты Изольдæ).
Конкурсанттæ ма хорзæхджын æрцыдысты фестивалы хайадисæджы дипломтæй.
Кæронбæттæны хореографион ансамблты разамонджытимæ ныхас кодтой æмæ сæ фиппаинæгтæ дзырдтой жюрийы уæнгтæ. Зæгъæн ис афтæ, æмæ ацы фестиваль-конкурсы руаджы кæй фæбæрæг ансамблты хореографты æмæ разамынады куыст. Конкурс сын вæййы фæлварæны хуызæн.
Арфæйы ныхæсты аккаг у Адæмон сфæлдыстады республикон центры директор Гуыцмæзты Эльзæ. Æрвылаз дæр ауадзынц цалдæр фестиваль-конкурсы. Центры директор куыд банысан кодта, афтæмæй ацы аз 3-æм декабры та уагъд æрцæудзæн республикон фестиваль-конкурс «Весь мир – театр», зæгъгæ.
ДЖИОТЫ Екатеринæ
