Горæт Цхинвалы милицийы управленийы æнахъомты хъуыддæгты фæдыл хайады кусджытæ сæ хистæр Гатайты Лалийы сæргълæудæй Сывæллæтты хъахъхъæныны бонмæ сарæзтой акци. Йæ нысан уыд – баххуыс кæнын æвæрæз бинонтæн, кæцыты ис дзидзидай сывæллæттæ.
Инспектортæ бахатыдысты республикон политикон парти «Ныхас»-мæ, цæмæй хайад райсой акцийы æмæ сын баххуыс кæной материалон æгъдауæй. Партийы минæвæрттæ Бесаты Зитæйы сæргълæудæй балхæдтой хæлцадон товартæ, сывæллæтты сæрмагонд хæринæгтæ, памперстæ, сапæттæ æмæ афтæ дарддæр. Нывæрдтой сæ хицæн хызынты æмæ сæ стæй инспектортимæ аластой æвæрæз бинонтæм. Бесаты Зитæ куыд зæгъы, афтæмæй парти «Ныхас» кæддæриддæр цæттæ у ахæм акциты хайад исынмæ, сывæллæтты зæрдæтæ барухс кæнынмæ.
«Мах хорз зонгæ стæм нæ республикæйы æвæрæз бинонты проблемæтимæ æмæ нæм куы æрбахатыдысты баххуыс кæныны тыххæй, уæд сæ фарсмæ балæууыдыстæм. Бузныджы ныхæстæ мæ фæнды зæгъын ацы акцийы организатортæн. Мах дарддæр дæр æххуыс кæндзыстæм ахæм категорийы æмбæстæгтæн», – банысан кодта Бесаты чызг.
Гатайты Лали дæр бузныджы ныхæстæ загъта парти «Ныхас»-æн ацы акцийы хайад райсыны тыххæй æмæ ма банысан кодта, партийы минæвæрттæ арæх кæй фæдаргъ кæнынц се ‘ххуысы къух цыбыркъух бинонтæм.
ДЖИОТЫ Алыксандр
