Мидхъуыддæгты министрады старт радтой ахæм акцийæн – «Бацæттæ кæн сывæллоны скъоламæ», кæцы нысанмæздæхт у,  милицийы æнахъомты фæдыл инспекцийы хыгъдмæ хаст бинонтæм.

Хайад дзы исынц централон аппаратæй æмæ горæты æмæ районты дæлхæйтты кусджытæ. Цы æхцайы фæрæзтæ æрæмбырд кæной акцийы рæстæджы, уыдонæй социалон-æвæрæз бинонтæн балхæндзысты скъоламæ хъæугæ дзаумæттæ æмæ предметтæ. Хæдзæрттæм та сын сæ бахæсдзысты горæты æмæ районты милицийы æнахъомты фæдыл инспекцийы кусджытæ.

«Мах арæх баххуыс кæнæм æвæрæз бинонтæн уавæртæ нæ куыд амонынц, уымæ гæсгæ, æмæ та ацы акци дæр радон хатт ахъаз фæуыдзæнис æххуысхъуаг бинонты сывæллæттæн. Нæ фæнды ис, цæмæй сын ацы ног ахуыры азы райдианмæ балхæнæм къæнцылары хъæугæ дзаумæттæ æмæ хызынтæ. Мæйы кæронмæ лæвæрттæ хъуамæ уæрст æрцæуой», – зæгъы горæт Цхинвалы милицийы управленийы æнахъомты хъуыддæгты фæдыл инспекцийы хайады сæргълæууæг Гатайты Лали.

Ахæм акци бирæты зæрдæмæ фæцыд æмæ сæ фæнды сæ хайбавæрд бахæссын иумæйаг хъуыддагмæ. Йе ‘ххуысы къух фæдаргъ кæнынмæ уал разы у горæттаг цæрæг, блогер Гуыбеты Заринæ. Лали куыд зæгъы, афтæмæй кæд æмæ акци суа масштабон, уæд æххуыс бакæндзысты æрмæст хыгъды чи лæууы, уыцы бинонтæн нæ, фæлæ ма иннæ цыбыркъух бинонтæн дæр. Ӕмæ нæм ахæмтæ та дзæвгар ис.

ДЖИОТЫ Алыксандр

 

Comments are closed, but trackbacks and pingbacks are open.