Нæ горæты æмбæстæгтæ Гуыбеты Зæринæ æмæ Манэ Агатонян, Республикæйы æнахъомты фарстаты фæдыл управленийы сæргълæууæг Гатайты Лалиимæ систематикон æгъдауæй ауадзынц хæрзаудæн акцитæ æмæ баххуыс кæнынц æххуысхъуаг бинонтæн. Ног азы бæрæгбонмæ дæр та бацæттæ кодтой æмæ барухс кодтой цыбыркъух бинонты зæрдæтæ. Уый тыххæй бæлвырддæрæй радзырдта акцийы организатортæй сæ иу Гуыбеты Зæринæ.

«Сæрмагонд амалиуæггæнæг Манэ Агатонян сфæнд кодта социалон æгъдауæй æххуысхъуаг бинонтæн баххуыс кæнын. Уый тыххæй йæ магазины сæвæрдта асыкк æмæ æмбырд кодта æхцайы фæрæзтæ æлхæнджытæй. Афтæ ма алы ауæйгонд товары аргъæй дæр иста 5 проценты æмæ уыдон дæр æппæрста асыччы. Интернеты хызæгæй спайда кодтам æмæ нæм æрбаиу сты, тыхст адæмы уавæрмæ бæрнон ахаст чи дары, ахæмтæ.  Æрæмбырд нæм ис 280 мин сомы бæрц. Уæд бахатыдыстæм Гатайты Лалимæ, цæмæй нын радта нæ горæты тыхстдæр уавæры чи ис, ахæм бинонты номхыгъд.

Номхыгъды æдæппæт уыдис 28 бинонты, уыдонæй алкæмæн дæр бацæттæ кодтам – макъаронтæ, сæкæр, цæхх, ссад, сойæгтæ, дзидза, дыргътæ æмæ халсартæ, афтæ ма сапæттæ æмæ æндæр æнæмæнгхъæугæ продукктæ   алы бинонтæн дæр иугай хызынтæ. Акци ногазон кæй уыд, уый гæсгæ та бинонтæй алкæмæн дæр сæвæрдтам сæрмагонд ногазон адджинæгты лæвæрттæ, сæ нымæц æдæппæт уыд 70-йы бæрц», – радзырдта Зæринæ.

Заринæ куыд загъта, афтæй акцийы фæлгæтты цы бинонтæн баххуыс кодтой, уыдон сыл сæмбæлдысты стыр æхсызгонæй. «Ацы лæвæрттæ мах бахастам Ногазон символтæ Митын Дада æмæ Митын чызгимæ æмæ уымæй сабиты зæрдæтæ райстой дывæр æхцондзинад. Хъыгагæн, не ‘хсæн тыхст бинонтæ бирæ ис æмæ сын сæ уавæр хи цæстæй фенгæйæ, зæрдæйæн вæййы ноджы зындæр. Мæнмæ арф бахъардта, æнахъом сабитæ цухдзинæдтæ кæй æййафынц, уый. Æвæццæгæн, мæхæдæг дæр мæ сабибонты федтон æмæ баййæфтон ахæм зындзинæдтæ æмæ уыдон рох кæй не сты, уымæн, бацагайынц мæ зæрдæ. Мæнмæ гæсгæ, ныртæккæ мах цы сабитæн балæууæм сæ фарсмæ, уыдон сæхæдæг дæр сомбон суыдзысты æндæр фæлтæрæн баххуыскæнынхъом, æмæ уый та у социалон-хъомыладон фарста», – радзырдта Гуыбеты чызг.

Акцийы фæлгæтты организатортæ лæмбынæг æркастысты бинонты уавæримæ æмæ сбæлвырд кодтой, бирæтæ дзы кæй цæрынц æххуырст фатерты, ис сын æнахъом сабитæ, сты æгуыст æмæ æййафынц зындзинæдтæ.   Уыдоны тыххæй информаци радтой нæ республикæйы социалон органтæм. «Тыхст уавæр æййафæг бинонты тыххæй мах фехъусын кодтам æмбæлон органтæм. Æввахс рæстæджы, республикæйы парламенты рабадты сæм хъус æрдарыны фæстæ, скъуыддзаг æрцæудзысты. Уый тыххæй нын ныфс бавæрдта Парламенты сæрдар Æлборты Алан», – загъта акцийы организатор.

Заринæ ма куыд загъта, афтæмæй ныртæккæ сæхæдæг та архайынц дыууæ бинонты социалон уавæртæ фæхуыздæр кæныныл. «Уыдон сты бирæ бинонтæ, ис ма сæм ноггуырд саби дæр æмæ сын нæдæр уазалгæнæн ис, нæдæр дарæсæхсæн машинæ. Интернеты хызæджы хъусынгæнинаг радтам æмæ ссардтам дзæбæх кусæг, фæлæ адаргæ мигæнæнтæ. Æввахс бонты сæ сæмбæлын кæндзыстæм уæлдæрзагъдгонд бинонтæн».

Хуыгаты Миленæ