Гаглойты Аланы раныхас Зары трагедийы амæттæгты номыл мемориалы раз
Абон, Мысæн æмæ хъынцъымы бон, мах не ‘ргом здахæм нæ историйы иууыл æнкъарддæр æмæ трагикондæр цаутæй сæ иумæ. Æрвылаз дæр майы мæйы ацы бон мах уæззау зæрдæйæ ссæуæм Зары мемориалмæ, цæмæй æрымысæм не ‘мзæххонты рухс нæмттæ.
1992 азы 20 майы гуырдзиаг неофашисттæ фехстой хæстæй лидзæг æнæаххос сылгоймæгтæ, сывæллæттæ æмæ зæронд адæймæгты.
Рацыд 31 азы, фæлæ рæстæгæн йæ бон нæу хъæдгæмттæ байгас кæнын, уыцы трагикон бонты ферох кæнын. Ацы хъынцъымы боны æппæт ирон адæм мысынц æвирхъау трагедийы æнаххос амæттæгты, кæцы Хуссар Ирыстоны историмæ хаст æрцыд сау бонæй. Йæ карздзинадæй, æнæадæймагондзинад æмæ уæззаудзинадæй, йæ амæттæгты нымæцæй Зары трагеди бан-къуысын кодта æгас цивилизацион дунейы.
Фæстаг цалдæр дæс азы Хуссар Ирыстоны историйы бирæ уæззау бонтæ уыдис, кæцытыл ахъуыды кæнын дæр зын у, кæцыты рыст нырма дæр ис нæ зæрдæты. Уыцы трагедитæ нын хъуамæ нæ зæрдыл лæууын кæной, ахæм тасдзинæдты ныхмæ æнæ национ иудзинадæй фæлæууæн кæй нæй.
Мах кæддæриддæр нæ зæрдыл дардзыстæм æмæ кад кæндзыстæм нæ адæмы сгуыхтдзинадæн, нæ зæрдыл дардзыстæм нæ зæххыл сабырады стыр аргъ!
Нæ сæртæ ныллæг къул кæнæм æппæт фæмардуæвджыты раз.
Абон, нацизм йæ сæр ногæй куы сдардта, адæймагадæн тас хæсгæйæ, уæд мах аразæм æппæтдæр, цæмæй ма æруадзæм дарддæр йæ апарахат кæнын. Нæ хæстонтæ, нæ бархионтæ Украинæйы æххæст кæнынц сæ хæс, цæмæй нæ бон уа сабыр арвы бын цæрын æмæ цæмæй фашистон агресссийы хъизæмæрттæ нæ зæххыл фæлхатт мауал æрцæуой.
Мах уыцы уæззау, тæссаг хæсты цаутæ зыгъуыммæ кæнын, æцæг хъайтарты рох кæнын, нæ бæстæйы истори ногæй фыссыны, фескъуыныны фадат никæмæн ратдзыстæм.
Мах макуы хъуамæ ферох кæнæм Зары трагедийы æнаххос амæттæгты нæмттæ. Уыдоны нæмттимæ мах хъуамæ дарддæр рæзын кæнæм нæ хæдбар паддзахад æмæ йæ æркæнæм дидинæфтыдмæ.
