Æртæ боны дæргъы, 16-18-æм ноябрмæ Уæрæсейы Федерацийы цæгаттаг столицæ – Санкт-Петербурджы уыд IX-æм Дунеон культурон форум, Дунейы 70 бæстæйы егъаудæр культурон организациты къухдариуæггæнджытæ æмæ культурæйы фадыджы зындгонд архайджытæ дзы хайад райстой. Уым уыдис нæ республикæйы Культурæйы министр Зæгъойты Рада дæр.
Форумы фæлгæтты Зæгъойты Рада æмæ Уæрæсейы Федерацийы Культурæйы министр Ольга Любимова официалонæй сæ къухтæ бафыстой 2024-2026 азтæн æмгуыстады программæйыл. Ацы хъуыддаг сбæрæг кæндзæн ног фæдыздæхтытæ культурæйы къабазы æмæ, кæй зæгъын æй хъæуы, ахъаз уыдзæн нæ республикæйы культурæйы райрæзтæн. Уымæй дарддæр ма ацы æмгуыстады программæ дыууæ азы дæргъы байгом кæндзæн ног фадæттæ библиотекæтæ æмæ музейон хъуыддаджы, ахуырадон программæтæн æмæ культурон къабазы специалисттæ цæттæ кæныны, афтæ ма Уæрæсейы Федерацийы æмæ Хуссар Ирыстоны нысаниуæгджын проектты активонæй архайдзысты сфæлдыстадон коллективтæ дыууæ фарсы ‘рдыгæй дæр.
Форумы фæлгæтты ма Уæрæсейы Федерацийы Культурæйы министр Ольга Любимовайæн тымбыл фынджы форматы фембæлд уыд фæсарæйнаг официалон делегациты сæргълæуджытимæ. Дискуссийы хайад райстой дунейы 40 бæстæйæ фылдæр Культурæйы министртæ, уыдоны нымæцы – Республикæ Хуссар Ирыстоны Культурæйы министр Зæгъойты Рада. Йæ раныхасы Зæгъойты чызг радзырдта культурæйы райрæзты нысаниуæгыл хуссарирыстойнаг паддзахады æмæ банысан кодта, нæ республикæ активонæй кæй æнгом кæны Уæрæсейы Федерацийы уагъдцæуæг бирæ нысаниуæгджын культурон проекттимæ.
«Уæрæсейы Федераци æмæ Хуссар Ирыстоны æмгуыстадæн культурæйы фадыджы ис зынгæ размæцыд. Нæ бæстæты æхсæн æнтыстджынæй реализацигонд цæуынц проекттæ дыууæфарсон культурон мадзæлтты фæлгæтты æмæ проект «Большие гастроли»-йы руаджы. Хуссар Ирыстоны сфæлдыстадон коллективтæ та хайад райсынц Уæрæсейы Федерацийы хуыздæр культурон фæзуæтты», – банысан кодта министр.
Уый ма йæ ныхасмæ бафтыдта, зæгъгæ, Хуссар Ирыстон фæстаг рæстæджыты разæнгардæй кусы, уæрæсейаг сфæлдыстадон коллективты республикæйы мадзæлттæм æрхоныны хъуыддаджы.
Зæгъойты Рада ма тымбыл фынджы æрсидт æппæт делегаттæм, зæгъгæ, Хуссар Ирыстон абон канд Уæрæсейы Федерацийæн нæу хорз фæзуат культурон мадзæлттæ уадзынæн, фæлæ ма æндæр бæстæтæн дæр æмæ цæттæ у семæ æмгуыстад кæнынмæ. «Культурæйæн нæй арæнтæ æмæ йæ ма хъуамæ иу кæной политикон аспекттимæ, уымæ гæсгæ мах цæттæ стæм æмгуыстад кæнынмæ, нæ республикæйы хæдбардзинад нын чи банымадта æрмæст уыцы бæстæтимæ нæ, фæлæ уымæй дарддæр немæ æмгуыстад кæнын кæй бафæнда æмæ нæм хæлардзинады къахдзæфтæ чи æрбакæна, уыдонимæ дæр», – загъта министр.
Уый фæстæ Санкт-Петербурджы IX Дунеон культурон форумы пленарон рабадт ацыдис Уæрæсейы Федерацийы Президент Владимир Путины хайадистæй. Уыцы ран уыдысты хуссарирыстойнаг делегаци.
Форумы фæлгæтты ма Зæгъойты Радайæн уыд хъуыддагон фембæлдтытæ йæ коллегæтимæ Уæрæсейы Федерацийы регионтæ æмæ æндæр бæстæтæй.
Ацы форум йæ нысаниуæгмæ гæсгæ ахсджиаг кæй уыдис, уый банысан кодтой РХИ-йы Культурæйы министрады пресс-службæйы. Культурæйы къабазы архайджытæн æмæ хицауадон органты минæвæрттæн уæрæх фæзуаты фадат уыдис, цæмæйдæриддæр æрдзырдтаиккой æмæ æруынаффæ кодтаиккой нырыккон культурæйы райрæзты тыххæй, сæ куысты сæвзæргæ фарстатыл, уымæй дарддæр ма кæрæдзийæн дзырдтой сæ ног иде-йæты тыххæй дæр.
Форумы уазджытæн развæлгъау бацæттæгонд æрцыдис цымыдисон культурон программæ æмæ иууылдæр базонгæ сты уырыссаг культурæимæ.
“Хæлардзинады Орден» – музейæн
Санкт-Петербурджы Республикæ Хуссар Ирыстоны Президент Гаглойты Аланы номæй Зæгъойты Рада «Хæлардзинады Орденæй» схорзæхджын кодта Чехойты Асланы, нырыккон аивæдты Ног музейы йæ активон архайды тыххæй национ культурон бынтæ бахъахъхъæнын æмæ фыдыбæстæйон аивад популяризаци кæныны хъуыддагмæ йæ хайбавæрд кæй хæссы, уый тыххæй.
Чехойты Асланы Ног музей активонæй æрбалæууы ирон нывгæнджыты фарсмæ, цæмæйдæриддæр Уæрæсейы культурон столицæйы уыдонæн организацигонд цæуой сæ равдыстытæ. Майы мæйы ам байгом хуссарирыстойнаг æвзонг нывгæнджыты равдыст «Цхинвал 5» (Саулохты Георги, Кокойты Мария, Æлборты Лирæ, Дзигойты Каринæ æмæ Дыгъуызты Мария) æмæ аххæссыдис 25-æм июнмæ. Равдыст сорганизаци кодтой Хуссар Ирыстоны Культурæйы министрад æмæ Чехойты Асланы Ног музей Республикæ Хуссар Ирыстоны Президент Гаглойты Аланы æххуысæй.
Зæгъойты Рада арфæ ракодта нырыккон аивæдты Ног музейы директор Коцты Иринæ æмæ йæ коллегæ Коцты Фатимæйæн æмгуыстады тыххæй, афтæ ма Ирыстонæн æдтейæ популяризаци кæй кæнынц фыдыбæстæйон культурæ, уый тыххæй. Министр ма баныфсæвæрдта, дарддæр дæр се ‘мгуыстад æнтыстджын кæй уыдзæн, уымæй.
ЦХУЫРБАТЫ Ларисæ
