18 ноябры Джуссойты Константины разамындæй уагъд æрцыд хицауады рабадт. Райдианы хицауады уæнгтæ æркастысты æмæ сфидар кодтой “2024 азæн Республикæ Хуссар Ирыстоны паддзахадон бюджеты тыххæй” РХИ-йы закъоны проект.
Хицауады сæрдары хæдивæг – финансты министр Тадтаты Дзамболаты ныхæстæм гæсгæ фидæн азы паддзахадон бюджеты проекты æфтиæгты хай бæлвырд æрцыд 8 835 776, 93 мин сомæй. Уæрæсейаг финансон æххуысы гуырахст у 7 035 747,16 мин сомы. Уыдонæй 5 942 247, 16 мин сомы нысан цæуынц республикæйы социалон-экономикон рæзтæн. 1 093 500 мин сомы та Республикæ Хуссар Ирыстоны социалон-экономикон рæзтæн ахъазгæнæг Инвестицион программæ реализаци кæныны фæлгæтты бюджетон инвестицитæ æххæст кæнынæн. 2024 азæн паддзахадон бюджеты фиддонон æмæ æнæфиддонон æфтиæгтæ бæлвырд цæуынц 1 800 029, 77 мин сомæй, уый та æфтиæгты иумæйаг гуырахстæн у йæ 20,4 проценты.
Хæрдзты хайы иууыл фылдæр хицæн æрцыд социалон фарстатæн, æнæниздзинад хъахъхъæнынæн, ахуырадæн, æдасдзинады ифтонгадæн.
Куыд банысан æрцыд, афтæмæй бюджеты æфтиæгты прогнозон гуырахст, бæлвырд æрцыд æфтиæгты бæлвырдгæнæн бæрæггæнæнтæй, афтæ ма ивгъуыд рæстæджыты фактон æгъдауæй бюджетмæ бацæуæг æфтиæгтæн анализы бындурыл.
Рабадты райст æрцыд 2024 азæн РХИ-йы соцалон-экономикон рæзты прогноз æмæ план.
Прогнозы сæйрагдæр параметртыл бакуыстæуыд паддзахадон экономикæйы орентиртæ æмæ приоритетты бындурыл, республикæйы социалон-экономикон рæзты фæстиуджытæ хынцгæйæ.
Экономикон рæзты министр Хъотайты Сæрмæт куыд банысан кодта, афтæмæй планы сæйраг нысан у республикæйы экономикæйы рæзты бындурыл цæрджыты уавæртæ хуыздæр кæнын.
Сæйраг хъусдард здæхт цæуы демографион ситуаци хуыздæр кæнын æмæ цæрджыты æнæниздзинад фидардæр кæнынæн уавæртæ аразынмæ, ахуырады, физикон культурæ æмæ спорты æмвæзад бæрзонддæр кæнын, кусæн бынæттæ аразын æмæ цæрджыты цæрæнуатон уавæртæ хуыздæр кæнын, хъæууон цæрджыты ивылынад æруромынмæ.
Райст æрцыд “2024 азæн Республикæ Хуссар Ирыстоны чысыл æмæ астæуккаг амалиуæгадæн льготон кредиткæнынадæн ахъазгæнæг фонды бюджеты тыххæй” закъоны проект дæр.
Экономикон рæзты министр Хъотайты Сæрмæт куыд банысан кодта, афтæмæй бюджеты фонды æфтиæгты иумæйаг гуырахст у 55 184 мин сомы, уыдонæй паддзахадон бюджеты фæрæзтæ сты 38 милуан сомы. Дарддæр, хицауады уæнгтæ æркастысты æмæ райстой 2024 азæн Республикæ Хуссар Ирыстонæн социалон фонды бюджеты тыххæй закъоны проект, кæцы бакуыст æрцыд йæ архайды бæрæггæнтæ сбæлвырд кæныны тыххæй. Закъоны проекты нысан цæуынц æфтиæгтæ æнæмæнг пенсион фæдзæхстады æмæ æнæмæнг социалон фæдзæхстады æфтиæгтæ райсыны хуызы, рæстæгмæ нæ кусынц, æмæ сывæллонмæ кæсыны рæстæджы, афтæ ма кондады æрцæугæ æнамонд цауты æмæ профессиналон низты рæстæджы дæр.
Закъоны проекты нысан цæуы пенситæ индексаци кæнын æмæ пенсиисджыты нымæц фылдæр кæнын. Прогнозмæ гæсгæ пенсиисджыты нымæц фæфылдæр уыдзæн 15 проценты æмæ уыдзысты 6781 адæймаджы, уый та 2023 азæй у 884 пенсиисæджы фылдæр.
Рабадты ма сфидар кодтой “Республикæ Хуссар Ирыстоны цæрæн пункты территориты хæрзарæзтад организаци кæнын”-ы тыххæй уынаффæйы проект.
Арæзтад, архитектурæ æмæ цæрæнуатон-коммуналон хæдзарады министр Елдзарты Константин куыд банысан кодта, афтæмæй архайæг уынаффæйы хæрзарæзтадон куыстыты номхыгъдмæ хаст не ʻрцыдис цъæхдарæнтæ дарын æмæ сæм зилын. Æмæ, зæгъгæ, ног уынаффæ фадат ратдзæн горæттæ æмæ районты цæрæн пунктты территориты цъæхдарæнæй сфæлындзыны фæдыл куыстыты комплекс фæхуыздæр кæнынæн.
Æркастæуыд ног арæзт æрцæуæг Фæллойы æмæ социалон хъахъхъæнынады министрады архайд организаци кæныны фарстатæм дæр. Фидар æрцыдысты министрады структурæ æмæ штатон нымæц, афтæ ма нысан æрцыдысты министры æртæ хæдивæджы. Уыдон сты Дзуццаты Иннæ, Уанеты Заринæ æмæ Плиты Ацæмæз. Хицауады сæрдар Джуссойты Константин сын раарфæ кодта æмæ сын йæ цæст бауарзта æнтысгæ куыст.
Хицауады рабадты ма æркасысты къорд æндæр фарстытæм дæр.
БЕСТАУТЫ Валя
