Хуссар Ирыстоны дыууӕ боны дӕргъы архайдта дунеон форум «Южная Осетия. 15 лет признания Российской Федерацией независимости республики”. Форумы организатортӕ уыдысты Коммуникациты рӕзты ӕхсӕнадӕмон институт Мир-Мост-Осетия, Тыбылты Алыксандры номыл Хуссар Ирыстоны паддзахадон университет ӕмӕ дунеон информацион агентад «Спутник Хуссар Ирыстон».
Форумы партнертӕ уыдысты Хуссар Ирыстоны Хъахъхъӕнынады министрад, Коммуникациты рӕзты националон иртасынӕдты институт ӕмӕ Социалон прог-раммӕты фарс балӕууыны фӕдыл национ фонд.
Коммуникациты рӕзты ӕхсӕнадӕмон институты хъусдарӕн советы сӕрдар Бекъойты Сослан форум байгом кӕныны фӕстӕ йӕ хайадисджыты базонгӕ кодта йӕ архайджытимӕ.
Журнал «НОВЫЕ ДЕЛОВЫЕ ЛЮДИ»-йы сӕйраг редактор Галина Скоробогатова бузныг загъта, форумы хайадисджытӕн ӕмӕ мадзал сорганизаци кӕнынӕн чи баххуыс кодта, уыдонӕн. Лӕварӕн ӕрхаста, ныртӕккӕ Уӕрӕсейы территорийыл цы иууыл цымыдисондӕр журналӕн къухдариуӕг кӕны, уый.
Президенты Администрацийы сӕргълӕууӕджы хӕдивӕг Тыбылты Алан Президент Гаглойты Аланы номӕй бузныджы ныхӕстӕ загъта форумы хайадисджытӕн. Махӕн, зӕгъгӕ, ахсджиаг у, цӕмӕй нын контакттӕ уа ӕрмӕст политикон нӕ, фӕлӕ ӕхсӕнадон фадыджы. Ахӕм фембӕлдтытӕ нӕ республикӕйӕн ахсджиаг сты ӕмӕ мах кӕрӕдзийы ӕхсӕн хъуамӕ тауӕм хӕлардзинад.
ХИПУ-йы ректор Тедеты Вадим бузныг загъта нӕ дуджы хъайтартӕн – августы уӕззау бонты ӕфсӕддон афӕлгӕсджытӕн, уыдон уацхӕсджыты статусы арӕзтой ӕппӕтдӕр, цӕмӕй дунемӕ фӕхӕццӕ уыдаиккой, Ирыстоны цы уӕззау цаутӕ ӕрцыдысты, уыдон.
Коммуникациты рӕзты ӕхсӕнадӕмон институтимӕ бӕрӕг сразыдзинадыл къухтæ æрфысгӕйӕ, абон Хуссар Ирыстоны университет дӕр хайад исы ацы фыццаг мадзалы ӕморганизаторӕй. Бузныджы ныхӕстӕ ма загъта Социалон программӕты фарс балӕууыны националон фонды директор Андрей Сергеевӕн, уымӕн ӕмӕ университеты хуыздӕр студенттӕн фидар ӕрцыд стипендитӕ. Уый у, хорз ахуыр кӕнынмӕ тырнындзинады стимул.
26 август хӕстӕфхӕрд Хуссар Ирыстонӕн ссис нысаниуӕгджын цау ӕмӕ уый фӕстӕ цы бадзырдыл къухтӕ фыст ӕрцыд Цӕдисад ӕмӕ интеграцийы фӕдыл, уый та уыд йӕ логикон кӕрон. Уыцы документы сӕйраг пункт у – Хуссар Ирыстоны хъахъхъӕнынхъомдзинад сфидар кӕнын ӕмӕ йын йӕ ӕдасдзинад бахъахъхъӕнын.
Уӕрӕсейы Федерацийы ӕфсӕддон ӕмӕ алыварсон ӕххуысы руаджы Хуссар Ирыстоны адӕм тӕссаг августы бонты фервӕзтысты скуынӕг кӕнынӕй. Бархионты ӕмӕ нӕм уыцы рӕстӕджы ӕххуысмӕ чи фӕзынд ӕмӕ нӕ фарсмӕ чи ӕрлӕууыд, уыдон ныфсхастдзинад ӕмӕ хъайтардзинадӕн дӕр ӕнӕбанысангӕнгӕ нӕй.
Университеты ректоры ныхӕстӕм гӕсгӕ информацион тыгъдадмӕ фӕстӕмӕ раздахын хъӕуы Хуссар Ирыстоны кой, уымӕн ӕмӕ 2008 азӕй фӕстӕмӕ йӕ кой ничиуал кӕны ӕмӕ уый раст нӕу. Уӕд уыд хӕст ӕмӕ пырхӕнтӕ. Ныртӕккӕ та Хуссар Ирыстон рӕзы ӕмӕ размӕ цӕуы Уӕрӕсейы Федерацийы ӕгӕрон ӕххуысы ӕмӕ нӕ ӕмбӕстӕгты ӕвӕллайгӕ архайды руаджы ӕмӕ уый кой дӕр хъуамӕ цӕуа, уымӕн ӕмӕ ис фӕстиуджытӕ. Дуне хъуамӕ уына нӕ ӕфсымӕрон ахастытӕ – куыд рӕзынц скъолатӕ, хӕдзӕрттӕ, фӕндӕгтӕ, куыд рӕзы нӕ экономикӕ.
Форумӕн егъау программӕ ис
Социалон программӕты фарс балӕууы-ны националон фонды правленийы сӕрдар Андрей Сергеевы ныхӕстӕм гӕсгӕ ацы форумы сӕйраг нысан у, цӕмӕй лӕгӕй лӕгмӕ аныхас кӕнӕм, науӕд социалон хызӕгтӕ ӕмӕ телефонты руаджы ныхас кӕнын хъуыддаг аразӕг нӕу. Форумы фӕлгӕтты ХИПУ, Хъахъхъӕнынады ми-нистрады ӕмӕ «Спутник Хуссар Ирыстоны» фӕзуатты уагъд ӕрцӕудзӕн ма-дзӕлттӕ. Цы егъау программӕ бацӕттӕ ӕрцыд, уым ахсджиаг ӕмӕ нысаниуӕг-джын мадзал у Руслан Гусары кинонывы премьерӕ. Уым ӕвдыст цӕуынц адӕй-мӕгтӕ ӕмӕ хъайтартӕ, ныртӕккӕйы уавӕр – киноныв хъайтарон ӕмӕ трагикон у ӕмӕ хъуамӕ зонӕм ӕмӕ хъуыды кӕнӕм ӕппӕтдӕр.
Андрей Сергеев ма куыд банысан кодта, уымӕ гӕсгӕ 15 азы дӕргъы нымад ӕмӕ сабырады уавӕрты Хуссар Ирыстоны бирӕ арӕзт ӕрцыд. Фӕлӕ, ӕнӕмӕнгдӕр, дзурын хъӕуы ноджы фылдӕр саразыныл, фидӕны плӕнттыл, уый ӕмрӕнхъ нӕ хъӕуы рох кӕнын ивгъуыд рӕстӕджытӕ. Æмӕ лӕгӕй лӕгмӕ форумы фӕлгӕтты ныхас кӕнын ахъазгӕнӕг уыдзӕн, цӕмӕй Уӕрӕсе ӕмӕ Хуссар Ирыстоны ӕфсымӕрон адӕмтӕ размӕ ӕнтыстджынӕй цӕуой иумæйаг зӕххыл, рӕсугъддӕр ӕмӕ йӕ хъӕздыгдӕр кӕной, ӕмӕ сӕйраджы та, ӕппӕт уавӕртӕй дӕр хъахъхъӕной сабырдзинад.
Хуссар Ирыстонӕн ис егъау
гуманитарон потенциал
Уӕрӕсейаг социолог, политолог «Школа солидарной экономики»-йы ректор Владимир Лепехин форумы хайадисджыты хъусдард аздӕхта Уӕрӕсейы алфӕмблай цы уавӕр ӕвзӕры, уымӕ. Уымӕ гӕсгӕ Хуссар Ирыстон у позитивон рӕзт, хӕрзвадатдзинад ӕмӕ хъӕздыгдзинады дӕнцӕг. Йӕ хъуыдымӕ гӕсгӕ, ӕппӕт фадӕттӕм гӕсгӕ Хуссар Ирыстон гӕнӕн ис ӕмӕ постсоветон тыгъдады суа гуманитарон рӕзты бынат. Уымӕн ӕмӕ кӕд егъау территори нӕу, уӕддӕр ын ис егъау гуманитарон потенциал.
«Ацы фӕрнӕйдзаг бынат культурон цӕстӕнгасӕй ӕмӕ йын йӕ климатон уавӕртӕ нӕ зонынц Уӕрӕсейы бирӕ ӕмбӕстӕгтӕ. Фӕлӕ ацы бӕстӕмӕ цымыдисгӕнӕг адӕймӕгты нымӕц цадӕггай фылдӕр кӕндзысты, уымӕн ахъазгӕнӕг уыдзӕн ацы фыццаг гуманитарон форум дӕр. Ахсджиаг у, цӕмӕй дарддӕр дӕр ахӕм форумтӕ уагъд цӕуа Хуссар Ирыстоны, цӕмӕй ӕмархайд цӕуа республикӕйы культурон, экономикон рӕзты процесстӕн», – дзырдта уый.
«Спутник Южная Осетия» у ирон
ӕмӕ уырыссаг адӕмы иугӕнӕг
Æхсӕнадӕмон информацион агентад «Спутник Хуссар Ирыстон»-ы къухдариуӕггӕнӕг Хъуылаты Зӕринӕйы ныхӕстӕм гӕсгӕ ацы агентад Хуссар Ирыстоны территорийыл гуманитарон миссиимӕ архайы аст азы дӕргъы. Сты, ирон ӕмӕ уырыссаг адӕмы кӕрӕдзийыл чи бӕтты, ахӕм цӕг.
«Уый ӕз хорз хъуыддагыл нымайын, ныртӕккӕ махӕн кӕй ис ахӕм иттӕг хорз гуманитарон ӕндидзӕн инициативӕ. Æхсызгон нын у, пайда кӕй цӕуы нӕ фӕзуатӕй ӕмӕ ӕрвылбон дӕр оперативонӕй, раст ӕмӕ алы форматты лӕвӕрд кӕй цӕуы иууыл хуыздӕр хуызы информаци ирон ӕмӕ уырыссаг аудиторийӕн», – дзырдта агентады къухдариуӕггӕнӕг.
Ирыстоны зӕхх алӕмӕтон у
РИА Новостийы ӕфсӕддон афӕлгӕсӕг Александр Хроленкойы ныхӕстӕм гӕсгӕ 15 азы сабырады уавӕрты Хуссар Ирыстоны сырӕзт ног фӕлтӕр сабыр арвы бын, уый ӕмрӕнхъ фӕивта дунейы азфыст дӕр. Уӕрӕсе Хуссар Ирыстонӕн куы баххуыс кодта ног царды уавӕртӕм рахизынӕн, уӕд Хуссар Ирыстон фӕахъаз уымӕн, цӕмӕй Уӕрӕсейы райгуырдаид ног ӕмбарынад дунеон историйы йӕ нысаниуӕджы тыххӕй.
Александр куыд банысан кодта, уымӕ гӕсгӕ Хуссар Ирыстоны зӕхх алӕмӕтон у объективон проблемӕтӕм нӕкӕсгӕйӕ, фӕлӕ кӕронмӕ бӕстон хъӕуы уыцы алӕмӕтон дуне. Йӕ ныхӕстӕм гӕсгӕ бирӕ баст у журналисттыл дӕр, цӕмӕй бирӕ процестӕ конструктивон фадыгмӕ здӕхт цӕуой, размӕ цӕуа экономикӕ, фидар кӕна хъахъхъӕнынхъомдзинад, цӕмӕй фӕсивӕд размӕ цӕуа патриотизм ӕмӕ Уӕрӕсеимӕ историон ӕгъдауӕй ныффидаргонд хӕларадон ахастыты раст здӕхты.
Зӕрдыл ӕрлӕууын кодта, нӕ республикӕйы цы куыст бакодта иу азӕй фылдӕр, уыцы бонтӕ. Уый, зӕгъгӕ, кӕд бирӕ рӕстӕг нӕу, уӕддӕр ын бантыст бирӕ саразын. Йӕ зӕрдӕйы ӕхсызгон мысинагӕй баззадысты адӕймӕгты цӕсгӕмттӕ ӕмӕ удтӕ, Ирыстоны алӕмӕтон ӕрдз.
«Уый абон дӕр цӕры мемӕ ӕмӕ уыцы ахсджиаг бастдзинад дарддӕр кӕны. Ныфс мӕ ис, ӕмӕ Хуссар Ирыстонӕн стыр фидӕн ис Уӕрӕсейы ныфсджын хъахъхъӕнынад ӕмӕ Сыгъдӕг Уастырджийы рахиз базыры бын.
Нӕ истори ма хъуамӕ рох кӕнӕм
Дагъыстаны бӕстӕйы сӕргълӕууӕджы хӕдивӕг Магомед Хадулаев сӕйраг хъусдард аздӕхта уыцы хъуыдымӕ, зӕгъгӕ, рӕзгӕ фӕлтӕр фаг нӕ зонынц бӕстӕйы истори. Цы адӕм сӕ истори нӕ зонынц, уыдонӕн ивгъуыд дӕр нӕй ӕмӕ фидӕн дӕр.
Карзӕй тӕрхон кодта, ныртӕккӕ Украинӕйы цы цаутӕ цӕуы, уыдоныл, зӕгъгӕ, уыцы адӕм куыд ферох кодтой, мах иу стыр ӕмӕ тыхджын советон адӕм кӕй стӕм, уый. Уымӕ гӕсгӕ ахуыр хъӕуы нӕ сывӕллӕтты, цӕмӕй зоной сӕ равзӕрды истори, сӕ зынаргъ Хуссар Ирыстоны ӕмӕ Советон Цӕдисы стыр ӕмӕ хъомысджын истори. Ӕмӕ уӕд нӕ фӕстагӕттӕ уыдзысты фидар ӕмӕ нӕ фӕиппӕрд уыдзысты сӕ раст фӕндагӕй.
«Хорз у экономикӕ, юриспруденци, ӕфсӕддон хъуыддӕгтӕ зонын, фӕлӕ истори нӕ уд у, уый нӕ хъуыды ӕмӕ зӕрдӕйы куынӕ уа, уӕд нын ницы ис ӕппындӕр», – банысан кодта Магомед.
Мах тырныдтам сӕрибардзинад ӕмӕ хӕдбардзинадмӕ
Хуссар Ирыстоны Хъахъхъӕнынады министр Марат Павловы номыл арфӕйы ныхӕстӕ мадзалы хайадисджытӕн загъта йӕ хӕдивӕг Сиукъаты Вадим. Банысан кодта, 15 азы дӕргъы Хуссар Ирыстонӕн фадат кӕй ис рӕза ӕмӕ размӕ цӕуа сабыр цардӕй. Уыцы 15 азы размӕ 20 азы дӕргъы хуссарирыстойнаг адӕм тох кодтой бӕстӕйы хӕдбардзинады сӕрыл. Уал азы дӕргъы тырныдтам 2008 азы 26 августы ӕрцӕугӕ цинаг хабармӕ, ӕмӕ уыцы бон нӕ ӕрӕййӕфтаиккам, нӕ адӕм сӕрибардзинад ӕмӕ хӕдбардзинадмӕ куынӕ тырныдтаиккой, уӕд.
Рӕзгӕ фӕлтӕр хъуамӕ зоной хион ӕмӕ ӕддагон
Политконсультант, психолог, PR ӕмӕ CR фӕдыл эксперт Алена Август ныфс бавӕрдта, Уӕрӕсе ӕмӕ Хуссар Ирыстоны адӕмтӕм кӕй разындзӕн тыхтӕ, цӕмӕй бахъахъхъӕной истори. Уыцы хъуыддаджы Уӕрӕсейы фӕлтӕрддзинад цымыдисон уыдзӕн Ирыстонӕн.
Банысан кодта, 1 сентябрӕй Уӕрӕсейы университетты кӕй байгом уыдзысты «Основы российской государственности»-йы курсытӕ. Уыдоныл бакуыстой бирӕнымӕц эксперттӕ, ӕвдыст дзы цӕуы уӕрӕсейаг цӕстӕнгас историмӕ. Йӕ хъуыдымӕ гӕсгӕ Хуссар Ирыстоны дӕр хъӕуы ахъуыды кӕнын, цӕмӕй ацы фӕлтӕрддзинадӕй пайда ӕрцӕуа.
«Махӕн ног ахуыргӕнӕн чиныг ис историйӕ, уый ӕнӕнхъӕлӕджы нӕу. Ныртӕккӕ Украинӕйы цы уавӕртӕ сӕвзӕрд, уыдон бирӕ цӕуылдӕрты дзурӕг сты. Уӕрӕсейы сӕрмагонд ӕфсӕддон операцийӕ бӕрӕг у, хион чи у ӕмӕ ӕддагон та чи у. Ӕмӕ ахсджиаг у, цӕмӕй рӕзгӕ фӕлтӕр зоной ӕмӕ ӕмбарой уыцы хъуыддаг”.
Форумы куысты ма йӕ мысинӕгтӕ Хуссар Ирыстоны тыххӕй радзырдта зындгонд уӕрӕсейаг хӕдтӕхӕгскъӕрӕг Александр Дзюба. Форумы нысаниуӕг ӕмӕ йӕ хайадисджытӕн ӕнтыстджын куысты фӕндиӕгтӕ загъта ХИПУ-йы Истори ӕмӕ Кавказзонынады кафедрӕйы доцент Тадтаты Таймураз.
Мадзалы хайадисджытӕ ма дидинджытӕ сӕвӕрдтой, дӕргъвӕтин азты сӕрибардзинадыл цы хӕстонтӕ фӕмард, уыдон мысӕн бынӕтты.
КЪÆБУЛТЫ Маринæ
ИА «Рес»-ы къамтæ
