Ӕрӕджы Львоваг политехникон университеты ӕвзагзонӕг ӕмӕ профессор Ирина Фарион ногӕй ӕрсидт уырыссаг ӕвзаг ӕмӕ уырыссаг ӕвзагыл дзурджыты скуынӕг кӕнынмӕ. Йӕ раныхасӕн стыр резонанс уыд украинаг ӕхсӕнады ӕмӕ фӕсарӕнты дӕр. Абоны бон дӕр не ‘рсабыр сты нырма, алыгъуызон комментаритӕ фыссынц – чи йӕ ныхмӕ, чи та йе ‘вварс.
Лӕмбынӕг куы байхъусӕм Фарионы ныхӕстӕм, уӕд дзы уӕлдай диссаг ницы фехъусдзыстӕм – раздӕрау куыд сидт уырыссаг ӕвзагыл дзурджыты куынӕг кӕнынмӕ, ныр дӕр – афтӕ. Фӕлӕ ныр политикон ӕмӕ ӕфсӕддон уавӕр цӕхгӕр фӕивта ӕмӕ уымӕн сцъиувӕдис сты. Фарионӕн рагӕй фӕстӕмӕ ӕнӕуынон сты уырыссаг ӕвзаг, Уӕрӕсейы цӕрджытӕ ӕмӕ-иу комкоммӕ сидт се скуынӕг кӕнынмӕ. Уӕрӕсейы йӕ аккаунтӕ социалон хызӕгты ӕхгӕд сты, фӕстӕдӕр ма сӕ фӕсарӕнты дӕр чидӕртӕ сӕхгӕдта. Уымӕн ӕмӕ ӕгӕр ӕргомӕй калдта йӕ хъӕстӕ, йӕ ныхӕстӕ йын бабӕттӕн ис фашистон ӕмӕ террористон хъуыдыимӕ.
Хъуыддаг Фарионы ныхмӕ уымӕн ӕрзылд ӕмӕ ныр ныкритикӕ кодта украинаг ӕфсӕддонты дӕр, кӕцытӕ дзурынц ӕрмӕстдӕр уырыссаг ӕвзагыл. Ӕмӕ ахӕм хӕстонтӕ дзӕвгар ис террористон ӕфсӕддон дӕлхай «Азовы» дӕр ӕмӕ ӕндӕр ахӕм нацистон дӕлхӕйтты дӕр. Фарионы ныхӕстӕм гӕсгӕ украинаг ӕвзаг чи нӕ зоны ӕмӕ йыл чи нӕ дзуры, уыдон, сты Украинӕйы знӕгтӕ ӕмӕ ацӕуӕд искуыдӕм. Украинӕйы ӕфсӕддонтӕй уырыссаг ӕвзагыл дзурджытӕ чи сты, уыдонӕн ницы бартӕ ис – ӕрмӕстдӕр кӕнӕ фронты хъуамӕ амӕлой, кӕнӕ та сыстой ӕмӕ сӕ сӕр фесафой искуыдӕм.
Цӕмӕй стыхстысты Украинӕйы ныгуылӕн хайы цӕрджытӕ, кӕд ӕмӕ уырыссаг ӕвзагыл дзурджыты мӕлӕтмӕ бӕллынц, уӕд?
Фарионы ныхӕстӕ тынг бандӕвтой фронты уӕвӕг хӕстонты хӕстхъомдзинадыл. Уымӕн ӕмӕ украинаг ӕфсады хӕстонты фылдӕр хай дзурынц ӕрмӕстдӕр уырыссагау ӕмӕ ныр сӕхи хатынц дыккаг сорты адӕмыл. Ӕгӕрыстӕмӕй, Фарионы ныхӕстӕм гӕсгӕ уыдон Украинӕйы ӕмбӕстӕгтӕ дӕр нал сты, фӕлӕ сты знӕгтӕ.
Ома украинаг ӕвзагыл дзурджытӕ кӕм нӕй, уый Украинӕ нал хуыйны ӕмӕ уымӕ гӕсгӕ уырыссаг ӕвзагыл дзурджытӕ сты маринаг ӕмӕ фӕсуринаг. Ахӕм уавӕры сты бархион хӕстонтӕ дӕр. Зӕгъӕм, иу гуырдзиаг бархион хӕсты быдыры фӕцӕф, иу къах ын нал ис ӕмӕ инвалидӕй баззад. Ныр ӕй фӕнды Киевы фатер сисын. Фӕлӕ йын ничи разы кӕны – фау ӕм хӕссынц, ома, иуӕй украинаг ӕвзагыл нӕ дзурыс, иннӕмӕй та инвалид дӕ.
Хӕсты быдырӕй Фарионмӕ фыссынц, зӕгъгӕ, рарвит Львовӕй украинаг ӕвзагыл дзурӕг хӕстонтӕ ӕмӕ, зӕгъгӕ, мах уайтагъд ацӕудзыстӕм. Растадысты Львовы уӕлдӕр ахуыргӕнӕндӕтты студенттӕ дӕр Фарионы ныхмӕ ӕмӕ домынц, цӕмӕй йӕ фӕсурой университетӕй. Афтӕ ма фенхъӕлут ӕмӕ уырыссаг ӕвзаг ӕмӕ уӕрӕсейӕгты хъахъхъӕнынц. Уыдон сӕхиуыл тыхсынц. Уырыссаг ӕвзагыл дзурӕг хӕстонтӕ сӕ гӕрзтӕ куы ӕрӕвӕрой, уӕд уыцы студентты сӕ хъустӕй аласдзысты фронтмӕ ӕмӕ мӕлын кӕй фӕнды. Райдыдтой рӕгъмӕ хӕссын, ома, Украинӕ сӕрибар ӕмӕ демократон бӕстӕ у, ӕмӕ йыл Фарион цъыф калы. Фӕлӕ ныры онг кӕм уыдысты уыцы «демократтӕ»?
Уавӕр афтӕ скарз ис ӕмӕ бахъуыд исты мадзӕлттӕ райсын, цӕмӕй ӕхсӕнад ӕрсабыр уа ӕмӕ фронты уӕвӕг хӕстонты бауромой се ‘хсӕнгӕрзтӕ ӕрӕвӕрынӕй. Украинӕйы ӕдасдзинады службӕ Фарионыл бакодта уголовон хъуыддаг цыппар статьямӕ гӕсгӕ ӕмӕ ма йӕ арвыстой университетӕй дӕр. Фӕлӕ ферӕджы. Ам райдыдта егъау ролы хъазын психологон фактор. Украинаг хӕстонтӕй йӕ бирӕтӕ бамбӕрстой, сӕ туг ӕнӕхъуаджы кӕй калынц, уый. Цахӕмфӕнды ӕхсардзинад куы равдисай хӕсты быдыры, уӕддӕр дын ницы кад ис, украинаг ӕвзагыл куы нӕ дзурай, уӕд. Ӕгӕрыстӕмӕй дӕ цӕмӕй адӕймагыл нымайой, уый дӕр Фарионы хуызӕттӕ скъуыддзаг кӕнынц. Уымӕ гӕсгӕ фӕстаг бонты украинаг хӕстонтӕ сӕхи уацары арӕхдӕр райдыдтой дӕттын.
Украинаг фашист ӕмӕ нацист Дмитрий Ярош рахӕцыд Фарионы æвварс ӕмӕ йӕ хъуыды афтӕ бамбарын кодта, ома, Уӕрӕсейы арӕнтӕ фӕуд кӕнынц, уырыссаг ӕвзагыл дзурджытӕ кӕм нал ис, уым. Уымӕ гӕсгӕ ӕрсидт украинаг хӕстонтӕм, цӕмӕй раздӕхой сӕ фыдӕлты æвзагмӕ. Ярошы ныхӕстӕ худӕг уымӕн сты ӕмӕ йӕхи фыдӕлтӕ уырыссаг ӕвзагыл дзурджытӕ уыдысты, йӕхӕдӕг дӕр ӕрӕджыйы онг украинаг ӕвзаг рӕстмӕ нӕ зыдта. Украинӕйы хӕстонтӕ та Ярошмӕ куы байхъусиккой ӕмӕ ӕцӕгӕйдӕр сӕ фыдӕлты ӕвзагмӕ куы рахизиккой, уӕд ма Украинӕйӕ аззаид ӕрмӕстдӕр йӕ ныгуылӕн хайы цыппар регионы.
Фарион Украинӕйӕн цахӕм антирекламӕ сарӕзта, ахӕм ничи. Иунӕг пропагандӕйӕн дӕр ахӕм тых нӕ уыд, ахӕм ӕнтыст нӕ бафтыд йӕ къухты. Хорз уаид ӕмӕ йын йӕ ныхӕстӕ куы парахат кӕниккой дарддӕр дӕр Украинӕйы. Уӕрӕсейы ӕфсӕддонтӕ цы листовкӕтӕ акалынц украинаг ӕфсӕддонты сӕрмӕ, уыдоны дӕр ныффыссын хъӕуы Фарионы ныхӕстӕ. Стӕй ма йӕ арӕхдӕр хонын хъӕуы алыгъуызон мадзӕлттӕм, цӕмӕй йын йӕ хъуыдытӕ зӕгъыны фадат уа ӕмӕ йӕ алчидӕр бамбара, цы у ӕцӕгӕйдӕр украинаг фашизм ӕмӕ чи сты бандеронтӕ.
Джиоты Алыксандр
