Нӕ республикӕйы хӕдзарадты ӕрӕджы ахицӕн хуымгӕрдӕн. Фермерон хӕдзарадтӕ ӕмӕ хицӕн зӕхкусджытӕ цы ӕфсирон культурӕтæ байтыдтой, уыдон кӕрдыныл бакуыстой «Ирагропромсервис»-ы комбайнертӕ. Ацы ахсджиаг куыстмӕ йӕхи развӕлгъау бацӕттӕ кодта куыстуаты разамынд, сӕ техникӕйӕн рӕстӕгыл самал кодтой фӕсауӕрц хӕйттӕ ӕмӕ комбайнертӕ бавнӕлдтой сӕ разылӕууӕг куыстытӕ ӕххӕст кӕнынмӕ. Сӕ зӕрды уыд хуымгӕрдӕн цыбыр ӕмгъуыдмӕ ахицæн кæнын, фӕлӕ сӕ уыцы хъуыддаджы бæрæг бахъыгдардтой мӕгуырау боныгъӕдтӕ. Уӕддӕр сæ иузӕрдион архайд радта йӕ хорз фӕстиуӕг ӕмӕ ацы бонты бабӕстон кодтой хоргуыстгӕнджыты афӕдзы фӕллой. «Агросервис»-ы директор Сагкаты Витали куыд загъта, афтӕмӕй хуымгӕрдӕн иууыл раздӕр фесты Ленингоры районы хӕдзарадты. Уыдон ӕркарстой ӕмӕ банай кодтой фӕззыгӕнд мӕнӕу ӕмӕ хъӕбӕрхоры хуымтӕ 500 гектары фӕзуатыл. Хуыздӕр рауад мӕнӕуы тыллӕгӕрзад, ома алы гектарӕй дӕр райстой 30 центнеры, къаддӕр уыд хъӕбӕрхоры тыллӕграйст. Уелит ӕмӕ Мугуты быдырты комбайнертӕ ӕркарстой 500 гектары ӕмӕ Знауыры хӕдзарадтӕн та 150 гектары. Куыд радзырдтой, афтӕмӕй ацы районы дӕр тыллӕгӕрзадӕн уыд ахӕм бӕрӕггӕнӕнтӕ. Къаддæр уыд Цхинвалы районы фермерон хӕдзарадты ӕфсирон культурӕты байтыдты фӕзуат – 100 гектары. Ацы районмӕ фидаргонд уыд иу комбайн, фӕлӕ сӕм бахъуыды рӕстӕджы ӕххуысмӕ фæзындысты ӕндӕртӕ дӕр.
Зӕгъын хъӕуы, комбайнертӕ хуымгӕрдӕны рӕстӕджы кӕй ӕмбӕлдысты бирӕ зындзинӕдтыл. Уый уымӕн, ӕмӕ быдыртӕ нал цӕуынц ӕмбӕлон куыст, ис дзы фӕлдӕхт бӕлӕстӕ, къутӕртӕ ӕмӕ техникӕ арӕх хӕлд. Зæронд кæнынц комбайнтӕ сӕхӕдӕг дӕр. Хъӕуы сæ цалцӕг кӕнын, кӕннод иннӕ сезон куыстӕн нал сбӕздзысты. Разамонджытӕ тынг катай кӕнынц кадрты фарстыл дӕр, уымӕн ӕмӕ иуӕй-иу техникӕ ӕнхъӕлмӕ кӕсы, чи сыл бакуса, ахӕм механизатортӕм.
Хуыбиаты Никъала
Comments are closed, but trackbacks and pingbacks are open.