Баззад ма чысыл рӕстӕг ӕмӕ йӕ тӕмӕны бацӕудзӕн, хоргуыстгӕнӕг афӕдзы дӕргъы цӕуыл фӕфыдӕбон кодта, уыцы тыллӕг ӕфснайыны куыст. Алы зӕхкусӕг дӕр фӕтындзы, цӕмӕй ацы ӕнӕаргъӕвгӕ куыст бакӕна цыбыр рӕстӕгмӕ ӕмӕ ӕнӕзиæнттæй. Тынгдӕр фæтыхсы уымӕн, ӕмӕ нырма нӕ республикӕ цух у хъӕуӕг техникӕйӕ, хуымгӕрдӕнӕн та фӕстиатгӕнӕн нӕй.
Цхинвалы районы дӕр дзӕвгар бабӕстон кӕнинаг тыллӕг ис ӕндӕр ӕмӕ ӕндӕр хӕдзарадты хуымзæххыты. Зӕгъын хъӕуы, ацы ахсджиаг куыст кӕй ӕрбалӕууы уыцыиу рӕстӕджы, уымӕ гӕсгӕ алы зӕхкусӕг дӕр фӕтындзы, цӕмӕй уал иу кӕнӕ иннӕ культурӕтӕ ӕфснайыны куыстытӕ райдайыны агъоммæ батыхсой техникæйыл. Бахъӕудзӕн кусгӕ боны алы сахатӕй дӕр спайда кæнын ӕмӕ уӕд хъӕууон фӕллойгӕнӕджы фыдӕбон дзӕгъӕлы нӕ фӕуыдзӕн. Статистикон хайадӕй нӕм куыд фехъусын кодтой, афтӕмӕй районӕн фӕззыгӕнд мӕнӕу бафснаинаг ис 64 гектары. Хицӕнтӕй сисгӕйӕ та 20 гектары кӕрдинаг ис зӕхкусӕгон- фермерон хӕдзарад «Алан»-ӕн, кӕцыйӕн разамынд кӕны фӕлтӕрд ӕмӕ куыстуарзаг зӕхкусӕг Хуыбиаты Алихан. Арендатор Бибылты Владимирмӕ бабӕстонкӕнинаг ис 14 гектары, фӕйнӕ 10 гектары -«Цъунар» ӕмӕ «Тъбет»-ы, фӕйнӕ 5 гектары – Къостайыхъӕуы паддзахадон хӕдзарад ӕмӕ зӕхкусӕгон-фермерон хӕдзарад «Аз»-ы.
Хъӕбӕрхоры культурӕ районы хӕдзарадтӕ ӕдӕппӕтæй байтыдтой 140 гектары, уыцы нымӕцы Къостайыхъӕуы паддзахадон хӕдзарады арендатортӕ – 109 гектары, фӕйнӕ 10 гектары – «Тъбет», «Аз» ӕмӕ «Тын» ӕмӕ иу гектары та -«Виктория»-йы хӕдзарад. Сысджы тыд ӕрцыд 89 гектары, ацы культурӕ ӕппӕты фылдӕр байтыдта «Тъбет»-ы зӕхкусӕгон-фермерон хӕдзарад, Къостайыхъӕуы паддзахадон хӕдзарады арендатортӕ байтыдтой 20 гектары, «Сӕуӕхсид» (йӕ разамонӕг Ӕлборты А.) – 11 гектары, фӕйнӕ 10 гектары ӕфснаинаг ис «Тын» ӕмӕ «Аз»-ӕн ӕмӕ афтӕ дарддӕр. Ивгъуыд азты люцернӕ “Икъорта” ӕмӕ «Ирыхъӕу»-ы хӕдзарадтӕ байтыдтой фӕйнӕ 10 гектары, «Тын»- 4 гектары ӕмӕ «Виктория» та – 1,5 гектары. Уымӕй дарддӕр ма эспарцет байтыдтой цыппар хӕдзарады ӕмӕ сӕ иумиаг фӕзуат ахсы 39 гектары.
Хуыбиаты Никъала
Comments are closed, but trackbacks and pingbacks are open.