Пайда кæнынц хорз боныгъæдæй

Ивгъуыд фæззæджы нӕ республикӕйы къӕвдатӕ арæх кæй уарыд, уый къуылымпыйы хос уыд хъӕууонхӕдзарадон куыстытӕ ӕххӕст кӕнынӕн. Фӕлӕ зӕгъын хъӕуы, хицӕн хӕдзарадтӕн уӕддӕр кӕй уыд хуым кӕнын-тауыны ӕнтыстытӕ. Цӕвиттон, Ленингоры районы фӕззыгӕнд мӕнӕу байтыдтой 150 гектары, Цхинвалы районӕн та тыд ӕрцыд 79 гектары, уыцы нымӕцы Цхуырбаты Аланы фермерон хӕдзарад байтыдта 10 гектары, иу ахӕм тыд ӕрцыд Битарты Гамлеты фермерон хӕдзарадӕн, Мӕлдзыгаты Ирбег байтыдта 8 гектары ӕмӕ Хъоцыты Зорик та – 5 гектары фӕзуатыл. Знауыры районы хӕдзарадтӕ байтыдтой 75 гектары, уыцы нымӕцы – Джиоты Лаверы фермерон хӕдзарад байтыдта 12 гектары ӕмӕ Кокойты Эдикӕн та бантыст 15 гектары байтауын. «Ирагропромсервис»-ы ивгъуыд азы бакӕнгӕ куысты бӕрӕггӕнӕнтӕй куыд бӕрӕг у, афтӕмӕй районы ӕдӕппӕт хуымгонд ӕрцыд 665,5 гектары. Минералон хъацӕнтӕ мӕрмӕ бахастӕуыд 16, 7 гектары, гербицидтӕй та – 224 гектары. Ӕдӕппӕт ӕфсирон культурӕтӕ бабӕстон кодтой 512,3 гектары. Цхинвалы районы хуымгонд ӕрцыд 186,6 гектары, Ленингоры районы та – 360, 8 гектары. Æфсирон культурӕтӕ та бафснайдтой 370,5 гектары фæзуатыл.

Ацы зымӕгон хъарм боныгъӕдтӕй пайда кӕнгӕйӕ, хицӕн хӕдзарадтӕ се ‘ргом тынгдӕр здахынц мӕр рӕстӕгыл бахуым кӕ-нынмӕ ӕмӕ сын ӕнтысгӕ дӕр кӕны. Зӕгъӕм, Убиаты хъӕуы цӕрӕг, фермерон хӕдзарады раззагон кусæг Мамиты Альбертӕн уал мӕр бахуым кодтой 40 гектары. Ацы куысты раззагонтӕ: сты фыццаг бригадӕйы бригадир Наниты Виталийы механизатортӕ: Гӕззаты Андрей, Кокойты Эдик, Хуыбецты Уасил, Пухаты Дзантемыр ӕмӕ Джиоты Митя.

Иууыл хуыздӕр фӕстиуджытӕ ис Ленингоры районы механизатортӕн, уыдонӕн уал абоны онг бантыстысты 500 гектары мӕр афӕлдахын, хуым та кӕнынц Абреу, Цъинагар ӕмӕ Орчъосаны зӕххытӕ. Ахсджиаг куысты раззагонтӕ сты Габеты Хвича, Хуриты Зураб ӕмӕ Дриаты Звиад. Хуым кӕныныл, сӕ фадӕттӕ ӕмӕ уавӕртӕм гӕсгӕ хорз кусынц Цхинвалы районы дыккаг бригадӕйы механизатортӕ Тыджыты Валик, Хуыбиаты Алан, Мӕлдзыгаты Алан ӕмӕ Гаглойты Алик.

Тагъд ӕрбалӕудзӕн тауыны афон дӕр, фылдӕр та хъуамӕ байтауой хъӕбӕрхоры культурӕ. Фӕлӕ зӕгъын хъӕуы, хоркуыстгӕнджытӕ тынг катай кӕнынц, тауинаг сын кӕй нӕй, уый тыххӕй. Ӕвӕццӕгӕн, Хъӕууон хӕдзарады министрад райсдзӕн ӕмбӕлон мадзӕлттӕ, цӕмӕй ацы хъуыддаджы фӕрог уа зӕхкусӕджы къух. Уымӕй дарддӕр «Агросервис»-ы цы хъӕууонхӕдзарадон техникӕ ис, уыдон фаг не сты республикӕйы зӕххытӕ рӕстӕгыл бакусынӕн. Сӕйраг инженер Сиукъаты Имеди куыд загъта, афтӕмӕй сты тынг рагон, никуы ӕрцыдысты капиталон цалцӕг ӕмӕ уый дӕр вӕййы къуылымпыйы хос куыстытӕ рӕстӕгыл ӕмӕ гъӕдджынӕй ахицӕн кӕнынӕн. Йӕ хъуыды у, цӕмӕй фӕфылдӕр уа хъӕууонхӕдзарадон техникӕйы бӕрц, стӕй хорз уаид, сӕ цалцӕг кӕнынӕн сын куы рахицӕн кӕниккой ӕхцайы фӕрӕзтӕ.

Хуыбиаты Никъала