Хуымгӕрдӕн хоргуыстгӕнӕгӕн ӕцӕг бӕрӕгбон уыд раздӕр азты. Райзæрдæйæ ӕнхъӕлмӕ каст ацы рӕстӕгмӕ. Ӕмӕ иугӕр нарст ӕфсир йӕ сӕр иуӕрдӕм ӕркъул кодта, фӕбур, уӕд ӕм ӕвӕстиатӕй бавнӕлдтаид ӕфснайынмӕ. Зад хуымы комбайнеры бирӕ цӕуын нӕ хъуыд, уайтагъд-иу бункер сыгъзӕрингъуыз мӕнӕуӕй айдзаг, ӕмӕ уӕд та райхъуыст комбайны «ӕххуысмӕ» сидӕг ӕхцон уаст. Уайтагъд йӕ уӕлхъус ӕрбалӕууыд уӕзласӕн машинӕ ӕмӕ гуыффӕ айдзаг хойрагӕй. Йӕ фӕндаг адардтаид мусмӕ, цыран ӕм ӕнӕрхъӕцӕй ӕнхъӕлмӕ кастысты сылгоймӕгтӕ ӕмӕ та сцырын мӕнӕу сыгъдӕг кӕныны радон куыст. Ныр дæр кӕд ахӕм ӕнгӕс нывӕн фенӕн ис, уӕддӕр хоргуыстгӕнджытӕ, раздӕры азтау, афтӕ дзӕвгар нал сты.
Фӕлӕ уӕддӕр хӕдзардзин зӕхкусӕг йӕ рагон хорз фӕлтӕрддзинадыл нӕ исы йӕ къух ӕмӕ ауды нӕ радтӕг зӕххыл, йӕ бӕркӕдтӕй йӕм бафты. Хоргуыстгӕнджыты фӕллойадон архайдӕн фенӕн ис нӕ республикӕйы ӕртӕ районы ӕмӕ ӕхсызгон у, фӕстаг рӕстӕджы сӕ нымӕц кӕй фылдӕр кӕны, сӕ хъусдард ӕм тынгдӕр кӕй аздӕхтой. Ӕфсирон культурӕтӕ иууыл фылдӕр байтыдтой Ленингоры районы хӕдзарадтӕ ӕмӕ сӕм, ӕдӕппӕт, бафснаинаг ис 1200 гектары. Ардӕм рӕстӕгыл фӕхӕццӕ кодтой цыппар комбайны, уыдонӕй сӕ иу у, амӕйразмӕ кӕй балхӕдтой, ахӕм ног комбаин. Зӕгъын хъӕуы, «Агро-промсервис»-ы разамынад (йӕ директор Саккаты Витали) рӕстӕгыл кӕй ба-тыхстысты сӕ бӕрныуӕвӕг техникӕ куыст ӕввонг скӕныныл, куыстуатӕн йӕхи ӕхцайы фӕрӕзты руаджы. Ӕдӕппӕт сӕ сцалцӕг кӕныныл бахардз 530 мин сомы, уыдон та фаг нӕ уыдысты ӕмӕ уымӕ гӕсгӕ спайда кодтой раздӕры спайдагонд фӕсауӕрц хӕйттӕй дӕр. Ацы районы хуымты кӕрдыныл кусынц Габиты Радик, Хуриты Зураб ӕмӕ Мӕргъиты Бесик. Фыццаг уал комбайнертӕ балӕууыдысты Абреуы быдырты ӕмӕ уал дзы ӕркарстой 100 га, бабӕстон кӕнинаг ма сын баззад ам 30 га. Фӕстӕдӕр рахызтысты Цъинагары хъӕбӕрхор ӕмӕ фӕззыгӕнд мӕнӕуы хуымтӕм ӕмӕ сын бантыст 300 гектары ӕркӕрдын ӕмӕ банай кӕнын. Зӕгъын хъӕуы, нырма сын ацы быдырты кӕй ис 200 га бафснаинаг, комбайнертӕ кусынц хъаруджынӕй, ӕрмӕст сӕ хатт бакъуылымпы кӕнынц мӕгуырау боныгъӕдтӕ.
Ӕфсирон культурӕты тыллӕг ӕфснайынмӕ бавнӕлдтой Знауыры районы дӕр, номхуындӕй та Убиаты ӕркарстой 40 га, Уелиты – 50 га, афтӕ ма Иончайы дӕр ӕркарстой цалдӕр гектары. Ацы бынӕтты карст куы фӕуой, уӕд та ӕрӕвналдзысты ӕндӕр фермерон хӕдзарадты тыллӕг ӕфснайынмӕ.
Тыллӕг ӕфснайынмӕ бавнӕлдтой Цхинвалы районы иуӕй-иу хӕдзарадтӕ дӕр.
ХУЫБИАТЫ Никъала
Comments are closed, but trackbacks and pingbacks are open.