Нӕ республикӕйы хуымгӕрдӕн ис йæ тæккæ тæмæ-ны.«Агросервис»-ы разамынд йӕхи бацӕттӕ кодта развӕлгъау ӕмӕ уымӕ гӕсгӕ комбайнертӕ хӕдзарадты ӕфсирон культурӕты тыллӕг ӕфснайынмӕ ӕрӕвнӕлдтой рӕстӕгыл.
Тыллӕгӕфснайӕн комбайнертæ сӕм иууыл иумӕ ис 9 ӕмӕ сӕ адих кодтой районтыл, уыцы нымӕцы Уелиты тракторон фыццаг бригадӕйы (бригадир Наниты Витали) ӕмӕ Цъинагары цыппӕрӕм тракторон бригадӕйы ис фӕйнӕ цыппар комбайны, Тъбеты бригадӕйы та ис иу комбайн. Иууыл фылдӕр ӕфсирон культурӕтӕ ӕфснаинаг ис Ленингоры районӕн – 700 гектарӕй фылдӕр. Уыдон, сӕйраджыдӕр, сты Цъинагар, Орчъосан ӕмӕ Абреуы быдырты. Наниты Витали куыд загъта, афтӕмӕй Знауыры районы ӕфсирон культурӕтӕ тыд ис 400 гектары ӕмӕ сты Мугут, Куатетри ӕмӕ Знауырӕн йӕхи быдырты. Ацы районы тыллӕг ӕфснайыныл кусынц ӕртӕ комбайнеры – Хуыбецты Вася, Кокойты Валери ӕмӕ Наниты Алик ӕмӕ уал сын 10 кусгӕ бонмӕ бантыст 270 гектары ӕркӕрдын. Фӕлӕ цалдӕр боны техникӕ ӕрлӕууыд йӕ куыстӕй, къӕвдабонтӕ кӕй фӕкодта ӕмӕ хуымтӕ уымӕл кӕй уыдысты, уымӕ гӕсгӕ.
«Агросервис»-ы директор Саккаты Витали куыд радзырдта, афтӕмӕй тыллӕг ӕфснайыны куыст банысангонд рӕстӕгмӕ ӕнтысгӕйӕ ацыд Ленингоры районы ӕмӕ уал 700 гектарӕй ныккарстой ӕмбисӕй фылдӕр, фӕлӕ сӕ ам дӕр бакъуылымпы кодтой къӕвдатӕ. Ацы районы та кӕрдыныл зӕрдиагӕй архайынц Мӕргъиты Бесо, Хуриты Зураб ӕмӕ Габиты Хвича. Цхинвалы районы цы иунӕг комбайн ис, ууыл та кусы фӕлтӕрд механизатор Джиоты Вадик. Бахъуыды рӕстӕджы ацы районы хӕдзарадтӕм сӕ къух фӕдаргъ кӕн-дзысты Уелиты комбайнертӕ дӕр. Ныртӕккӕ боныгъӕд фӕхуыздӕр ӕмӕ та комбайнертӕ балӕудзысты сæ куысты уӕлхъус. Ныфс сӕ ис, хуымгӕрдӕн кӕй ахицӕн уыдзӕн 10 кусгӕ бонмӕ.
«Агросервис»-ы разамонджыты бæллиц у, цӕмӕй сӕм техникӕйӕн уа ӕфтауцдон, уым уаид, развӕлгъау бынатмӕ кӕй ӕрласик-кой, ахӕм алыгъуызон ивӕн ӕмӕ фӕсауӕрц хӕйттӕ. Уӕд бахъуыды рӕстӕджы ӕндӕр ӕмӕ ӕндӕр хъӕууонхӕдзарадон куыстытӕ цӕуиккой рӕвдздӕр.
Хуыбиаты Никъала
Comments are closed, but trackbacks and pingbacks are open.