ХЪОТАЙТЫ Мария: «Культурæ кæдфæнды дæр уыдзæн нацийы капитал»

Информацион агентад «Спутник-Хуссар Ирыстон»-ы пресс-центры уагъд æрцыд ног проект – РХИ-йы Информаци æмæ мыхуыры паддзахадон комитеты сæргълæууæг Хъотайты Марияимæ æрвылкъуырион брифингы фæлгæтты чысыл пресс-конференци, .

Брифингы райдианы, фыццаджыдæр, Хъотайты Мария æрдзырдта, нæ республикæйы 13 декабры уагъд кæй æрцыд Республикæ Хуссар Ирыстон æмæ Уæрæсейы Федерацийы ‘хсæн социалон-экономикон æмгуыстады фæдыл Æхсæнхицауадон къамисы 18-æм рабадт. Банысан кодта, зæгъгæ, ацы ра-бадтæн ис стыр нысаниуæг, уымæн æмæ уым ныхас цыд ахæм ахсджиаг темæтыл, куыд нæ республикæйы арæзтад æмæ социалон-эко-номикон райрæзты тыххæй: «Кæй зæгъын æй хъæуы, тынг ва-зыгджын æмæ ахсджиаг хъуыддагыл нымайын, нæ республикæйы арæзт кæй æрцæудзысты сывæл-лæттæн ног цæхæрадæттæ, уымæн æмæ ацы фадыджы нæ республикæйы æвзонг ныййарджытæ æмбæлынц зындзинæдтыл. Афтæ ма арæзт цæудзæн ног цæрæн хæдзæрттæ дæр. Кæй ранымадтон уыцы объекттæ тынг ахсджиаг сты нæ республикæйы æндидзынадæн, райрæзтæн, не ‘мбæстæгты царды уавæртæ фæхуыздæр кæнынæн. Фæлæ мæ фæнды лæмбынæгдæр æрдзурын нæ республикæйы культурæ æмæ зонады райрæзты фæдыл. Уымæн æмæ ацы сферæтæ не сты хаст райсгæ Инвестицион программæмæ. Ис фæрæзтæ, кæцытæ комкоммæ сты здæхт культурон объекттæ æмæ аргъуанты арæзтадмæ, фæлæ мæн фæнды банысан кæнын уый, æмæ афон кæй у нæ республикæйы культурæ æмæ зонады райрæзты фæдыл серьезон финанстæ рахицæн кæнынæн», – загъта Хъотайты Мария.

Хæстон архайдтыты фæстиуджытæ къуылымпы кæнынц æхсæнады райрæзт. Йæ раныхасы Хъотайты Мария банысан кодта, зæгъгæ, нæ республикæйы хæстон архайдтытæ дæр тынг бандæвтой, æмткæй нæ культурæйы æмæ æх-сæнады райрæзтыл: «Хъыгагæн, абоны онг дæр мыхуыр не ‘рцыд ахуыргæнæн чингуытæ нæ нырыккон историйыл, уый, кæй зæгъын æй хъæуы, æндавы нæ сомбоны æхсæнады райрæзтыл. Æнæмæнг хъуыддагыл нымайын, цæмæй нæм уагъд цæуа археологон иртасынæд-тæ, археологон скъæхтытæ æмæ а.д. Уымæн æмæ культурæ кæмфæнды дæр уыдзæн нацийы капитал. Мах, æмткæй, Хуссар Ирыстоны æмбæстæгтæ, знаджы ныхмæ уымæн слæууыдыстæм, цæмæй бахъахъхъæнæм нæ культурæ, не ‘взаг æмæ нæ хæдуагæвæрд. Не ‘мбæстæгты ‘хсæн ис бирæ алыварсонæй курдиатджын адæм, кæцы-тæн сæ бон нæу, сæхи тыхтæй размæ рацæуын. Хъыгагæн, нæм нæй нывты равдыстыты иунæг комплекс дæр. Кæй зæгъын æй хъæуы, стыр аргъ кæнын, нæ республикæйы Культурæйы министр Зассеты Жан-нæйæн, культурæйы фадыджы йæ архайды тыххæй. Культурæйы фадыджы дзырд кæй цæуы бирæ ног проекттыл, уый хорз хъуыддаг у, фæлæ уыдон домынц серьезон финанстæ сæ среализаци кæны-нæн», – банысан кодта эксперт.

Брифинджы рæстæджы журналисттæ бацымыдис кодтой, ирон культурæйы перспективæтæ цы æмвæзадыл сты, уымæ дæр: «Ирон националон кæфтытæн стыр аргъ кæй кæнынц æппæт дунейы, уый факт у. Афтæ стыр аргъ кæнынц нæ нывгæнджытæн дæр, уыдонæн бирæтæн сæ нывтæн равдыстытæ вæййы Европæйы бирæ бæстæты», – банысан кодта Хъотайты Мария. Ирон æмæ дунеон культурæйы баиу фæахъаз уыдзæн ныры культурон кризисæн æви нæ, уый фæдыл Хъотайты Мария афтæ загъта: «Гæнæн ис æмæ æз дæн тынг консервативон адæймаг, æмæ йæ уымæ гæсгæ æз нæ зонын, ирон националон культурæ куыд æмиу кæны дунеон культурæимæ. Фæлæ, гæнæн ис æмæ ахæм ног фæлварæнтæн уа цымыдисон фæстиуджытæ», – загъта Мария.

Нæ уацх.