Мыхуыр æмæ информацийы Паддзахадон комитеты уазæг уыд не ‘мбæстаг Знауыры районæй ацæугæ, Голландийы Æппæт-адæмон æнæкоммерцион Ассоциаци «Renaissance Sandidzen» (“Æндидзынад”-ы) къухдариуæггæнæг   Пухаты Радион.

Ныр цалдæр азы августы райдианы Пухаты Радион æрцæуы йæ райгуырæн бæстæ-мæ, цæмæй йе ‘мбæстæгтимæ æрымыса 2008 азы августы уæззау бонтæ, æмæ ссара фæмардуæвджыты рухс нæмттæ.

Пухаты Радион фембæлд журналисттимæ æмæ сæ лæмбынæг базонгæ кодта йæ проект «Ирон культурæйы бонтæ Европæйы»- имæ.

Мыхуыр æмæ информацийы комитеты сæрдар Хъотайты Мария цымыдис кодта, европæйаг æхсæнадæн цы ахаст ис Хуссар Ирыстон-Паддзахад Аланимæ, 2008 аз хæсты тыххæй сæ хъуыды куыд у æмæ   куыд фæивта уавæр фараст азы фæстæ.

Ацы дзуаппæн цалынмæ фарст нæ радта, уæдмæ Пухаты Радион æрдзырдта 2008 азы августы хæсты фыццаг бонæй йæ цардæм-балимæ иумæ  æрсидтысты, Евроцæдисы æмбæстæгтæм «Хуссар Ирыстоны цæрæг адæмы номæй. Фыстæджы мидис уыд Хуссар Ирыстоны сабыр цæрджыты бахъахъхъæнын.. Пухаты бинонтæ апарахат кодтой фыстæг æппæт политикон баиугæндтæ æмæ æхсæнадон организацитыл. Фыстæ-гæн дзуапп нæ истой, фæлæ уый нæ нысан кодта, уыдон иуран кæй бадтысты. «Уыцы æнæзæрдæ ахаст мах ноджы тынгдæр разæнгард кодта», – загъта Пухаты Радион.

«2010 аз фæстæ Хуссар Ирыстон æмæ Гуырдзыстоны конфликты фарстатæ Европæйы æхсæнады бынтондæр ныннымæг сты. Политикон партитæ фылдæр уыдысты конфликтгæнæг Гуырдзыстоны æвварс æмæ архайдтой æппæт дæр ферох кæнын. Уæд мах сфæнд кодтам Ирыстонмæ хъусдард аздахын æндæр фарсæрдыгæй. Зæгъæм,  аивады руаджы», – зæгъы Æппæтадæмон Ассоциаци «Æндидзæн»-ы организатор.

Уый ма радзырдта проект «Европæйы ирон культурæйы бонтæ»-йы саразыны хъæп-пæрисы тыххæй дæр.

«Ацы проект у уæрæх географион цæс-тæнгасæй. Авд азы дæргъы нын бантыст ирон нывгæнджытæн равдыст саразын Европæйы 10 бæстæйы 13 горæты –  Брюссель, Рим, Париж, Стамбул, Люксембург, Будапешт æмæ æндæр рæтты. Нырма европæйаг æхсæнад кæд фаг хъусдард не здахынц нæ нывгæнджыты равдыстытæм, уæддæр уымæ нæ кæсгæйæ, нæ равдыстытæм æрбацæуы бирæ адæм. Ис афтæ зæгъæн, æмæ ирон аивадмæ кæй цымыдис кæнынц Европæйы æхсæнады хицæн æмæ хицæн къордтæ. Растдæр зæгъгæйæ та нæ аивадæн табугæнджытæ сты куыд хуымæ-тæг цæрджытæ, афтæ культурæйы къабазы чи архайынц, ахæм адæймæгтæ», – загъта Пухаты Радион.

Цытджын уазæгмæ лæвæрд æрцыд ахæм фарст, зæгъгæ,«Культурæ политикæйы æддейæ»-йы тыххæй цы зæгъдзынæ æмæ нын æй куыд бацамондзынæ. Пухаты Радион афтæ загъта: «Мæ хъуыдымæ гæсгæ «Культурæ политикæйы æддейæ» нæ дæтты дзуапп йæ мидисæн.

Ныр цалдæр азы мах æмбæлæм бирæ цæлхдуртыл. Мадзæлттæ аразгæйæ, мах арæх фембæлæм Гуырдзыстоны политикты провокацитыл. Уыдон фыстæджытæ æмæ алыхуызон протестон гæххæттытæ æрви-тынц, мах равдыстытæ цы бæстæты саразынмæ фæхъавæм, уырдæм. Зæгъæм, уый аххосæй Парижы нæ равдыст дыккаг хатт аразынмæ куы хъавыдыстæм, уæд. Францаг горæт Монмендийы нын уыд равдыст, мах бадзырдтам семæ, иу афæдзы фæстæ та кæй сфæлхатт кæндзыстæм нæ равдыст. Фæлæ Гуырдзыстоны консул уыцы горæты мэрмæ ныффыста фыстæг. Уый фæстиуæгæн Монмендийы мэр дæр нал сразы ис. Уыдис ма ахæм цау дæр: Голландийы Фæсарæйнаг бастдзинæдты министр нæ разы кодта, нæ зындгонд нывгæнæг Кæсойты Лаврентийы равдыст сорганизаци кæныныл, уымæн æмæ, дам, уый у Хуссар Ирыстоны æм-бæстаг, æз, дам, дæн Гуырдзыстоны территорийы  æнæхъæндзинады æвварс. Фæлæ мах бавдыстам Кæсойты Лаврентийы гоймаггæнæг бæлвырдгæнæн, ома, Уæрæсейы æмбæстаг кæй у, ахæм  официалон документ. Куыддæр сын бауырнын кодтам, Кæсойты Лавренти Уæрæсейы æмбæстаг кæй у, уый, афтæ фæивтой сæ хъуыды. Уæдæ афтæ «Культурæ политикæйы æддейæ» Европæйы у миф», – загъта ма Пухаты Радион.

Фæлæ ма «Сæндидзын»-ы организатор куыд зæгъы, афтæмæй ис ахæм бæстæтæ дæр, цыран ирон нывгæнджытæн вæййы триумфтæ дæр.

«Ирон нывгæнджыты куыстытæ æмæ ма ноджы Ирыстоны туристон потенциал бавдисдзыстæм ацы фæззæджы Венæ æмæ Берлины цæрджытæн, программæ «Ирон культурæйы бонтæ Европæйы фæлгæтты», – загъта ма пресс-конференцийы растæджы Пухаты Радион.

Уый зæгъы, зæгъгæ, 2017 аз Австрийы расидт æрцыд «Уæрæсейаг туризм»-ы азæй. Уымæ гæсгæ, дам, программæйы организатортæ Австрийы сæйраг горæты сараздзысты чысыл презентаци Ирыстоны туристон потенциалæн. «Алы проект дæр рæстæджы цыдимæ фæивы. Ирыстоны ис иттæг хорз туристон бынæттæ. Фæлæ иунæгæй уыцы куыст кæнын зын у. Хъæуы Ирыстоны дыууæ хайы разамонджытимæ æмгуыст кæныныл баныхас кæнын», – загъта Пухаты Радион.

Æппæт ацы куыстытæ стыр финансон фæрæзтæ кæй домынц, стæй бирæ хъарутæ, уый фæдыл журналистты фарстæн дзуапп дæтгæйæ, уый афтæ радзырдта:

– Мæ проектæн мын сæйраджыдæр æххуыс кæнынц мæ бинонтæ, РХИ-йы раздæры æмæ ныры президенттæ Тыбылты Леонид æмæ Бибылты Анатоли. Уымæй дарддæр ма мæм æххуысы къух фæдаргъ кæны Республикæ Цæгат Ирыстон-Аланийы Сæргълæууæг Битарты Вячеслав. Æз сæттын, зын мисси кæй райстон мæхимæ, бирæ фыдæбон æмæ психологон æвзарæн-ты бахауын. Фæлæ уый мæнæн у мæ царды нысан æмæ мын нæй аздæхæн фæстæмæ», – загъта «Renaissance Sandidzen»-ы организатор.

Уазæгты Марфа

Comments are closed, but trackbacks and pingbacks are open.