27-æм октябры фыццаг хатт видеоконференцийы форматы уагъд æрцыд БРИКС-ы 6-æм парламентон форум ахæм темæйыл: «Глобалон стабилондзинад, иумиаг æдасдзинады æмæ инновацион рæзты БРИКС-ы интересты партнерондзинад», зæгъгæ. Ацы аз Уæрæсейы Федераци сæрдариуæгад кæны БРИКС-ы баиугæндæн.
Форумы хайадисджытæ фыццаджыдæр уынаффæмæ рахастой æмбæстæгты æнæниздзинад хъахъхъæныны æмæ социалон рæзты, экономикæ æндидзынады фадгуыты æмгуыстад коронавирусы пандемийы уавæрты, дунеон сæйрагдæр институтты сфидардæр кæнын æмæ БРИКС-ы уæнгты парламентон æмгуыстады рæзты фарстытæ. УФ-йы Паддзахадон Думæйы Сæрдар Вячеслав Володин рабадты хайадисджытæн бакаст УФ-йы Прези-дент Владимир Путины арфæйы фыстæг. Рабадты ныхас кæнгæйæ, Володин фыццаг рады фæндон бахаста, цæмæй æруынаффæ кæной дунеон сæйраг институтты, уыцы нымæцы ИНО æмæ Æнæниздзинад хъахъхъæныны дунеон организацийы сфидардæр кæныны фарстытæм. «Фæнды мæ банысан кӕнын, зæгъгæ, иуполярон дуне саразын, кæцы бындуриæуæг кæны «тыхджыны бартыл» гуырысхойаг кæны Иугонд Нациты Баиугæнды централон роль дунеон хъуыддæгты. Ахæм уавæрты глобалон стабилондзинад æмæ æдасдзинад сифтонг кæнын у вазыгджын. Махæн ахсджиаг у, цæмæй паддзахадты ‘хсæн ахастытæ арæзт цæуой кæрæдзийæн кад кæныны, дывæр стандарттæй ма пайда кæныны принциптыл», – банысан кодта уый.
Паддзахадон Думæйы спикеры ныхæстæм гæсгæ, дунеон институттæ æмæ организацитæн ис сæйраг нысаниуæг дунеон æдасдзинад сифтонг кæныны, терроризмы, æнæзакъонон миграцийы, наркотрафикы, коррупцийы ныхмæ тох кæныны бæстæты æрбаиу кæнгæйæ. Вячеслав Володин ма фехъусын кодта, зæгъгæ, коронавирусы пандеми бындур сарæзта «политикон конфронтаци æмæ æдзæсгом конкуренци» фæтыхджындæр кæнынæн æмæ æрсидт дунеон æмгуыстады фæрцы ацы тенденцийы ныхмæ тох кæныны тыххæй. Ахæм партнерондзинады цæвиттонæн гæнæн ис суой БРИКС-ы бæстæты иумиаг архайдтытæ коронавирусы ныхмæ вакцинæ рауадзыны фæдыл, ацы здæхты коалицийы æппæт уæнгты æнтыстытæ банысан кæнгæйæ. «Китай æмæ Инди сты дунеон базары хосгæнæн препаратты сæйраг ифтонггæнджытæй сæ иутæ. Хуссар Африкæйы Республикæ у африкæйаг континенты егъау медицинон сæудæджерады хицау, Бразили та – Латинаг Америкæйы. Уæрæсейаг зонады къухы бирæ бафтыд вирусологи æмæ микробиологийы проблемæтæ раиртасыны къабазы. Нæ бæстæ сарæзта æмæ срегистраци кодта коронавирусы ныхмæ дыууæ вакцинæ. Æртыккаг вакцинæ дæр тагъд æрцæудзæн регистраци», – фехъусын кодта уый. Володин ма бацамыдта Уæрæсейы приоритеттæй сæ иумæ – БРИКС-ы партнертимæ эпидемиологон тæссагдзинæдтæ развæлгъау бафæдзæхсыны комплексон системæ саразыны тыххæй æмæ ралæууыд 2018 азы бахæсгæ хуссарафрикæйаг инициативæ тагъддæр среализаци кæнынымæ, вакцинæты бакуыст æмæ иртасæнты центрæн бындур æрæвæрыны тыххæй.
«Парламентаритæ хъуамæ саразой æнæмæнгхъæуæг уавæртæ æнæниздзинад хъахъхъæныны фадыджы БРИКС-ы бæстæты æмгуыстад фæактивондæр кæныны тыххæй, алцыдæр саразын хъæуы инфекцион низты ныхмæ тох кæныны паддзахадон системæты эффективондзинад фæбæрзонддæр кæныны тыххæй. Ацы хъуыддаг цас ахсджиаг у, уый нын фенын кодта коронавирусон инфекци, кæцы дунейы æркодта экономикæйы кризисмæ», – фехъусын кодта Володин. БРИКС-ы бæстæты æмгуыстад ма æнæмæнг-хъæуæг у экономикæ сæндидзын кæныны тыххæй дæр. Володин æрсидт партнертæм, цæмæй активондæрæй кусой БРИКС-ы бæстæты лидерты уынаффæты реализацийыл, кæцытæ уынаффæ рахастой пандемийы фæстиуджыты сæрты ахизыны фæдыл иумиаг мадзæлттæ бакусыны фæдыл.
«Ацы здæхты ахсджиаг къахдзæф хъуамæ суа ацы азы кæронмæ БРИКС-ы экономикон партнерондзинады сноггонд стратеги 2025 азы онг райсын. Документ сбæрæг кæндзæн æмархайды ориентиртæ æмæ приоритеттæ, ратдзæн ног импульс фондз бæстæйы базарадон-инвестицион æмгуыстадæн», – загъта Паддзахадон Думæйы Сæрдар.
Вячеслав Володин бирæполярондзинадмæ тырныны ахсджиагдзинады тыххæй дзургæйæ, банысан кодта парламентон æмбар диалогы æнæмæнгхъæуындзинад. «Мах хъуамæ тох кæнæм иумиаг позицийыл дунеон парламентон фæзуатты. Ахсджиаг у нæ бæстæты хайадисты тыххæй раст уавæртæ сифтонг кæнын. Дунейы æнкъардæуы иумиаг боны фæткы домындзинад, паддзахадты суверенон æмбардзинады, адæмтæ сæ хъысмæт сæхæдæг бæрæг кæныны бар, уæлдай растдæр æмæ демократондæр дунеарæзтады принципты бахъахъхъæнын. Парламентон дипломати хъуамæ дзуапп радта ацы фарстæн, уыимæ конфронтаци æмæ конфликтон потенциал къаддæр кæныны æмархайд кæнгæйæ», – банысан кодта уый.
Форумы раныхас кодта УФ-йы Федерацийы Советы Сæрдар Валентина Матвиенко. Йæ хъусынгæнинаджы уый рæгъмæ рахаста дунеон æдасдзинады тæссагдзинæдты темæ. «Тынг тæссаг къадзæф у АИШ иуварсонæй Астæуккаг æмæ къаддæр дæрддзæджы ракетæтæ сликвидаци кæныны Бадзырдæй кæй рахызт, уый. Ныртæккæ та АИШ фæнд кæны СНВ-3 бадзырдæй рахизын, кæцыйы æмгъуыд фæуд кæны 2021 азы февралы. Ахæм æнæахъуыдыгонд къахдзæфты фæстиуджытæ гæнæн ис æркæной стратегион стабилондзинад æмæ æдасдзинады æппæт глобалон системæйы демонтажмæ», – загъта Валентина Матвиенко.
Уый æрсидт дунеон æмгуыстадмæ, кæцы бындуриуæг кæны кæрæдзийæн кад кæныны, æууæнкдзинады æмæ æргомдзинады принциптыл. Феде-рацийы Советы спикер нымайы зæгъгæ, хъæуы сорганизаци кæнын БРИКС-ы нысанон къорд КОВИД-19 пандемийы фæстæ рæстæджы фидар экономикон рæзты фæдыл. Уый зæрдыл æрлæууын кодта, зæгъгæ, Уæрæсе баххуыс кодта 40 бæстæйæ фылдæрæн инфекцийы ныхмæ тох кæныны. «Мах зонæм, ахæм проекттæ кæй æххæст кæнынц БРИКС-ы нæ партнертæ дæр», – банысан кодта Матвиенко æмæ фæндон бахаста, цæмæй сæ коллегæтæ рахæцой эпиде-мийы ныхмæ тох кæныны уæрæсейаг инициативæйы æвварс.
Форумы рæстæджы раныхас кодтой БРИКС-ы бæстæты парламентты къухдариуæггæнджытæ. Сæ раныхæсты парламентаритæ лæмбынæг æруынаффæ кодтой коронавирусы пандемийы, æмæ уыцы фæсидтытæ æмæ тæссагдзиндты ныхмæ фæлæууыны проблемæтыл, кæцытимæ ацы уавæрты сæмбæлдысты бæстæтæ се ‘ппæт дæр.
Рабадты фæстиуджытæм гæсгæ план цыд хатдзæгон хъусынгæнинаг райсын, фæлæ æргъæвд æрцыд фæстæдæр æмгъуыдмæ форумы хайадисджытæ ног фæндæттæ кæй æрбавдыстой, уымæ гæсгæ. Уый фæдыл ист æрцыд уынаффæ хатдзæгон хъусынгæнинагыл дарддæр бакусыны тыххæй.
Comments are closed, but trackbacks and pingbacks are open.