26 æмæ 27-æм августы РХИ-йы Президент Гаглойты Аланæн фембæлдтытæ уыд Хуссар Ирыстонмæ бæрæгбонон мадзæлтты хайад райсыны тыххæй æрцæуæг делегацитимæ.
Президент Гаглойты Алан йæхимæ райста УФ-йы Федерацийы советы делегацийы дунеон хъуыддæгты фæдыл Федерацийы советы комитеты сæрдар Григорий Карасины сæргълæудæй.
Делегацийы сконды уыдысты дунеон хъуыддæгты фæдыл Федерацийы советы комитеты уæнг Сергей Цеков, хъахъхъæнынад æмæ æдасдзинады фæдыл комитеты уæнг Крым Казаноков, конституцион закъондæттынад æмæ паддзахадон арæзтады фæдыл комитеты уæнг Ольга Ковитиди, Федерацийы советы аппараты æхсæнадæмон бастдзинæдты управленийы Хæдбар Паддзахадты Æмцæдисады паддзахадтæ-хайадисджытимæ æхсæнпарламентон æмгуыстады хайады хистæры хæдивæг Надежда Дахова.
Хуссарирыстойнаг фарсы ‘рдыгæй ма фембæлды хайад райстой Парламенты сæрдар Æлборты Алан, æддагон политикæ æмæ æхсæнпарламентон бастдзинæдты фæдыл Парламенты комитеты сæрдар Дриаты Заза æмæ бюджет æмæ хъалонты фæдыл парламенты комитеты сæрдар Джиоты Еленæ.
Паддзахады сæргълæууæг æгас цу загъта уазджытæн æмæ сын раарфæ кодта Хуссар Ирыстоны адæмæн ахæм нысаниуæгджын боны сæ визиты тыххæй. Уымæй дарддæр ма, Гаглойты Алан бахатыд Григорий Карасинмæ, цæмæй йæ номæй арфæйы ныхæстæ зæгъа УФ-йы Федерацийы советы сæрдар Валентина Матвиенкойæн. «Мах нæ зæрдыл дарæм, Республикæ Хуссар Ирыстоны хæдбардзинад банымайыны тыххæй уынаффæ Уæрæсе цы вазыгджын уавæрты райста, уый. Фæлæ афоныл райсгæ архайдтыты фæрцы хуссарирыстойнаг адæм абон цæрынц сабыр æмæ æдасæй. Уæрæсе Хуссар Ирыстоны паддзахадон хæдбардзинад куы банымадта, уый фæстæ Федерацийы совет æвæстиатæй немæ райдыдта æмгуыстад кæнын. Мах аргъ кæнæм не ‘хсæн цы æууæнчы ахастытæ ис, уыдонæн», – загъта уый.
Йæ рады, Григорий Карасин дæр раарфæ кодта Президентæн ахæм хъармæй сæ кæй райста, уый тыххæй. Уый банысан кодта, зæгъгæ, Уæрæсе æмæ Хуссар Ирыстон баст сты бирææнусон хæларадон бастдзинæдтæй.
«15 азы размæ æрцыд цау. Уымæн ис историон нысаниуæг æрмæст Хуссар Ирыстонæн нæ, фæлæ ма иумиаг, æхсæнадæмон æмбарынадæн, уымæн æмæ уæд, Хуссар Ирыстон равдыста йæ хæдбардзинадыл тохгæнæг адæмы хъæбатырдзинад. Мах уынæм, цас вазыгджын у уый абоны цауты цæвиттонæн. Уырны мæ, не ‘мцæдисон ахастытæ дарддæр кæй рæздзысты», – банысан кодта уый.
Республикæ Хуссар Ирыстон æмæ Уæрæсейы Федерацийы ‘хсæн æмгуыстады рæзтмæ се стыр хайбавæрды тыххæй Гаглойты Алан Григорий Карасин, Сергей Цеков, Крым Казаноков æмæ Ольга Ковитидийы схорзæхджын кодта Хæлардзинады орденæй.
Фембæлды кæрон фæрстæ кæрæдзийæн бакодтой зæрдылдарæн лæвæрттæ.
***
Президент Гаглойты Аланы иннæ фембæлд уыдис Республикæ Никарагуайы делегациимæ. Уыдон дæр Цхинвалмæ æрцыдысты бæрæгбонон мадзæлтты хайад райсыны тыххæй. Делегацийы сконды уыдысты Республикæ Никарагуайы фæсарæйнаг хъуыддæгты министр Денис Роналдо Монкада Колиндрес æмæ РХИ-йы Республикæ Хуссар Ирыстоны æххæстбарджын минæвар Альба Асусена Торрес Мехия.
Хуссарирыстойнаг фарсы ‘рдыгæй ма фембæлды хайад райстой æддагполитикон ведомствойы минæвæрттæ Фæсарæйнаг хъуыддæгты министр Джиоты Æхсары сæргълæудæй.
Паддзахады сæргълæууæг раарфæ кодта фембæлды хайадисджытæн. «Нæ бæстæты ‘хсæн рæзынц хъарм, хæларадон ахастытæ. Нæ нысан у уыцы ахастытæ сфидардæр æмæ дарддæр дæр рæзын кæнын. Тынг æхсызгон мын у, ахæм нысаниуæгджын боны нæ фарсмæ кæй стут, уый», – загъта уый.
Йæ рады, Денис Роналдо Монкада Колиндрес бузныг загъта Гаглойты Аланæн хъармæй сæ кæй райста, уый тыххæй. «Мах уемæ дих кæнæм ацы цины цау, уый махæн дæр ссис нысаниуæгджын. Махæн æхсызгон уыдзæн дæу Республикæ Никарагуайы нæхимæ райсын. Уыимæ, иннæ аз июны мæйы мах нысан кæндзыстæм Сандинисткаг революцийыл 45 азы сæххæсты бон», – банысан кодта уый.
Республикæ Хуссар Ирыстоны æмæ Республикæ Никарагуайы ‘хсæн ахастыты рæзтмæ се стыр хайбавæрды тыххæй Хæлардзинады орденæй хорзæхджын æрцыдысты Денис Роналдо Монкада Колиндре æмæ Альба Асусена Торрес Мехия.
***
Гаглойты Аланæн ма фембæлдтытæ уыд Луганскы æмæ Донецкы Адæмон Республикæты минæвæрттæ Александра Коваленко, Владимир Бидевка, Сергей Пересадаимæ; УФ-йы Паддзахадон Думæйы делегацийы уæнгтæ – Владислав Даванков, Леонид Калашников, Константин Затулин æмæ Яна Лантратоваимæ, Цæцæны Республикæйы делегациимæ – Умар Дауров, Лолита Хадизова, Ахмед Дудаев, Сурхо Мунаев, Расул Умаровимæ; РЦИ-Аланийы делегацийы уæнгтæ – Сергей Меняйло, Тускъаты Таймуразимæ; Кæсæг-Балхъары делегацийы уæнгтæ – Казбег Коков, Сергей Говоров, Алан Кульбаевимæ; Республикæ Хъырымы минæвар – Владимир Константиновимæ; Приднестроваг Молдаваг Республикæйы минæвар – Дмитрий Паламарчукимæ; Хъæрæсе-Черкессийы минæвар – Алексей Баскаевимæ; Санкт-Петербургы минæвæрттæ – Кирилл Федоров, Алексей Доссонимæ; Ленинграды областы минæвар – Борис Куртаевимæ; Республикæ Абхазы делегациимæ йæ сæргълæууæг Анри Барциц афтæмæй; Дагъыстаны делегаци – Энрик Муслимов, Магомед Хадулаевимæ; Республикæ Мæхъæлы минæвар Владимир Сластенинимæ; Турчы делегациийы уæнгтæ – Хоситы Бурхан æмæ Хайри Атаимæ; УФ-йы Президенты цур Æххæстбарджын минæвар Мария Львова-Беловаимæ; Абхаз, Луганск æмæ Донецкы Адæмон Республикæты хæстон архайдтыты ветерантимæ; ВГТРК «Россия»-йы генералон директор Рифат Сабитовимæ; телеканал «Санкт-Петербург»-ы генералон директор Александр Малькевичимæ.
