Знон информацион агентад «Спутник-Хуссар Ирыстон»-ы пресс-центры нæ республикæйы Информаци æмæ мыхуыры паддзахадон комитеты сæрдар Хъотайты Марияйæн уыдис радон брифинг æрвылкъуырион афæлгæсты фæдыл.
Брифингы райдианы Хъотайты Мария журналистты зæрдыл æрлæууын кодта Знауыры районы Уистæ (Цънелисы) хъæумæ хæстæг ивгъуыд къуырийы кæрон гуырдзиаг полициæгтæ æнæзакъононæй сæ пост кæй сæвæрдтой æмæ уыимæ иумæ сæхи куыд бафæндыд, афтæ арæн кæй банысан кодтой, уый. Мария куыд банысан кодта, афтæмæй уыцы ран цæрынц 11 ирон бинонтæ æмæ сæвзæргæ уавæрæй тынг фæтарстысты. «Кæй зæгъын æй хъæуы, цæрджытæн сæ бон нæу гуырдзиаг тыхон структурæты ныхмæ æрлæууын æмæ уымæ гæсгæ Хуссар Ирыстоны хицауад уыцы постмæ хæстæг сæвæрдта арæнхъахъхъæнæг нарядтæ. Уырдæм æрвыст æрцыдысты ОМОН æмæ нæ республикæйы æндæр тыхон структурæтæ дæр. Уыцы мадзæлттæ райсын уыдысты æнæмæнгхъæуæг хъæуы цæрджыты æдасдзинад ифтонг кæнынæн. Уыцы хъуыддаг домдæуыдис нæ бæстæйы сæргълæууæгимæ фембæлды рæстæджы дæр æмæ сæ домæн æххæст æрцыдис. Зæгъын мæ фæнды уый, æмæ канд Уисты хъæуы цæрджытæ нæ фæтарстысты сæвзæргæ уавæрæй, фæлæ ма Цхинвалы цæрджыты ‘хсæн дæр цыдис паникæ, зæгъгæ, тас у хæсты эскалацийæ. Æгæрыстæмæй, адæм телефонты кæрæдзийы фарстой, зæгъгæ, хъæуы сывæллæтты сэвакуаци кæнын æви нæ? Ницæй хæст нæ уыдзæ-нис. Уый гæнæн нæй, æмæ Гуырдзыстон æрбабырса Хуссар Ирыстонмæ», – банысан кодта Хъотайты чызг.
Информаци æмæ мыхуыры паддзахадон комитеты сæрдар ма куыд банысан кодта, уымæ гæсгæ абон кæд Гуырдзыстоны политиктæ бæллынц уымæ, цæмæй фæстæмæ æрбаздахой Хуссар Ирыстон æмæ Абхазы, уæддæр дзы ничиуал сфæлхатт кæндзæн Саакашвилийы уæды къахдзæфтæ. Ног фæзынгæ гуырдзиаг провокацитæм Хуссар Ирыстоны ахаст у карз, фæлæ уый æппындæр нæ нысан кæны уæрæхмасштабон æфсæддон операцитæ райдайын. Йæ хъуыдымæ гæсгæ, Гуырдзыстоны æхсæнады ‘хсæн æнæрайгонддзинад куы сæвзæры царды æмвæзады æмæ паддзахады социалон-экономикон уавæры тыххæй, уæд хицауиуæгад йе ‘мбæстæгты, æвзарджыты хъусдард здахын райдайы «оккупацигонд территоритæ раздахыны» темæмæ.
«Абон Гуырдзыстоны радон хатт базмæлын кодтой мидæг-гагон конфликттæ, цæуы дзы политикон элитæты ныхмæлæуд. Уыцы æндыгъддзинадмæ мах нæ хъус дардтам сæрды райдианæй. Æмæ та ныр дæр сæ къухдариуæгад сфæнд кодтой радон провокацитæ Хуссар Ирыстоны арæнтыл сорганизаци кæнын. Саломе Зурабишвили та у Францæй рацæугæ гуырдзиаг æмæ кæны бирæ уæлдай ныхæстæ. Нырма уал йæ адæмæн ныфс дæтты, цæмæй раздаха Абхаз æмæ Хуссар Ирыстоны, стæй та Мæскуыйы къухдариуæгадмæ бахаста ахæм хъуыды, цæмæй фадæттæ сараза сабырадон диалогæн æмæ уыимæ иумæ æрбæстон кæна Уæрæсеимæ бадзырдон процесс», – зæгъы Хъотайты Мария. Фæлæ йæ ныхæстæм гæсгæ, абон мах дарддæр уынæм, æргом провокацитæ арæзт кæй цæуынц нæ республикæйы территорийыл, уый. «Гуырдзыстоны президенты дада уыдис канд меньшевик нæ, фæлæ ма куыста Гуырдзыстоны меньшевикон хицауады, кæцы хуссарирыстойнаг ирæттæн 1920 азы сарæзта геноцид. Советон хицауад куы æрфидар, уæд уый алыгъдис Францимæ. Уымæ гæсгæ Зурабишвилийæн генетикон æгъдауæй йæ туджы ис агресси ирон адæмы ныхмæ. Абон Гуырдзыстоны мидæггагон уавæр стабилон кæй нæу, уымæ гæсгæ сын пайда не сты конфликттæ», – ахæм хъуыдыйыл хæст у брифингуадзæг.
Уый ма журналистты зæрдыл æрлæууын кодта, Хуссар Ирыстоны арæнтæ РХИ æмæ УФ-йы ‘хсæн бадзырдты фæлгæтты хъахъхъæд кæй цæуынц æмæ гуырдзиаг тыхон структурæты æппæт агресситæн дæр, афтæ ма уæрæсейаг æфсæддон службæгæнджыты ныхмæ арæзт агрессийæн дæр æмбæлон аргъ кæй скæндзысты», – банысан кодта Хъотайты Мария.
Брифингы ма уый æрдзырдта æндæр ахсджиаг фарстытыл дæр.
Нӕ уцх.
Comments are closed, but trackbacks and pingbacks are open.