Инциденттæ ма æруадзын æмæ сæм хъусдард здахыны фæдыл механизмты фæлгæтты радон фембæлд уагъд цыд æндыгъд уавæрты, гуырдзиаг спецслужбæтæ Знауыры районы Уистæм (Цънелисмæ) хæстæг полициæгты æнæзакъонон пост кæй æвæрынц, уыцы аххосагмæ гæсгæ. Механизмты фæлгæтты фембæлды хуссарирыстойнаг фарс фехъусын кодта, Гуырдзыстонимæ арæнтыл уавæр кæй карз кæны, æмæ тæссагдзинад кæй æвзарын кæны æрмæст уыцы районы нæ, фæлæ æгас регионы дæр. Хуссар Ирыстонæй делегацийы сæргълæууæг, Фæсконфликтон фарстатæ бæстон кæныны фæдыл РХИ-йы Президенты æххæстбарджын минæвары хæдивæг Коцты Егор информацион фæрæзтæн куыд радзырдта, уымæ гæсгæ механизмты куыст райдыдта 29 августы райсом 10 сахатæй æмæ аххæссыд 15.00 сахатмæ.
Уыцы рæстæг, боны фæткмæ хаст цы фарстатæ уыд, уыдоныл уынаффæ æппындæр не ‘рцыд. Дзырд цыд æрмæстдæр иу ахсджиаг фарстыл – цæрæн пункт Уисты (раздæры Цънелисы) сæвзæргæ æндыгъд уавæр, цыран провокацийы нысанæн сæрмагонд службæтæ æвæрынц «полициæгты пост» – афтæ йæ хонынц сæхæдæг дæр. Хуссар Ирыстоны делегацийы домæн уыд æрмæстдæр уый, цæмæй уыцы бынатмæ цы полицийы кусджытæ æмбырд кæнынц, уыдон уырдыгæй ацæуой æмæ ма карз кæной уавæр.
«Ацы фарстыл уынаффæ цыд фондз сахаты бæрц, хуссарирыстойнаг фарс хаста бирæ фæндæттæ ацы проблемæ æрбæстон кæныны тыххæй. Уыцы нымæцы майрæмбоны Уисты хъæуы техникон фембæлд ауадзын дæр. Уымæн æмæ ацы бынаты цы пост æвæрд цæуы, уый комкоммæдæр у тæссагдзинадхæссæг. Уыцы техникон фембæлды нысан у æрмæстдæр полициæгты æнæзакъонон пост аразыны куыстытæ æруромын. Кæй зæгъын æй хъæуы, гуырдзиаг фарс не сразы уыцы хъуыддагыл дæр, уымæй дæр банысан кодтой, зæгъгæ, уыцы пост уым æвæрд кæй цæуы, уый ницы тæс-сагдзинад æвзæрын кæны», – дзырдта хуссарирыстойнаг делегацийы сæргълæууæг.
Фæлæ уыцы хъуыдыйыл не сразы сты хуссарирыстойнаг минæвæрттæ. Уымæн æмæ гуырдзиаг полициæгтæ пост кæм аразынц, уырдыгæй Хуссар Ирыстоны цæрæн пунктмæ ис 240-250 метры бæрц æмæ гуырдзиаг цæрæн бынатмæ та – дыууæ километры бæрц. Уыцы бынатмæ гуырдзиаг полициæгтæ æхсæвыгон алыг кодтой фæндаг ирон хъæуы сæрмæ. Хуссарирыстойнаг фарс рагæй хæссы фæндон бадзырдтыты фæстиуæгæн уыцы районы паддзахадон арæнтæ сбæрæг кæнын. Фæлæ гуырдзиаг минæвæрттæ куыд хъусын кæнынц, уымæ гæсгæ уыцы «пост» арæзт цæуы гуырдзиаг территорийыл. Уый хыгъд ницы документтæ æрбавдисын у сæ бон, æрмæстдæр – ныхасæй хъусынгæни-нæгтæ.
Бæрæг куыд у, уымæ гæсгæ гуырдзиæгты пост æвæрд цæуы комкоммæдæр хуссарирыстойнаг территорийыл. Хуссар Ирыстонмæ ис æппæт æнæмæнгхъæуæг документтæ, кæцытæм гæсгæ бæрæг у, паддзахадон арæнтæ кæуылты цæуынц, уый, уыцы нымæцы – 1922 азы Декрет, кæцымæ гæсгæ бæлвырд у, уыцы территори Хуссар Ирыстоны автономон областы территори кæй уыд, уый.
Коцты Егоры ныхæстæм гæсгæ, хуссарирыстойнаг фарс рацыд механизмты куыстæй, уымæн æмæ гуырдзиаг фарсмæ нæ бахъардта хъуыддаджы æцæгдзинад æмæ нæ равдыстой зондджын ахаст сæвзæргæ уавæры фæдыл.
Уый тыххæй хуссарирыстойнаг делегаци сæвæрдта цæхгæр домæн: майрæмбоны райсомы 6 сахатмæ уыцы пост иуварс хъуамæ æрцæуа, науæд ист æрцæудзысты закъонмæ гæсгæ æнæмæнгхъæуæг мадзæлттæ сæвзæргæ тæссаг уавæрты цæрджыты бахъахъхъæныны нысанæн.
Ацы бынаты ирон хъæуы цæрджытæ, кæй зæгъын æй хъæуы, тыхсынц æмæ бахатыдысты Хуссар Ирыстоны къухдариуæгадмæ æххуысы фæдыл. Хуссарирыстойнаг делегацийы сæргълæууæг куыд банысан кодта, уымæ гæсгæ æппæт амæлттæй дæр архайдзысты, цæмæй Республикæ Хуссар Ирыстоны закъондæттынадмæ гæсгæ æппæт амæлттæй дæр хъахъхъæд æрцæуа нæ территори.
Бæрæг куыд у, афтæмæй механизмты куысты цы дунеон организациты минæвæрттæ исынц хайад, уыдон, Егоры ныхæстæм гæсгæ, хъусын кæнынц æрмæстдæр æндыгъд уавæр ма æруадзыныл. Уымæй дарддæр ницы хъуыдытæ райхъуыст уыдонæй.
Фæстаг бæрæггæнæнтæм гæсгæ гуырдзиаг фарсы æнæзакъонон архайдтытæ уавæр æндыгъд кæнынмæ здæхт кæй сты, уымæй дарддæр хорзæй ницы хæссынц, фыццаджыдæр, сæхицæн. 29 августы æхсæвы уыцы бынатæй ацыдысты гуырдзиаг тыхон структурæтæ, фæлæ та майрæмбоны райсомæй фæстæмæ тымбыл кæнын райдыдтой.
КЪÆБУЛТЫ Маринæ
Comments are closed, but trackbacks and pingbacks are open.