Стыр Уæлахизы бон бирæ азты размæ милуангай адæймæгты тугæй æлхæд кæй æрцыдис, уымæ гæсгæ йын абон алчидæр кæны стыр аргъ æмæ кад. Æрвылаз æрæмысæм, сæрибар нын чи æрхаста æмæ тугкалæн тохты чи фæмард, уыдоны рухс нæмттæ. Стыр аргъ æмæ кад кæнынц, абон ма не ‘хсæн чи ис, уыцы Стыр Фыдыбæстæйон хæсты ветерантæн.
9-æм майы бæрæгбоны нæ бæстæ срæсугъд æмæ фæмидисджындæр вæййы алыгъуызон культурон æмæ хиирхæфсæн мадзæлттæй. Ныридæгæн уал Цхинвал хайад исы дунеон историон акци «Уæлахизы диктант»-ы. Цыппæрæмы акци райдыдта Хуссар Ирыстоны паддзахадон университет æмæ гимнази «Альбион»-ы.
«Альбион»-ы ахуыргæнинæгтæм фæуазæг ис Цхинвалы Уырыссаг Хæдзары сæргълæууæг Сергей Скворцов. Уый фыццаджыдæр акцийы хайадисджытæн арфæ ракодта Стыр Уæлахизы бæрæгбоны цытæн æмæ бузныг загъта æндæр адæмты æмрæнхъ «Уæлахизы диктант»-ы хайад кæй исынц, уый тыххæй. «Зынаргъ ахуыргæнинæгтæ, бузныг, кæй саккаг кодтат æмæ кæй æрбацыдыстут диктант фыссынмæ. Ацы акци дунеон у, æрбаиу æм сты бирæ бæстæтæ, Африкæйæ суанг Америкæйы онг. Акцийы хайад райсын, фыццаджыдæр, ахъаз у уый тыххæй, цæмæй зонат Стыр Фыдыбæстæйон хæсты тыххæй æмæ уæ зæрдыл дарат уæ дадатæ æмæ нанатæ Райгуырæн бæстæйы сæрвæлтау цыфыддæр знагимæ куыд тох кодтой, уыдæттæ. Истори зонын кæддæриддæр у пайда», – банысан кодта Скворцов.
«Россотрудничество»-йы минæварады сæргълæууæг ма схорзæхджын кодта ивгъуыд азы ацы акцийы уæлахиздзау, педагог Тыбылты Ирбеджы. «Акцийы организатортæ æрæрвыстой Ирбегæн диплом æмæ зæрдылдарæн лæвæрттæ, иууыл хуыздæр Хуссар Ирыстоны «Уæлахизы диктант» кæй ныффыста, уый тыххæй. Зынаргъ ахуыргæнинæгтæ, сымахæн ис дæнцæг кæмæй райсат, ахæм адæймаг. Мæ зæрдæ уын зæгъы, цæмæй сымах дæр тынг хорз ныффыссат уæ диктант æмæ уе ‘хсæн разына уæлахиздзаутæ», – банысан кодта уый.
Дунеон историон акци «Уæлахизы диктант» Стыр Фыдыбæстæйон хæсты темæйыл ныффысдзысты 40 бæстæйæ фылдæры. Акцийы хайад райсын у алкæй бон дæр, æгæрыстæмæй дистанцион æгъдауæй дæр. Ивгъуыд азы «Уæлахизы диктант» ныффыстой милуан æмæ æрдæгæй фылдæры бæрц адæймаджы.
КОЦТЫ Еленæ
