Паддзахадон арæнтæ халыны бар никæмæн ис
Инциденттæ ма æруадзын æмæ сæм хъусдард здахыны фæдыл механизмты фæлгæтты радон фембæлды рæстæджы уынаффæ цыд ацы форматы фæстаг фембæлдæй фæстæмæ Республикæ Хуссар Ирыстон æмæ Гуырдзыстонимæ æмарæн территоритыл æрцæугæ цаутимæ баст фарстатыл. Фембæлдтытæ уагъд цæуынц Хуссар Ирыстон, Гуырдзыстон, Уæрæсе, Евроцæдисы æмæ ЕÆÆО-йы мисситы хъусдарджыты хайадистæй.
Ацы форматы фембæлдтытæ уагъд цæуынц æнæ информацион фæрæзты хайадистæй. Фембæлды боны фæтк æмæ йын хатдзæгтæ аразгæйæ, Хуссар Ирыстонæй делегацийы сæргълæууæг, Постконфликтон фарстатæ бæстонкæнынады фæдыл РХИ-йы Президенты æххæстбарджын минæвары хæдивæг Коцты Егоры ныхæстæм гæсгæ афтæ радзырдта, зæгъгæ, механизмты фæлгæтты сæйраджыдæр дзырд цыд, гуырдзиаг полициæгты минæвæртты ‘рдыгæй цы провокацитæ арæзт цæуынц, уыцы фарстыл.
Фембæлды райдианы дæр банысанчындæуыд, ацы форматы фембæлдтыты сæйраг æнтыст кæй у, нæ бæстæты ‘хсæн сабырад æмæ æнцойад кæй уæвынад кæны, уый.
«Уымæ гæсгæ сабырад бахъахъхъæныны тыххæй ацы бадзырдтытæ дарддæр уагъд цæудзысты æмæ сын, мæ хъуыдымæ гæсгæ, ис ахсджиаг фæстиуæг», – банысан кодта делегацийы сæргълæууæг.
Гуырдзиаг полицийы минæвæрттæ
халынц арæнты фæтк
Коцты Егоры ныхæстæм гæсгæ, гуырдзиаг полициæгты минæвæрттæ дзуаппæн фыдæнæн митæ кæнынц арæнхъахъхъæнджыты архайдтытæн. Уый бамбарын кодтой фембæлды хайадисæг дунеон хъусдарджытæн дæр.
Делегацийы сæргълæууæг куыд банысан кодта, уымæ гæсгæ апрелы мæйы æмбисæй фæстæмæ хынцыд æрцыд авд провокацион цауы.
«Паддзахадон арæнтæм хæстæг-иу бацыдысты гуырдзиаг полициæгты минæвæрттæ. Æмæ ма ноджы иу инцидент – полициæгтимæ уыд æнæхицауадон организацийы минæвар Давид Кацарава. Уый æнæуаг ныхæстæ дзырдта арæнгæрон службæгæнджыты минæвæрттæм ахасты æмæ ма социалон хызæгты апарахат кодта видеоæрмæджытæ дæр», – дзырдта Егор.
Хуссарирыстойнаг делегацийы сæргълæууæг куыд банысан кодта, уымæ гæсгæ ахæм инцинденттæн дарддæр æруадзæн нæй.
Æнæпилотон тæхæн аппараттæ халынц уæлдæфон тыгъдад
Гуырдзиаг фарс раздæр нæ разы кодта ацы фарстыл, зæгъгæ, уыдон нæ халынц Хуссар Ирыстоны уæлдæфон тыгъдад æмæ æнæпилотон тæхæн аппараттæ дæр уыдон не сты. Фæлæ ацы фембæлды сæ дзуапп æндæргъуызон уыд.
Сæ зæрдыл сын æрлæууын кодтой, нæ республикæйы уæлдæфон тыгъдад халыны цаутæ чи бæрæг кæны, уыцы видеоæрмæджытæ, кæцытæй йемыдзаг сты гуырдзиаг социалон хызæгтæ. Æнæпилотон тæхæн аппараттимæ чи архайы, уыцы гуырдзиаг специалисттæ видеоæрмæджытæ сæвæрынц интернеты æргом хызæджы. Æмæ уыдон сты, тæхæн аппараттæ нæм Гуырдзыстоны фарсæрдыгæй кæй тæхынц, уый комкоммæ бæлвырдгæнæн.
Уисты хъæуы æнæзаконон пост
Коцты Егоры ныхæстæм гæсгæ, форматы хайадисджытæ уынаффæ кодтой алыгъуызон архайдтыты фæдыл рæстæгыл хъусын кæныны тыххæй фарстатыл. Рæгъмæ хаст æрцыдысты хуссарирыстойнаг фарсы цымыдисгæнæг фарстатæ. Уыцы нымæцы Знауыры районы Уисты хъæуы цы æнæзакъонон пост сæвæрдтой гуырдзиаг полициæгтæ, уый дæр.
Ацы районы къорд хæттыты хынцыд æрцыд, гуыр-дзиаг полицæгтæ кæм не мбæлы, ахæм бынæтты кæй уыдысты. Гарзджын адæм уыдысты тальчы заводы территорийыл дæр, æмæ уымæн нæй æруадзæн. Йæ рæстæджы хуссарирыстойнаг фарс хаста фæндæттæ ацы проблемæ æрбæстон кæныны фæдыл, фæлæ гуырдзиаг фарс равзæрста дестабилизацийы фæндаг.
Регионы æдасдзинады фарстатæм æркæсыны нысанæн фоматы хайадисджытæ уымæй размæ ауагътой техникон фембæлд, цыран уынаффæ цыд Цъинагармæ донхæры дон ауадзыныл. Дыууæ фарс дæр ныфс бавæрдтой, хуссарирыстойнаг æмæ гуырдзиаг фæрсты донхæры донæй сифтонг кæнынæй.
Инциденттæ ма æруадзын æмæ сæм хъусдард здахыны фæдыл механизмты форматы радон фембæлд уагъд æрцæудзæн 3 июлы.
Нæ уацх.
